សហភាពអឺរ៉ុបទាត់ចោលការរិះគន់របស់អាមេរិក ដែលថាអឺរ៉ុបធ្វើបាបក្រុមហ៊ុនអាមេរិករឿងពន្ធដារ
មីៗនេះ ក្រសួងហិរញ្ញវត្ថុអាមេរិក បានរិះគន់ដោយចំៗ ទៅលើសហភាពអឺរ៉ុប ជុំវិញចំណាត់ការផ្លូវច្បាប់របស់អឺរ៉ុប ទាក់ទិននឹងវិវាទពន្ធដារ ជាមួយនឹងក្រុមហ៊ុនធំៗរបស់អាមេរិក ដូចជាក្រុមហ៊ុនApple និងក្រុមហ៊ុន Mc Donald ជាដើម។ នៅថ្ងៃទី២៥ សីហា គណកម្មការអឺរ៉ុប បានធ្វើការឆ្លើយតបទៅវិញ ដោយបានទាត់ចោលការរិះគន់នេះ ហើយបានបញ្ជាក់ថា សហភាពអឺរ៉ុបអនុវត្តច្បាប់ដោយស្មើភាពគ្នា ទៅលើក្រុមហ៊ុនទាំងអស់ មិនមែនតែក្រុមហ៊ុនអាមេរិកមួយទេ ហើយច្បាប់នោះមានជាធរមានយូរយាណាស់មកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
នៅក្នុងរបាយការណ៍របស់ក្រសួងហិរញ្ញវត្ថុសហរដ្ឋអាមេរិក ដែលបានចេញកាលពីថ្ងៃពុធទី ២៤សីហា បានធ្វើការរិះគន់ ដោយចំហរទៅលើសហភាពអឺរ៉ុប ថាបានប្រើច្បាប់ដើម្បីធ្វើបាបក្រុមហ៊ុនធំៗរបស់អាមេរិកមួយចំនួន ដែលកំពុងតែរកស៊ីនៅក្នុងសហភាពអឺរ៉ុប។ ក្នុងរបាយការណ៍នេះ ក្រសួងហិរញ្ញវត្ថុអាមេរិក បានសំដែងការព្រួយបារម្ភស្តីពីចំណាត់ការផ្លូវច្បាប់ផ្សេងៗ របស់សហភាពអឺរ៉ុប ដែលសហរដ្ឋអាមេរិកយល់ថា វាបានឃ្លាតឆ្ងាយពីនីតិវិធីពន្ធដារអន្តរជាតិ ហើយជាពិសេសគឺវាជ្រុលហួសហេតុទៅលើក្រុមហ៊ុនអាមេរិក។
ក្រសួងហិរញ្ញវត្ថុអាមេរិក ក៏បានរិះគន់ផងដែរថា ការដែលសហភាពអឺរ៉ុប ទាមទារឲ្យក្រុមហ៊ុនអាមេរិក ដែលខ្លួនយល់ថាមានកំហុស ឲ្យបង់ពន្ធបកថយក្រោយ ចំពោះឆ្នាំកន្លងទៅវិញនោះ គឺជារឿងមិនគប្បីទេ ព្រោះវាបានបង្កជាបញ្ហាដល់គណនីពន្ធរបស់ក្រុមហ៊ុន និងរបស់ប្រទេសពាក់ព័ន្ធ។ យ៉ាងណាមិញកាលពីខែកុម្ភៈកន្លងទៅ លោកJack Lew រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិក ធ្លាប់បានសរសេរលិខិតមួយរួចមកហើយ ផ្ញើរមកកាន់លោក Jean-Claude-Juncker ប្រធានគណកម្មការអឺរ៉ុប ទាក់ទិននឹងបញ្ហានេះ។
ជាការឆ្លើយតបទៅវិញ គណកម្មការនៃសហភាពអឺរ៉ុប បានទាត់ចោលរាល់ពាក្យរិះគន់ទាំងនោះ ហើយបានបញ្ជាក់ថា សហភាពអឺរ៉ុបចាត់ទុកក្រុមហ៊ុនទាំងអស់ដោយស្មើភាពគ្នា ទោះក្រុមហ៊ុននោះមកពីប្រទេសណាក៏ដោយ។ ច្បាប់របស់សហភាពអឺរ៉ុប គឺអនុវត្តទៅលើក្រុមហ៊ុនទាំងអស់ ដោយឥតរើសមុខ ដែលរកស៊ីប្រមូលប្រាក់ចំណេញនៅក្នុងទឹកដីរបស់សហភាពអឺរ៉ុប។
អ្នកនាំពាក្យគណកម្មការអឺរ៉ុបបានបន្ថែមថា វាគឺជារឿងពិតឥតប្រកែកបាន បើយើងក្រលេកមកមើលសកម្មភាពរបស់សហភាពអឺរ៉ុបកន្លងមក។ ចំណាត់ការនានា ដែលសហភាពអឺរ៉ុបបានដាក់ចេញ ដើម្បីដាក់ពិន័យប្រទេសសមាជិកខ្លួន ដែលបានឃុបឃិតកេងចំណេញប្រាក់ពន្ធ គឺបានធ្វើឡើងដោយឥតរើសមុខ មិនថាក្រុមហ៊ុននោះជាក្រុមហ៊ុនអឺរ៉ុប រឺក្រុមហ៊ុនបរទេសទេ។ ច្បាប់សហភាពអឺរ៉ុប បានហាមឃាត់ប្រទេសសមាជិកទាំងអស់ មិនឲ្យធ្វើសម្បទានពិសេសផ្នែកពន្ធដា ទៅឲ្យក្រុមហ៊ុនណាទាំងអស់ ហើយច្បាប់ទាំងនោះមានជាយូរយាណាស់មកហើយ។
សូមបញ្ជាក់ថា ក្រុមហ៊ុនធំៗរបស់អាមេរិកដូចជា ក្រុមហ៊ុនAppleនិងក្រុមហ៊ុន Mc.Donald ជាដើម ត្រូវបានសហភាពអឺរ៉ុបសង្ស័យថា បានរៀបចំបន្លំតួលេខ ប្រាក់ចំណូលដែលរកបាន ដើម្បីគេចវេស មិនបង់ពន្ធនៅក្នុងសហភាពអឺរ៉ុប។ កាលពីឆ្នាំ២០១៤ គណកម្មការអឺរ៉ុប បានចោទប្រកាន់ប្រទេសអៀរឡង់ ថាបានជួយបន្លប់លាក់ប្រាក់ចំណូលរាប់ពាន់លានដុល្លាររបស់ក្រុមហ៊ុនApple នៅតាមសាខានានារបស់ក្រុមហ៊ុននេះ ក្នុងប្រទេសអៀរឡង់ ជាថ្នូរនឹងការសន្យារក្សាចំនួនបុគ្គលិគបំពេញការងារនៅអៀរឡង់។ ហើយចាប់ពីខែធ្នូ២០១៥មក សហភាពអឺរ៉ុបកំពុងស៊ើបអង្កេត ពីកិច្ចព្រមព្រៀងពន្ធដាររវាងក្រុមហ៊ុន Mc.Donald ជាមួយនឹងប្រទេសលុចហ្សំបួរ ដែលអាចមានភាពមិនប្រក្រតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ