គណកម្មការអឺរ៉ុបបើកនីតិវិធីបទល្មើស ទល់នឹងប្រទេសប៉ូឡូញ
នៅថ្ងៃសៅរ៍ទី ២៩កក្កដា គណកម្មការអឺរ៉ុប បានបើកនីតិវិធី ប្រឆាំងនឹងប្រទេសប៉ូឡូញ ដែលបានធ្វើបំពានទៅនឹងគោលការណ៍គ្រិះ នៃច្បាប់សហភាពអឺរ៉ុប។ ការបើកនីតិវិធី ដើម្បីដាក់ពិន័យប៉ូឡូញនេះ គឺនៅក្រោយពេលដែលសភាប៉ូឡូញ បានធ្វើច្បាប់ថ្មី ផ្ទួនៗគ្នា ដែលសហភាពអឺរ៉ុប យល់ថា ច្បាប់ទាំងនោះមានខ្លឹមសារ ប៉ះពាល់ ដល់ឯករាជ្យភាពរបស់ប្រព័ន្ធតុលាការប៉ូឡូញ និងមានការរើសអើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ចាប់ពីពេលនេះទៅ រដ្ឋាភិបាលប៉ូឡូញ មានពេល១ខែ ដើម្បីចាត់វិធានការ ឆ្លើយតបទៅនឹងការទាមទាររបស់គណកម្មការអឺរ៉ុប។ ពុំនោះទេគណកម្មការអឺរ៉ុប នឹងដាក់ពាក្យប្តឹងប៉ូឡូញ នៅចំពោះមុខតុលាការយុត្តិធម៌អឺរ៉ុប។
គណកម្មការអឺរ៉ុប ដែលបានបើកនីតិវិធីបទល្មើសនេះ បានលើកឡើងថា ប៉ូឡូញ បានបំពានគោលការណ៍គ្រិះនៃសហភាពអឺរ៉ុប ដោយបានអនុម័តច្បាប់មួយ ស្តីពីការគ្រប់គ្រងចាត់ចែង តុលាការ។ យោងតាមខ្លឹមសារច្បាប់នេះ រដ្ឋមន្ត្រីក្រសួងយុត្តិធម៌ប៉ូឡូញ នឹងមានសិទ្ធិ សម្រេចបន្តតំណែងរបស់ចៅក្រម បើទោះបីជាដល់អាយុចូលនិវត្តន៍ក៏ដោយ។ រដ្ឋមន្ត្រីនេះ ក៏អាចមានសិទ្ធិតែងតាំង ឬដកហូតតំណែងចៅក្រមប្រធានតុលាការ ដោយឆន្ទានុសិទ្ធិទៀតផង។
ចំណុចមួយទៀត គឺច្បាប់នេះ បានកំណត់អាយុចូលនិវត្តន៍មុនពេលកំណត់ ខុសគ្នា រវាងចៅក្រមភេទប្រុស និងចៅក្រមភេទស្រី។ ចៅក្រមភេទប្រុស អាចធ្វើការដល់អាយុ៦៥ឆ្នាំ តែចៅក្រមភេទស្រី ត្រឹមតែ៦០ឆ្នាំ។ ចំណុចនេះ គឺជាការរើសអើស ដែលផ្ទុយស្រលៈពីច្បាប់របស់សហភាពអឺរ៉ុប។
សូមបញ្ជាក់ថា សភាប៉ូឡូញ ដែលគ្រប់គ្រងដោយគណបក្សអភិរក្សនិយមជ្រុល (PiS) បានអនុម័តច្បាប់ចំនួនបី ស្តីពីការគ្រប់គ្រងប្រព័ន្ធយុត្តិធម៌។ ប៉ុន្តែដោយមានការធ្វើបាតុកម្មតវ៉ា ពីសំណាក់ ប្រជាជន យ៉ាងសកម្ម អស់រយៈពេលមួយសប្តាហ៍កន្លងទៅនេះ ប្រធានាធិបតីប៉ូឡូញ បានចុះហត្ថលេខាអនុម័តយល់ព្រម តែទៅលើច្បាប់តែមួយប៉ុណ្ណោះ។ ឯច្បាប់ពីរទៀត ប្រធានាធិបតីបានប្រើសិទ្ធិវេតូ។
ច្បាប់ទាំងពីរនោះ ទីមួយ គឺជាច្បាប់ដែលអនុញ្ញាតឲ្យរដ្ឋាភិបាល អាចគ្រប់គ្រង និងប្រើឥទ្ធិពល ទៅលើតុលាការកំពូលប៉ូឡូញ។ ហើយច្បាប់ទីពីរ គឺអនុញ្ញាតឲ្យសភា អាចតែងតាំងសមាជិកនៃក្រុមប្រឹក្សាអង្គចៅក្រម។
ការដែល ប្រធានាធិបតីប៉ូឡូញ បានប្រើសិទ្ធិវេតូ បដិសេធច្បាប់ដ៏ចំរូងចំរាសទាំងពីរនេះ ត្រូវបានប្រជាជនប៉ូឡូញ ក៏ដូចជាសហភាពអឺរ៉ុបអបអរយ៉ាងខ្លាំង។ តែយ៉ាងណា វានៅមិនគ្រប់គ្រាន់ទេ ព្រោះថាច្បាប់ដែលមានខ្លឹមសាររើសអើង និងបំពានលើភាពឯករាជ្យ របស់តុលាការមួយទៀត ត្រូវបានអនុម័ត។
គណកម្មការអឺរ៉ុប ថែមទាំងបានគំរាមថា បើសិនជាប៉ូឡូញ នៅតែបន្ត បំពានលើគោលការណ៍គ្រិះនៃការបែងចែកអំណាច ព្រមទាំងគោលការណ៍ច្បាប់ របស់សហភាពអឺរ៉ុបតទៅទៀត នោះគេនឹងបើកនីតិវិធីពិសេស ដោយយោងទៅតាមមាត្រា ៧ នៃសន្ធិសញ្ញាសហភាពអឺរ៉ុប ដើម្បីព្យួរសិទ្ធិបោះឆ្នោតរបស់ប៉ូឡូញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ