អ៊ីតាលី នឹងចាប់ឃាត់នាវាសង្រ្គោះជនភៀសខ្លួន ២គ្រឿងរបស់អង្គការមនុស្សធម៌អាល្លឺម៉ង់
មួយសប្តាហ៍ បន្ទាប់ពីបានប្រកែក មិនអនុញ្ញាតឲ្យនាវាសង្រ្គោះជនភៀសខ្លួន របស់អង្គការមនុស្សធម៌បារាំងមួយគ្រឿង ចូលទៅចតនៅកំពង់ផែអ៊ីតាលី កាលពីថ្ងៃសៅរ៍ទី២៣មិថុនា រដ្ឋាភិបាលអ៊ីតាលី បានប្រកាសថា គេនឹងចាប់ឃាត់ទុក នូវនាវា២គ្រឿង របស់អង្គការមនុស្សធម៌អាល្លឺម៉ង់ ដោយចោទថានាវាទាំងនោះ ជានាវាខុសច្បាប់ ហើយធ្វើសកម្មភាពជួយជនភៀសខ្លួន ដោយខុសច្បាប់។
ចុះផ្សាយនៅថ្ងៃ៖
ស្តាប់ - ០២:២៥
លោក Danilo Toninelli រដ្ឋមន្ត្រីក្រសួងដឹកជញ្ជូនអ៊ីតាលី បានប្រកាសថា នាវា២គ្រឿង មួយឈ្មោះ Lifeline របស់អង្គការអាល្លឺម៉ង់ Mission-Lifeline និងមួយគ្រឿងទៀត ឈ្មោះSeefuchs របស់អង្គការអាល្លឺម៉ង់Sea-Eye នឹងត្រូវអាជ្ញាធរអ៊ីតាលី ចាប់ឃាត់ទុក ដើម្បីធ្វើការត្រួតពិនិត្យពីភាពស្របច្បាប់។
លោករដ្ឋមន្ត្រីអ៊ីតាលីដដែល បានឆ្លៀតបន្ថែមថា នាវាទាំង២នោះ មានដោតទង់ហូឡង់។ អ៊ីតាលី ក៏បានសួរទៅកាន់អាជ្ញាធរប្រទេសហូឡង់រួចហើយ ហើយអាជ្ញាធរហូឡង់ បានអះអាងថា នាវាទាំងពីរនោះកំពុងធ្វើចរាចរណ៍ដោយខុសច្បាប់ ព្រោះមិនមានចុះបញ្ជីរត្រឹមត្រូវតាមច្បាប់ នៅហូឡង់ទេ។ ដោយឡែក តំណាងរបស់ហូឡង់ ប្រចាំសហភាពអឺរ៉ុប បានប្រតិកម្មនៅលើទំព័រ Twitter ថានាវា Lifeline Seefuchs មិនបានធ្វើចរាចរណ៍ ដោយដោតទង់ជាតិរបស់ហូឡង់ទេ។
សូមរំលឹកថា កាលពីថ្ងៃព្រហស្បតិ៍កន្លងទៅ នាវា Lifeline បានសង្រ្គោះបានជនភៀសខ្លួន ក្នុងសមុទ្រមេឌីទែរ៉ាណេ ចំនួន២២៦នាក់។ បច្ចុប្បន្ន នាវានេះ កំពុងតែស្វែងរកកំពង់ផែជិតបំផុត ដើម្បីចូលចតនៅអ៊ីតាលី។ លោករដ្ឋមន្ត្រីក្រសួងមហាផ្ទៃអ៊ីតាលី បានចោទនាវារបស់អង្គការនេះ ថាបានធ្វើខុសច្បាប់ ចូលទៅស្រង់យកជនភៀសខ្លួន ក្នុងដែនទឹកប្រទេសលីប៊ី ខណៈដែលអាជ្ញាធរលីប៊ី កំពុងតែហៀបនឹងសង្រ្គោះយកទៅខាងលីប៊ីទៅហើយ។ តែយ៉ាងណា តំណាងអង្គការអាល្លឺម៉ង់ Lifeline បានអះអាងថា គេបានសង្រ្គោះជនភៀសខ្លួន ក្នុងដែនទឹកអន្តរជាតិ ដោយគោរពត្រឹមត្រូវ ទៅតាមបទដ្ឋានច្បាប់សមុទ្រ ហើយក្នុងនាមជាអង្គការមនុស្សធម៌ គេមានកាតព្វកិច្ចបញ្ជូនជនភៀសខ្លួន ទៅកាន់កំពង់ផែ ដែលមានសុវត្ថិភាព និងនៅកៀកបំផុត។
គួរកត់សំគាល់ថា បញ្ហាជនភៀសខ្លួនក្នុងសមុទ្រ កំពុងតែបង្កជាជម្លោះនៅអឺរ៉ុប បន្ទាប់ពីរដ្ឋាភិបាលថ្មីរបស់អ៊ីតាលី បានចូលមកកាន់តំណែង។ រដ្ឋាភិបាលថ្មីនេះ គឺជារដ្ឋាភិបាល ដែលប្រឆាំងនឹងការមកដល់របស់ជនភៀសខ្លួន ហើយមានជំហររិះគន់ខ្លាំង លើភាពអសកម្មរបស់សហភាពអឺរ៉ុប ក៏ដូចជាប្រទេសអឺរ៉ុបផ្សេងទៀត ដែលមិនជួយរំលែកការលំបាករបស់អ៊ីតាលី ក្នុងការដោះស្រាយបញ្ហាជនភៀសខ្លួននេះ។
កាលពីសប្តាហ៍មុន រដ្ឋាភិបាលថ្មីអ៊ីតាលីនេះ បានបដិសេធ មិនឲ្យនាវាសង្រ្គោះ Aquarius របស់អង្គការមនុស្សធម៌បារាំង ដែលមានផ្ទុកជនភៀសខ្លួនជាង៦០០នាក់ ចូលទៅចតក្នុងកំពង់ផែខ្លួនទេ។ បញ្ហានេះ សឹងតែបានបង្ក ឲ្យកើតជាវិបត្តិការទូត រវាងអ៊ីតាលីនឹងបារាំង។ ទីបំផុត រដ្ឋាភិបាលអេស្ប៉ាញ បានចេញមុខទទួលយកនាវាបារាំង ឲ្យចូលចត។ បញ្ហាជនភៀសខ្លួននេះ គឺជាសំណុំរឿងធំបំផុត នៅក្នុងជំនួបកំពូលអឺរ៉ុប ដែលនឹងបើកទ្វារនៅថ្ងៃអាទិត្យទី ២៤មិថុនានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ