លោកស្រីមែរគែល អំពាវនាវឲ្យប្រជាជនអាល្លឺម៉ង់ ងើបឡើងប្រឆាំងនឹងគំនិតស្អប់សាសន៍ដទៃ
លោកស្រីអង់ហ្គេឡា មែរគែល ប្រមុខរដ្ឋាភិបាលអាល្លឺម៉ង់ បានចេញមុខអំពាវនាវ ឲ្យប្រជាជនអាល្លឺម៉ង់ទាំងអស់ ត្រូវងើបឡើង រួមគ្នាពុះពារ តទល់នឹងចរន្តគំនិតស្អប់ជាតិសាសន៍ដ៍ទៃ ដែលក្រុមគណបក្សស្តាំនិយមជ្រុលអាល្លឺម៉ង់ កំពុងតែធ្វើសកម្មភាពពន្យុះបំផុសបំផុល។ ការអំពាវនាវ របស់លោកស្រីមែរគែលនេះ គឺធ្វើឡើង បន្ទាប់ពីក្រុមគណបក្សស្តាំនិយមជ្រុលនេះ បានរៀបចំប្រមូលមនុស្សធ្វើបាតុកម្ម ដើម្បីប្រឆាំង បណ្តេញជនភៀសខ្លួន កាលពីថ្ងៃសៅរ៍ចុងសប្តាហ៍មុននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ប្រជាជនអាល្លឺម៉ង់ មិនត្រូវការជាដាច់ខាត នូវគំនិតស្អប់ខ្ពើមជាតិសាសន៍ដ៏ទៃ។ គ្រប់គ្នាត្រូវតែរួមគ្នា ដើម្បីបង្ហាញពីការចូលរួមប្រឆាំង នឹងសកម្មភាពញុះញង់ ពន្យុះឲ្យមនុស្សស្អប់គ្នា ដែលក្រុមស្តាំនិយមជ្រុល កំពុងតែធ្វើ ក្នុងពេលបច្ចុប្បន្ននេះ។ នេះគឺជាខ្លឹមសារ នៃការថ្លែងរបស់លោកស្រីមែរគែល ប្រមុខរដ្ឋាភិបាលអាល្លឺម៉ង់ កាលពីថ្ងៃចន្ទទី៣កញ្ញា។ ការថ្លែងនេះ គឺជាប្រតិកម្មតបទៅនឹង ការធ្វើបាតុកម្មប្រឆាំងជនភៀសខ្លួន កាលពីថ្ងៃសៅរ៍ទី ១កញ្ញា ដែលរៀបចំឡើង ដោយក្រុមគណបក្សស្តាំនិយមជ្រុល AfD។
លោក Steffen Seibert អ្នកនាំពាក្យរដ្ឋាភិបាលអាល្លឺម៉ង់ ក៏បានមានប្រតិកម្មផងដែរ ថាក្បួនបាតុកម្មជួបជុំ ដែលដឹកនាំដោយពួកស្តាំនិយមជ្រុល និងក្រុមណាហ្ស៊ីជំនាន់ថ្មី កាលពីថ្ងៃសៅរ៍កន្លងមកនេះ គឺជាក្បួនបាតុកម្ម ដែលពោរពេញ ដោយសារស្អប់ខ្ពើមមនុស្សដូចគ្នា និងញុះញង់ឲ្យមនុស្សស្អប់គ្នា ឲ្យប្រជាជនអាល្លឺម៉ង់បែកបាក់គ្នា។ លោកបន្ថែមថា ប្រជាជនអាល្លឺម៉ង់ គ្រប់រូប ត្រូវតែចូលរួមផ្ញើសារតបទៅវិញ ដើម្បីប្រាប់ទៅជនជ្រុលនិយមទាំងនោះ ឲ្យដឹងថាអាល្លឺម៉ង់ជាប្រទេសមានសមធម៌ មានការអត់ឱន ហើយមិនត្រូវការគំនិតអន់ថយទាំងនោះទេ។
សូមរំលឹកថា កាលពីថ្ងៃសៅរ៍ទី១កញ្ញា នៅទីក្រុង Chemnitz ភាគខាតកើតអាល្លឺម៉ង់ មានបាតុកម្មមួយបានរៀបចំឡើង ដោយក្រុមបក្សស្តាំនិយមជ្រុល AfD ដោយមានមនុស្សចូលរួមប្រមាណ៨០០០នាក់។ កម្មវត្ថុនៃបាតុកម្មនេះ គឺដើម្បីរំលឹកវិញ្ញាណក្ខន្ធបុរសជនជាតិអាល្លឺម៉ង់ម្នាក់ ដែលត្រូវគេសម្លាប់ ចាក់ដោយកាំបិត កាលពីថ្ងៃទី២៦ ខែសីហា។ ជនសង្ស័យ២នាក់ ត្រូវបានចាប់ខ្លួន ដោយម្នាក់ជាជនភៀសខ្លួនជនជាតិអ៊ីរ៉ាក់ និងម្នាក់ទៀតជនជាតិស៊ីរី។ ក្រោយដំណឹងឃាតកម្មនេះ ក្រុមគណបក្សស្តាំនិយមជ្រុល រួមជាមួយនឹងក្រុមណាហ្ស៊ីជំនាន់ថ្មី បានអំពាវនាវ ឲ្យមានបាតុកម្មបណ្តេញជនភៀសខ្លួនទាំងអស់ចេញពីអាល្លឺម៉ង់។
ប្រជាជនអាល្លឺម៉ង់ដែលប្រឆាំងនឹងការអំពាវនាវប្រកាន់ពូជសាសន៍នេះ ក៏បានធ្វើបាតុកម្មកាលពីថ្ងៃសៅរ៍ដែរ នៅឯក្រុង Chemnitz។ ការប៉ះទង្គិចគ្នា ប្រឈមមុខដាក់គ្នា រវាងក្រុមបាតុកម្មទាំងសងខាង បានបង្ក ឲ្យមានមនុស្សរបួសយ៉ាងហោច២០នាក់។ ដោយឡែក នៅថ្ងៃចន្ទ ទី៣កញ្ញា នៅទីលានកណ្តាលក្រុង មានការប្រគុំតន្ត្រីមួយ ដើម្បីផ្ញើសារពីការអត់ឱន មិនប្រកាន់ពូជសាសន៍។ ចំណែកនៅលើបណ្តាញសង្គម ក៏មានការអំពាវនាវ ឲ្យប្រជាជនបើកចំហបង្អួច ចូលរួមបង្ហាញសារនានា សំដៅប្រឆាំងនឹងគំនិតស្អប់ខ្ពើមជនបរទេស ដែលក្រុមស្តាំនិយមជ្រុល កំពុងតែដុតបញ្ឆេះសង្គមអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ