អាល្លឺម៉ង់ថាស្ថានទូតកូរ៉េខាងជើងប្រចាំក្រុងប៊ែរឡាំង ជាកន្លែងឆ្លងកាត់សម្ភារៈផលិតអាវុធ
លោកនាយកការិយាល័យស៊ើបការណ៍សំងាត់ របស់អាល្លឺម៉ង់ បានប្រកាសនៅក្នុងបទសម្ភាសន៍តាមទូរទស្សន៍មួយថា ក្រុមការងារលោក បានរកឃើញថា កូរ៉េខាងជើង បានប្រើប្រាស់ អាគារស្ថានទូតខ្លួន ប្រចាំទីក្រុងប៊ែរឡាំង ជាទីកន្លែងឆ្លងកាត់ បញ្ជូនសម្ភារៈ និងបច្ចេកទេសនានា ដើម្បីប្រើប្រាស់ ក្នុងការផលិតអាវុធមីស៊ីល និងនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
“ក្រុមការងារយើង បានតាមដានដឹងថា សកម្មភាពចរចា ទិញ និងដោះដូរសម្ភារៈ ក៏ដូចជាបច្ចេកវិទ្យាយោធាចាំបាច់ យកទៅប្រើប្រាស់ ក្នុងការផលិតអាវុធមីស៊ីល រួមទាំងនុយក្លេអ៊ែរផងនោះ គឺបានប្រព្រឹត្តិធ្វើទៅ នៅក្នុងអាគារស្ថានទូត របស់កូរ៉េខាងជើង ប្រចាំទីក្រុងប៊ែរឡាំង”។ នេះគឺជាសម្តីអះអាង របស់លោក Hans-Georg Maassen នាយកការិយាល័យស៊ើបការណ៍សំងាត់ និងសន្តិសុខផ្ទៃក្នុង របស់អាល្លឺម៉ង់ នៅក្នុងសម្រង់បទយកការណ៍ ដែលបានផ្សាយតាមទូរទស្សន៍អាល្លឺម៉ង់ ARD កាលពីយប់ថ្ងៃសៅរ៍ទី ៣កុម្ភៈ។
ដោយមិនបង្ហើបឲ្យដឹង អំពីប្រភេទបច្ចេកវិទ្យា ណាឲ្យច្បាស់លាស់ មន្ត្រីអាល្លឺម៉ង់ខាងលើ គ្រាន់តែនបាននិយាយថា ជាបច្ចេកវិទ្យា ប្រើក្នុងវិស័យស៊ីវីលផង និងវិស័យយោធាផង ដែលកូរ៉េខាងជើង បានលួចលាក់សន្សំទុក។ លោកបន្តថា បន្ទាប់ពីកំណត់មុខសញ្ញានេះ អាជ្ញាធរអាល្លឺម៉ង់ បានបញ្ជារឲ្យស្ថានទូតកូរ៉េខាងជើង ត្រូវបញ្ឈប់សកម្មភាពទាំងអស់នេះ ជាបន្ទាន់។ ក៏ប៉ុន្តែលោកបានទទួលស្គាល់ថា ក្រុមស៊ើបការណ៍សំងាត់ មិនអាចធានាថា អាចតាមដានបានជាប់រហូត ហើយអាចដឹងនូវសកម្មភាពប៉ុនប៉ងថ្មីណាមួយផ្សេងទៀត បានជានិច្ចនោះទេ។
បើតាមខ្លឹមសារនៃបទយកការណ៍ ដែលនឹងត្រូវចាក់ផ្សាយទាំងស្រុង នៅថ្ងៃចន្ទស្អែកនេះ បានបង្ហាញថា ក្រុមស៊ើបការណ៍សំងាត់អាល្លឺម៉ង់ បានឈានទៅតាមដានដឹង អំពីសកម្មភាពរកស៊ីទាំងនេះ នៅរវាងឆ្នាំ២០១៦-២០១៧។ ហើយនៅឆ្នាំ២០១៤ ស្ថានទូតកូរ៉េខាងជើង បានទាំងព្យាយាមស្វែងរកទិញសម្ភារៈ និងធាតុផ្សំ យកទៅផលិតអាវុធគីមីទៀតផង។
គួរបញ្ជាក់ថា ការចោទប្រកាន់របស់អាជ្ញាធរអាល្លឺម៉ង់ នាពេលនេះ គឺធ្វើឡើងស្របពេល ជាមួយនឹងរបាយការណ៍មួយរបស់អង្គការសហប្រជាជាតិ ដែលបានស្រាវជ្រាវដឹងថា ក្នុងរវាងឆ្នាំ២០១៧ កូរ៉េខាងជើងបានលួចលាក់ រកស៊ីខុសច្បាប់ ជាមួយឈ្មួញ ដោយគេចចេញពីទណ្ឌកម្មអន្តរជាតិ ដែលគិតជាទឹកប្រាក់សរុប មិនតិចជាង២០០លានដុល្លារនោះទេ។ របាយការណ៍នេះ ក៏បានលើកឡើង ផងដែរអំពីគំរោងឃុបឃិតរកស៊ី បញ្ជូនកាំជ្រួចមីស៊ីលបាលីស្ទីក រវាងកូរ៉េខាងជើង ជាមួយប្រទេសមួយចំនួន នៅអាហ្វ្រិក នៅដើមបូព៌ា ដូចជាប្រទេសស៊ីរី នៅតំបន់អាស៊ីអាគ្នេយ៍ ដូចជាភូមាជាដើម។
អ្នកជំនាញបានលើកឡើងថា រាប់សិបឆ្នាំមកហើយ មន្ត្រីស្ថានទូត ក៏ដូចជាឯករដ្ឋទូតកូរ៉េខាងជើង ប្រចាំនៅតាមប្រទេសក្រៅនានា គឺជាគេញសម្ងាត់បំរើរបបផ្តាច់ការនេះ ហើយដែលមានតួនាទី ចរចា ទិញលក់សម្ភារៈយោធា បច្ចេកវិទ្យានានា និងប្រមូលប្រាក់បានមកពីជំនួញអាវុធខុសច្បាប់ យកទៅចិញ្ចឹម របបផ្តាច់ការកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ