អឺរ៉ុបទាមទារឲ្យសមាជិក បន្តលុបបំបាត់ឋានសួគ៌ពន្ធដារ ខណៈប្រទេសម៉ាល់ត៍ សំណូមពរឲ្យបន្ថយល្បឿន
កាលពីថ្ងៃសៅរ៍ទី ៨មេសា រដ្ឋមន្ត្រីក្រសួងហិរញ្ញវត្ថុនៃប្រទេសសមាជិកសហភាពអឺរ៉ុប បានជួបប្រជុំគ្នានៅប្រទេសម៉ាល់ត៍ ក្នុងប្រធានបទទប់ស្កាត់ឋានសួគ៌ពន្ធដារ និងការគេចពន្ធរបស់សហគ្រាសធំៗ។ ស្របពេលដែលគណកម្មការអឺរ៉ុប ជម្រុញឲ្យប្រទេសសមាជិកទាំងអស់ ខិតខំធ្វើកំណែទម្រង់ ដើម្បីលប់បំបាត់ឋានសួគ៌ពន្ធដារនេះ ប្រទេសម៉ាល់ត៍ បែរជាស្នើឲ្យមានការបន្ថយល្បឿន កុំឲ្យធ្វើវាជ្រុលហួសហេតុ ព្រោះវានឹងជះឥទ្ធិពលអាក្រក់ទៅលើក្រុមហ៊ុននានា ព្រមទាំងសេដ្ឋកិច្ចសហភាពអឺរ៉ុបទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ឋានសួគ៌ពន្ធដារ រឺការគេចវេសមិនបង់ពន្ធ បង្វិលប្រាក់ចំណេញទៅកាន់ទីកន្លែងផ្សេង ដែលមានអត្រាពន្ធទាប គឺជាបញ្ហាដែលសហភាពអឺរ៉ុប បានជួបប្រទះជាយូរឆ្នាំមកហើយ។ បញ្ហានេះ បានធ្វើឲ្យចំណូលរដ្ឋធ្លាក់ចុះ ហើយក៏ធ្វើឲ្យប្រជាជនទូទៅ អស់សង្ឃឹមបាត់បង់ជំនឿចិត្ត ដោយសារតែឃើញក្រុមហ៊ុនសហគ្រាសធំៗ កើបប្រាក់ចំណេញក្នុងប្រទេសខ្លួន ហើយទៅបង់ពន្ធបន្តិចបន្តួច នៅឯប្រទេសផ្សេងទៅវិញ។
ក្រោយផ្ទុះរឿងអាស្រូវ Panama Papers ដែលធ្វើឲ្យបែកធ្លាយបញ្ជីឈ្មោះក្រុមហ៊ុនខ្មោចជាច្រើន ដែលត្រូវបានបង្កើតឡើង មានតែឈ្មោះ ដើម្បីគេចចេញពីការបង់ពន្ធរដ្ឋនោះ សហភាពអឺរ៉ុប បានចាប់ផ្តើមជម្រុញប្រទេសសមាជិកខ្លួន ឲ្យប្រឹងប្រែងលប់បំបាត់បញ្ហានេះ ដើម្បីតម្លាភាព និងសមភាពក្នុងវិស័យពន្ធដារ។
បញ្ហានេះ គឺជាកម្មវត្ថុនៃកិច្ចប្រជុំរដ្ឋមន្ត្រីក្រសួងហិរញ្ញវត្ថុ នៃប្រទេសសមាជិកសហភាពអឺរ៉ុប កាលពីថ្ងៃសៅរ៍ទី៨មេសា នៅប្រទេសម៉ាល់ត៍។ លោក Pierre Moscovici អ្នកទទួលបន្ទុកកិច្ចការសេដ្ឋកិច្ចនៃគណកម្មការអឺរ៉ុប បានលើកឡើងថា ប្រទេសសមាជិកសហភាពអឺរ៉ុប ត្រូវតែប្រឹងប្រែងបន្តទៀត ក្នុងការធ្វើកំណែទម្រង់ ក្នុងវិស័យពន្ធដាររៀងៗខ្លួន ដើម្បីទប់ស្កាត់សកម្មភាពគេចមិនបង់ពន្ធ ព្រមទាំងបញ្ចប់ការប្រកួតប្រជែងដោយមិនស្មើភាពរវាងប្រទេសសមាជិកដូចគ្នា ក្នុងវិស័យពន្ធដារ។
ផ្ទុយទៅវិញ ប្រទេសម៉ាល់ត៍ អ្នកទទួលបន្ទុករៀបចំកិច្ចប្រជុំ បែរជាស្នើសុំតាមរយៈឯកសារកំរាស់៧ទំព័ររបស់ខ្លួនថា សហភាពអឺរ៉ុប ត្រូវតែបន្ថយល្បឿន មិនត្រូវធ្វើបាបក្រុមហ៊ុនសហគ្រាសធំៗ ច្រើនជ្រុលពេកទេ ព្រោះវានឹងជះឥទ្ធិពលអាក្រក់ទៅលើវិស័យវិនិយោគ និងពាណិជ្ជកម្ម របស់សហភាពអឺរ៉ុប។
សំណើរនេះ ត្រូវបានទទួលការគាំទ្រ ពីរដ្ឋមន្ត្រីហិរញ្ញវត្ថុប៊ែលហ្ស៊ិក និងលុយហ្សំបួរផងដែរ ដោយប្រទេសទាំងនេះលើកឡើងថា សហភាពអឺរ៉ុបត្រូវតែបន្ថយល្បឿន ក្នុងការធ្វើកំណែទម្រង់លើវិស័យពន្ធដារនេះ ព្រោះ ប្រទេសដ៏ទៃនៅតំបន់អាស៊ី រឺអាមេរិក គេអាចអូសទាញយកផលចំណេញទៅអស់។
គួររំលឹកដែរថា ប្រទេសដូចជាម៉ាល់ត៍ អៀរឡង់ រឺក៏លុចហ្សំបួរនេះហើយ ដែលល្បីជាងគេថា ជាឋានសួគ៌ពន្ធដារ ព្រោះប្រទេសទាំងនេះ បានធ្វើការអូសទាញក្រុមហ៊ុនសហគ្រាសធំៗ ឲ្យបង្វិលប្រាក់ចំណេញ ទៅចុះបញ្ជីរនៅប្រទេសខ្លួន ព្រោះមានពន្ធលើប្រាក់ចំណេញ ទាបជាងប្រទេសដ៏ទៃ។ ក្រុមហ៊ុនធំៗជាច្រើន ដូចជាក្រុមហ៊ុន Apple Amazon McDonald’s និង Starbucks ជាដើម កំពុងតែស្ថិតនៅក្រោមការតាមដានស៊ើបអង្កេត ថាបានរៀបចំបន្លំបង្វិលប្រាក់ចំណេញ ទៅកាន់ប្រទេសឋានសួគ៌ពន្ធដារនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ