បញ្ហាតំបន់កួកឌីស្ថាន ជាស្នូលនៃជំនួប រវាងនាយករដ្ឋមន្ត្រីអ៊ីរ៉ាក់ និងប្រធានាធិបតីបារាំង
លោក នាយករដ្ឋមន្ត្រីអ៊ីរ៉ាក់ បានទៅដល់ទីក្រុងប៉ារីស ប្រទេសបារាំង ដើម្បីជួបពិភាក្សា ជាមួយនឹងលោកប្រធានាធិបតីបារាំង។ សំណុំរឿងប្រយុទ្ធប្រឆាំង នឹងក្រុមជីហាតអង្គការរដ្ឋអ៊ីស្លាម ត្រូវបានថ្នាក់ដឹកនាំទាំងពីរ លើកមកនិយាយ ព្រមជាមួយនឹងបញ្ហា តំបន់ស្វយ័ត កួកឌីស្ថាន បន្ទាប់ពីមេដឹកនាំតំបន់នេះ បានធ្វើប្រជាមតិផ្តាច់ខ្លួនចេញពី ដែនដីអ៊ីរ៉ាក់។ អ៊ីរ៉ាក់ កំពុងឈានទៅជួបវិបត្តិមួយថ្មីទៀត បន្ទាប់ពីយកឈ្នះក្រុមជីហាត អង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
មួយរយៈពេលចុងក្រោយនេះ កងទ័ពអ៊ីរ៉ាក់ កំពុងតែឈានទៅយកឈ្នះ ពីតំបន់មួយទៅតំបន់មួយ លើក្រុមជីហាតអង្គការរដ្ឋអ៊ីស្លាម។ ជ័យជំនះរបស់កងទ័ពអ៊ីរ៉ាក់ ត្រូវបានជួយជ្រោមជ្រែង ដោយកងទ័ពសម្ព័ន្ធមិត្ត ដែលក្នុងនោះ គឺមានកងទ័ពបារាំង។ លោក Haidar Al Abadi នាយករដ្ឋមន្ត្រីអ៊ីរ៉ាក់ មិនបានភ្លេចលើកសរសើរ ពីកិច្ចសហការនេះទេ នៅចំពោះមុខ លោកប្រធានាធិនតីបារាំង អេម៉ានុយអែល ម៉ាក្រុង។
សង្រ្គាមដណ្តើមយកដែនដីមកកាន់កាប់វិញ ពីដៃក្រុមជីហាតអង្គការរដ្ឋអ៊ីស្លាម ហាក់កំពុងខិតទៅរកទីបញ្ចប់ តែស្រាប់តែអ៊ីរ៉ាក់ ត្រូវជួបនឹងវិបត្តិមួយទៀត គឺបញ្ហាបំបែកទឹកដីសុំឯករាជ្យ របស់ក្រុមជនជាតិកួក។ ក្រុមជនជាតិកួក នៅតំបន់ស្វយ័ត កួកឌីស្ថាន បានធ្វើការបោះឆ្នោតប្រជាមតិ ផ្តាច់ខ្លួនចេញពីអ៊ីរ៉ាក់ កាលពីថ្ងៃទី ២៥កញ្ញា។
នៅទីក្រុងប៉ារីស លោក នាយករដ្ឋមន្ត្រីអ៊ីរ៉ាក់និយាយថា អ៊ីរ៉ាក់ មិនចង់បានទេ នូវការប្រឈមមុខដាក់គ្នាដោយយោធា ជាមួយនឹងក្រុមជនជាតិកួក។ រដ្ឋាភិបាលអ៊ីរ៉ាក់ សុំអំពាវនាវ ឲ្យតំបន់កួកឌីស្ថាន ពិចារណាឡើងវិញ មិនត្រូវធ្វើឲ្យបែកបាក់ សាមគ្គីជាតិ ក្នុងកាលៈទេសៈ ដ៏គ្រោះថ្នាក់នេះទេ។ នាយករដ្ឋមន្ត្រីអ៊ីរ៉ាក់ បានឆ្លៀតនិយាយរំលឹក អំពីតួនាទី របស់ក្រុមកងកម្លាំងកួក ដែលបានជួយសហការយ៉ាងម៉ឺងម៉ាត់ ជាមួយកងទ័ពអ៊ីរ៉ាក់ ក្នុងការប្រយុទ្ធជាមួយក្រុមជីហាតអង្គការរដ្ឋអ៊ីស្លាម។ តែយ៉ាងណា លោកនាយករដ្ឋមន្ត្រីអ៊ីរ៉ាក់ បាននិយាយថា រដ្ឋាភិបាលកណ្តាលរបស់អ៊ីរ៉ាក់ មិនអាចទទួលយកការបំបែកទឹកដី ដែលតំបន់កួកឌីស្ថានទាមទារនោះឡើយ។
ចំណែកលោកប្រធានាធិបតីបារាំង បានបញ្ជាក់ថា បារាំងគាំទ្រ និងនៅពីក្រោយរដ្ឋាភិបាលអ៊ីរ៉ាក់ជានិច្ច។ បារាំងរងចាំសហការជួយ ដើម្បីកសាងស្ថាប័នរដ្ឋាបាល និងសេដ្ឋកិច្ចអ៊ីរ៉ាក់ឡើងវិញ។ ទាក់ទិន និងបញ្ហាតំបន់កួកឌីស្ថាន លោកម៉ាក្រុង បាននិយាយថា រដ្ឋាភិបាលបារាំង មិនគាំទ្រជាដាច់ខាត នូវរាល់ការប៉ុនប៉ងពុះច្រៀកអ៊ីរ៉ាក់ជាពីរជាបី ព្រោះវានឹងធ្វើឲ្យអ៊ីរ៉ាក់ចុះខ្សោយ។
តែយ៉ាងណា រដ្ឋាភិបាលបារាំង សំណូមពរ ឲ្យរដ្ឋាភិបាលអ៊ីរ៉ាក់ ពិចារណា ធ្វើកំណែទម្រង់ចាំបាច់ ដើម្បីផ្តល់សិទ្ធិជូនប្រជាជនកួក នៅតំបន់កួកឌីស្ថាន ឲ្យសមស្រប ដើម្បីធ្វើឲ្យពួកគេ អាចរួមរស់ជាមួយប្រជាជាតិអ៊ីរ៉ាក់ តទៅទៀត ប្រកបដោយភាពកក់ក្តៅ។ លោកម៉ាក្រុងបន្ថែមថា បើសិនអ៊ីរ៉ាក់យល់ព្រម បារាំងសុខចិត្តធ្វើជាអាជ្ញាកណ្តាល ដឹកនាំការចរចាមួយ ក្នុងក្របខណ្ឌអង្គការសហប្រជាជាតិ រវាងរដ្ឋាភិបាលអ៊ីរ៉ាក់ និងក្រុមជនជាតិកួក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ