អូទ្រីស៖ វីដេអូរឿងអាស្រូវពាក់ព័ន្ធនឹងរុស្ស៊ី កំពុងបោកបក់បក្សស្តាំជាតិនិយមជ្រុល
វិបត្តិនយោបាយ កំពុងតែបោកបក់រដ្ឋាភិបាលចម្រុះអូទ្រីស ដែលកើតចេញពីការផ្សំគ្នា រវាងបក្សស្តាំអភិរក្សនិយម និងបក្សស្តាំជាតិនិយមជ្រុល។ រដ្ឋមន្ត្រីមកពីបក្សស្តាំជាតិនិយមជ្រុល អាចនឹងត្រូវបង្ខំចិត្ត លាចេញពីដំណែងទាំងអស់ បន្ទាប់ពីមេបក្សរបស់ខ្លួន ត្រូវជាប់ក្នុងរឿងអាស្រូវមួយដ៏ធ្ងន់ធ្ងរ។ ឯកសារវីដេអូលួចថតមួយ ទើបតែត្រូវបានបែកធ្លាយ ដែលក្នុងនោះ មេបក្សស្តាំជាតិនិយមជ្រុល បាននិយាយសន្យាថា នឹងបើកផ្លូវវិនិយោគ ឲ្យក្រុមហ៊ុនរុស្ស៊ី បើសិនជារុស្ស៊ីជួយជ្រោមជ្រែងបក្សខ្លួនឲ្យឈ្នះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
រដ្ឋាភិបាលចម្រុះអូទ្រីស ដែលផ្សំឡើង ដោយបក្សស្តាំអភិរក្សនិយម និងបក្សស្តាំជាតិនិយមជ្រុល ត្រូវចែកផ្លូវគ្នា បន្ទាប់ពីបានចាប់ដៃគ្នា បានជាងមួយឆ្នាំ។ លោក Sebastian Kurz អធិកាបតីអូទ្រីស បានប្រកាសថា នឹងរៀបចំការបោះឆ្នោតមុនអាណត្តិ នៅខែកញ្ញខាងមុខ។
ខ្យល់ព្យុះ បានចាប់ផ្តើមបោកបក់ នៅថ្ងៃទី១៧ ឧសភា បន្ទាប់ពីមានវីដេអូមួយបែកធ្លាយ។ វីដេអូ ដែលគេលួចថតបានដោយសម្ងាត់ នៅក្នុងផ្ទះវីឡាមួយ នៅលើកោះIbiza ប្រទេសអេស្ប៉ាញ គេឃើញរូបលោក Heinz-Christian Strache មេបក្សស្តាំជាតិនិយមជ្រុល និងជាអនុអធិកាបតីអូទ្រីស និយាយទៅកាន់ស្ត្រីម្នាក់ ដែលអះអាងថាខ្លួន ជាមនុស្ស ស្និទនឹងអ្នកមានអំណាចនៅរុស្ស៊ី។ មេបក្សជាតិនិយមជ្រុលអូទ្រីសរូបនេះ បានសន្យាជាមួយស្ត្រីនោះថា លោកនឹងធ្វើគ្រប់យ៉ាង ដើម្បីបើកផ្លូវឲ្យរុស្ស៊ីវាយលុក រកស៊ីនៅអូទ្រីស បើសិនជារុស្ស៊ីជួយជ្រោមជ្រែង បក្សរបស់លោកឲ្យឈ្នះឆ្នោត។ មិនត្រឹមតែប៉ុណ្ណោះ លោកម្នាក់នេះ បានលើកឡើងអំពី យុទ្ធសាស្ត្រវាយលុក និងគ្រប់គ្រងបណ្តាញផ្សព្វផ្សាយព័ត៌មាន ដោយយកគំរូដូចនៅហុងគ្រី។
សូមកត់សំគាល់ថា វីដេអូនេះ ប្រៀបបាននឹងដុំថ្មធ្លាក់ពីលើមេឃ មកសង្កត់ពីលើប្រព័ន្ធនយោបាយអូទ្រីស។ ភ្លាមៗ លោក Heinz-Christian Strache បានបង្ខំចិត្តលាលែងពីតំណែងអនុអធិកាបតី។ លោក Sebastian Kurz អធិកាបតីអូទ្រីស បានទាមទារ ឲ្យលោក Herbert Kickl រដ្ឋមន្ត្រីក្រសួងមហាផ្ទៃ និងដែលជាអនុប្រធានបក្សស្តាំជាតិនិយាមជ្រុល ត្រូវតែចុះចេញពីតំណែងដែរ ដើម្បីបើកផ្លូវ ឲ្យមានការស៊ើបអង្កេតលើរឿងរ៉ាវវីដេអូនេះ ឲ្យមានតម្លាភាព។ នៅថ្ងៃចន្ទ ទី២០ឧសភា បក្សស្តាំជាតិនិយមជ្រុល បានអះអាងថា បើរដ្ឋមន្ត្រីមហាផ្ទៃរបស់ខ្លួន ត្រូវគេដកចេញ នោះរដ្ឋមន្ត្រីទាំង៤ផ្សេងទៀតរបស់ខ្លួន ក៏នឹងដើរចេញដូចគ្នា។
គួររំលឹកថា ថ្ងៃអាទិត្យទី ២៦ឧសភា ខាងមុខនេះ គឺជាថ្ងៃបោះឆ្នោតជ្រើសរើសសមាជិកសភាអឺរ៉ុប។ ក្នុងចំណោមគណបក្សនយោបាយ គេសង្កេតឃើញចលនាស្តាំជាតិនិយមជ្រុល មានសន្ទុះកាន់តែខ្លាំង តាមរយៈការឃោសនា ស្តីពីបញ្ហាអសន្តិសុខ បញ្ហាអន្តោប្រវេសន៍ជាដើម។ នៅអ៊ីតាលី នៅបារាំង ឬនៅអាល្លឺម៉ង់ ក្រុមបក្សស្តាំជាតិនិយមជ្រុលនេះ ត្រូវបានគេសង្ស័យថា មានទំនាក់ទំនងជាមួយរុស្ស៊ី ហើយបានទទួលជំនួយ ជាគំនិតយុទ្ធសាស្ត្រ ពីលោក Steve Banon អតីតមនុស្សជំនិតរបស់លោកដូណាល់ ត្រាំ។
សម្រាប់អ្នកនយោបាយគាំទ្រអឺរ៉ុប ក្រុមបក្សស្តាំជាតិនិយមជ្រុលនេះ គឺជាគ្រោះថ្នាក់ធំដល់សាមគ្គីភាពរបស់អឺរ៉ុប ព្រោះក្រុមបក្សស្តាំនិយមជ្រុល មានទំនោរជាតិនិយម បិទទ្វារ ហើយបំផុសគំនិតមនុស្ស ឲ្យស្អប់គ្នាទៅវិញទៅមក។ លោកស្រីអង់ហ្គេឡា មែរគែល បានលើកឡើង ថា រឿងអាស្រូវវីដេអូ នៅអូទ្រីស គឺជាមេរៀនមួយ ប្រាប់ទៅអ្នកនយោបាយទាំងអស់ ឲ្យប្រុងប្រយត្ន័ កុំលក់ក្បាលឲ្យប្រទេសផ្សេង ដែលគេចង់បំផ្លាញអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ