បារាំងនិងអាល្លឺម៉ង់ បើកកិច្ចប្រជុំគណៈរដ្ឋមន្ត្រីរួមគ្នា លើកទីមួយ
ថ្ងៃព្រហស្បតិ៍ទី១៣ កក្កដា នេះ គឺជាថ្ងៃមមាញឹកបំផុត សម្រាប់លោកប្រធានាធីបតីវ័យក្មេងបារាំង ព្រោះក្រៅពីត្រូវទទួលជួបលោក ដូណាល់ ត្រាំនៅពេលរសៀល លោកម៉ាក្រុង ត្រូវដឹកនាំកិច្ចប្រជុំគណៈរដ្ឋមន្ត្រីរួមគ្នា បារាំង-អាល្លឺម៉ង់ ជាមួយលោកស្រីអង់ហ្គេឡា មែរគែល។ ដូចអ្វីដែលលោកប្រធានាធិបតីម៉ាក្រុង បានសន្យា រដ្ឋាភិបាលបារាំង និងអាល្លឺម៉ង់ បានបើកកិច្ចប្រជុំគណរដ្ឋមន្ត្រីរួមគ្នានេះ ជាលើកទីមួយ នៅទីក្រុងប៉ារីស។ កម្មវត្ថុនៃការប្រជុំរួមគ្នា រវាងរដ្ឋាភិបាលបារាំង និងអាល្លឺម៉ង់នេះ គឺដើម្បីស្វែងយល់ពីគ្នា និងធ្វើការរួមគ្នា ឲ្យមានប្រសិទ្ធិភាព ដើម្បីធ្វើកំណែទម្រង់ ជំរុញសហភាពអឺរ៉ុប ឲ្យមានសន្ទុះឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
លោកស្រីអង់ហ្គេឡា មែរគែល បានមកដល់ប៉ារីស ដើម្បីជួបនិយាយគ្នា មួយទល់មួយជាមួយលោកអេម៉ានុយអែល ម៉ាក្រុង នៅវេលាម៉ោង៩ព្រឹក។ បន្ទាប់មកទៀត អ្នកទាំងពីរ នឹងដឹកនាំ ការប្រជុំពិសេសរួមគ្នា ស្តីពីបញ្ហាសន្តិសុខ និងភេរវកម្ម ដោយមានការចូលរួម ពីរដ្ឋមន្ត្រីការបរទេស រដ្ឋមន្ត្រីមហាផ្ទៃ និងរដ្ឋមន្ត្រីការពារជាតិ នៃប្រទេសទាំងពីរ។
បន្ទាប់មកទៀត លោកស្រីមែរគែល និងលោកម៉ាក្រុង នឹងជួបពិភាក្សាជាមួយ លោកនាយករដ្ឋមន្ត្រីបារាំង។ ស្របពេលនោះដែរ រដ្ឋមន្ត្រីបារាំង និងអាល្លឺម៉ង់ គ្រប់ក្រសួង នឹងជួបគ្នាដាច់ដោយឡែកៗ ទៅតាមជំនាញវិស័យរៀងៗខ្លួន។ បន្ទាប់ពីបាយថ្ងៃជុំគ្នារួច លោកស្រី មែរគែល និងលោកម៉ាក្រុង នឹងធ្វើសន្និសីទកាសែត រួមគ្នា។
គួរបញ្ជាក់ថា លោក ម៉ាក្រុង ដែលជាអ្នកផ្តើមគំនិត នៃកិច្ចប្រជុំនេះ បានលើកឡើង ថា អាល្លឺម៉ង់ ក្នុងនាមជាប្រទេស ដែលទទួលបានផលវិជ្ជមានច្រើនជាងគេ ក្នុងសហភាពអឺរ៉ុប ត្រូវតែជួយជ្រោមជ្រែង ផ្តល់សន្ទុះសេដ្ឋកិច្ច ការវិនិយោគ មិនថាក្នុងវិស័យសាធារណៈ ឬឯកជន ទូទាំងសហភាពអឺរ៉ុប។ បន្ថែមពីនេះ អាល្លឺម៉ង់ ត្រូវតែចូលរួម ធ្វើកំណែទម្រង់ លប់បំបាត់នូវកង្វះខាតនានា ដែលចោទឡើងក្នុងវិស័យសេដ្ឋកិច្ចអឺរ៉ុប ព្រោះថាមានតែអាល្លឺម៉ង់ទេដែលទទួលផល កើតចេញពីកង្វះខាតនេះ ខណៈដែលប្រទេសសមាជិកដ៏ទៃ មានសេដ្ឋកិច្ចទន់ខ្សោយជាងអាល្លឺម៉ង់។
ទាក់ទងទៅនឹងការធ្វើកំណែទម្រង់ ក្នុងតំបន់ចាយប្រាក់អឺរ៉ូ លោកម៉ាក្រុង មានបំណងបង្កើតឲ្យមានកញ្ចប់ថវិការរួមមួយ ព្រមជាមួយនឹង យន្តការត្រួតពិនិត្យ តាមបែបប្រជាធិបតេយ្យ។ លោកម៉ាក្រុង ក៏ធ្លាប់បានលើកឡើងអំពី ការបង្កើតឲ្យមាន រដ្ឋមន្ត្រីហិរញ្ញវត្ថុម្នាក់ សម្រាប់តំបន់ចាយប្រាក់អឺរ៉ូ។
សម្រាប់ភាគី អាល្លឺម៉ង់វិញ ការប្រជុំគណៈរដ្ឋមន្ត្រីរួមគ្នា លើកទីមួយនេះ គឺជាឱកាស ឲ្យរដ្ឋាភិបាលអាល្លឺម៉ង់ អាចស្ទង់ចិត្ត និងគោលបំណងរបស់រដ្ឋាភិបាលបារាំង។ លោកស្រី អង់ហ្គេឡា មែរគែល បានបញ្ជាក់ប្រាប់ថា លោកស្រី ចង់ដឹងឲ្យបានស៊ីជំរៅ ថារដ្ឋមន្ត្រីហិរញ្ញវត្ថុតំបន់ចាយប្រាក់អឺរ៉ូ ដែលលោកម៉ាក្រុងចង់បាននោះ នឹងត្រូវធ្វើការររបៀបណា មានតួនាទីអ្វីខ្លះ មិនថាក្នុងក្របខណ្ឌជាតិ ឬក្របខណ្ឌអឺរ៉ុប។ ដោយឡែក លោកស្រី ប្រមុខរដ្ឋាភិបាលអាល្លឺម៉ង់ ធ្លាប់បានលើកឡើងពីបំណង ធ្វើឲ្យមានការកែតម្រូវ លើវិធាននានា ក្នុងវិស័យពន្ធដារ ឲ្យបានប្រហាក់ប្រហែលគ្នា រវាងបារាំង និងអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ