ប្រធានាធិបតីម៉ាក្រុង ទទួលលោកពូទីន នៅវាំងវ៉ែកសៃ ដើម្បីនិយាយគ្នាឲ្យអស់ពីចិត្ត
ចុះផ្សាយនៅថ្ងៃ៖
ស្តាប់ - ០៧:១៤
បន្ទាប់ពីបាន ចាប់រលាក់ដៃយ៉ាងណែន ជាមួយនឹងលោកដូណាល់ ត្រាំ កាលពីចុងសប្តាហ៍កន្លងទៅ លោកប្រធានាធិបតីថ្មីវ័យក្មេងរបស់បារាំង នឹងត្រូវទទួលជួបលោកប្រធានាធិបតីរុស្ស៊ី វ្លាឌីមៀរ ពូទីន នៅរាជវាំងវ៉ែកសៃ ក្បែរក្រុងប៉ារីស ថ្ងៃចន្ទ ទី២៩ឧសភានេះ។ នេះគឺជាជំនួបដ៏សំខាន់បំផុត ដែលមេដឹកនាំទាំងពីរ បានសន្យាថា នឹងនិយាយគ្នាត្រង់ទៅត្រង់មក ដើម្បីរកច្រកចេញ បិទបញ្ចប់ការមិនទុកចិត្តគ្នា ដែលមានក្នុងពេលកន្លងមក រវាងមហាអំណាចទាំងពីរនេះ។ សំណុំរឿងវិបត្តិនៅស៊ីរី និងវិបត្តិអ៊ុយក្រែន ដែលជាចំណុចស្នូល នៃការមិនចុះសម្រុងគ្នានេះ នឹងត្រូវលើកយកមកនិយាយ នាពេលនេះ។
រាជវាំងវ៉ែកសៃ និម្មិតរូបនៃឥទ្ធពលអាណាចក្របារាំង
តាមពិតទៅ លោកប្រធានាធិបតីពូទីន អញ្ជើញមកបារាំង ក្នុងគោលបំណង មកបើកសម្ភោធពិព័ណ៌ផ្ទាំងគំនូរ ដែលឧទ្ទិស និងរំលឹកខួបគំរប់៣សតវត្ស នៃការមកដល់លើកតំបូង លើទឹកដីបារាំង នៃព្រះចៅត្សារ របស់រុស្ស៊ីកាលជំនាន់នោះ គឺព្រះចៅ Pierre Le Grand។ គឺនៅព្រះរាជវាំង វ៉ែកសៃ របស់បារាំងនេះហើយ ដែលស្តេចត្សារ របស់រុស្ស៊ី ត្រូវបានស្តេចបារាំង ទទួលកាលពីឆ្នាំ ១៧១៧ ហើយទំនាក់ទំនងការទូតរវាង បារាំង និងអាណាចក្ររុស្ស៊ី បានចាប់ផ្តើម កសាងកាលពីជំនាន់នោះ។
ពិធីតាំងពិព័ណ៌នេះ គ្រាន់តែជាលេស ដើម្បីអនុញ្ញាត ឲ្យលោកប្រធានាធិបតីរុស្ស៊ី បានជួបជាមួយនឹងប្រធានាធិបតីថ្មីបារាំងប៉ុណ្ណោះ។ យោងតាមការប្រកាស មេដឹកនាំទាំងពីរ នឹងជួបគ្នាដើម្បីពិសារបាយថ្ងៃត្រង់ មួយទល់នឹងមួយ បន្ទាប់មកនឹងធ្វើសន្និសិទកាសែតរួមគ្នា នៅប្រាសាទ Le Grand Trianon ជាទីដែលមានរៀបចំការតាំងពិព័ណ៌នោះ។
បើពិនិត្យទៅ ការជួបគ្នា ជាលើកដំបូងនៅព្រះរាជវាំងវ៉ែកសៃនេះ វាមានខ្លឹមសារជានិម្មិតរូបធំណាស់ ទាំងសម្រាប់លោកប្រធានាធិបតីថ្មីរបស់បារាំង និងទាំងសម្រាប់លោកវ្លាឌីមៀរ ពូទីន។ ព្រះរាជវាំងវ៉ែកសៃ គឺជានិម្មិតរូប តំណាងឲ្យអាណាចក្របារាំង ដ៏រុងរឿង និងមានឥទ្ធិពលបំផុត កាលពីជំនាន់មុន។ ថ្វីត្បិតបារាំងបច្ចុប្បន្ន លែងមានរបបរាជានិយមក៏ដោយ តែគេសង្កេតឃើញថា លោកអេម៉ានុយអ៊ែល ម៉ាក្រុង ប្រធានាធិបតីថ្មីបារាំង ចង់កសាងឡើងវិញ នូវរូបភាពអស្ចារ្យ នៃអំណាចឥទ្ធិពលបារាំងនេះ ក្នុងនាមលោកជាប្រមុខរដ្ឋ។
សម្រាប់លោកពូទីន ក៏ដូចគ្នាដែរ គឺគាត់តាំងខ្លួន ប្រៀបបាននឹងស្តេចត្សារសម័យថ្មី របស់រុស្ស៊ីអញ្ចឹង។ ដូច្នេះហើយ ទើបបានការទទួលបដិសណ្ឋារកិច្ចនៅរាជវាំងវ៉ែកសៃ នាពេលនេះ ត្រូវបានគេមើលឃើញថា ប្រៀបបាននឹងរូបភាពកាលពីអតីតកាល ដែលមហាក្សត្របារាំង ទទួលស្តេចត្សាររបស់រុស្ស៊ី ឲ្យចូលគាល់។
ត្រូវបង្ខំចិត្តជួបគ្នា ទាំងដឹងរៀងខ្លួនម្ខាងៗ ថាមិនត្រូវគ្នា
ត្រលប់មកនិយាយ ឲ្យបានស៊ីជំរៅ កន្លងមកនេះ យើងបានឃើញហើយ អំពីគោលជំហរ មិនពេញចិត្តគ្នាទៅវិញទៅមក រវាងលោកម៉ាក្រុង និងលោកពូទីន។ គឺបញ្ហានេះតែម្តង ដែលជាមូលហេតុសំខាន់បំផុត នៃជំនួបនេះ។ លោក ពូទីន គឺជាមេដឹកនាំបរទេស ដំបូងបំផុត ដែលលោកប្រធានាធិបតីបារាំង ទទួលជួប នៅនឹងផ្ទះ។ មានន័យថា មេដឹកនាំទាំងពីរ បានផ្តល់អទិភាព ឲ្យគ្នាទៅវិញទៅមក ថាត្រូវតែជួបគ្នា និយាយគ្នា។ កន្លងមក លោកពូទីន និងលោកម៉ាក្រុង មានការយល់ឃើញ មានគោលជំហរមិនដូចគ្នាឡើយ។ លោកម៉ាក្រុង ធ្លាប់បាននិយាយហើយ ថាលោក មិនស្ញប់ស្ញែងលោកពូទីនទេ ព្រោះថា លោកពូទីន មានឧត្តមគតិ និងទស្សនវិស័យ ខុសគ្នាឆ្ងាយណាស់ពីលោក។
ចំណែកលោកពូទីនវិញ ក៏មិនបានគាំទ្របេក្ខភាពរបស់លោកម៉ាក្រុង ដែរ កាលពីពេលបោះឆ្នោត។ ដំបូងឡើយ លោកពូទីន គាំទ្រលោកហ្វីយ៉ុង ដោយបានផ្ញើរសារអបអរជ័យជំនះរបស់លោកហ្វីយ៉ុង កាលពីពេលបោះឆ្នោតក្នុងបក្ស។ តែក្រោយមក នៅពេលដឹងថា លោកហ្វីយ៉ុង មិនអាចឈ្នះ លោកពូទីន បានបែរទៅគាំទ្រលោកស្រីម៉ារីន ឡឺប៉ែនវិញ។ មិនត្រឹមតែប៉ុណ្ណោះ លោកពូទីន ថែមទាំងបានទទួលជួបលោកស្រី ម៉ារីន ឡឺប៉ែន នៅក្រុងមូស្គូទៀតផង កាលពីខែមីនា។
កាលពីក្នុងអំឡុងពេលឃោសនាបោះឆ្នោតបារាំង រដ្ឋាភិបាលរុស្ស៊ី បានប្រើប្រាស់ប្រព័ន្ធឃោសនារបស់ខ្លួន បំប៉ោងព័ត៌មាន បន្តុះបង្អាប់ រិះគន់លោកម៉ាក្រុង រឺក៏ចោទថាជាអាយ៉ងរបស់អាមេរិកជាដើម។ បន្ថែមពីនេះទៀតនោះ គណបក្ស En Marche ! របស់លោកម៉ាក្រុង ត្រូវបានចោរព័ត៌មានវិទ្យាចូលមកលុកលុយ ដែលគេសង្ស័យថា គឺរុស្ស៊ីជាអ្នកបញ្ជា ទៀតផង។
ទាំងអស់នេះ បង្ហាញថា លោកពូទីន មិនចង់ឲ្យលោកម៉ាក្រុង ឈ្នះឆ្នោត ក្លាយជាប្រធានាធិបតីបារាំងទេ ព្រោះលោកពូទីនដឹងថា លោកម៉ាក្រុងស្និទនឹងអាល្លឺម៉ង់ ហើយចង់កសាងសហភាពអឺរ៉ុបឲ្យខ្លាំង។ ចំណែករុស្ស៊ី មិនចង់ឃើញសហភាពអឺរ៉ុបខ្លាំងឡើយ។ ក៏ប៉ុន្តែពេលនេះ ចង់មិនចង់ លោកពូទីន ត្រូវតែបង្ខំចិត្តធ្វើការ ជាមួយលោកម៉ាក្រុង។
អ្នកវិភាគខ្លះ បានថែមទាំងយល់ថា លោកពូទីន មានបំណង លុបលាងកំហុស ដែលធ្វើជ្រុល ដោយបានទទួលលោកស្រីម៉ារីន ឡឺប៉ែន ឲ្យចូលជួប ទាំងមិនដឹងថាលទ្ធផលឆ្នោតទៅជាយ៉ាងណា។ យ៉ាងណាមិញ នៅពេលចេញលទ្ធផលឆ្នោត លោកពូទីន បានទូរស័ព្ទមកលោកម៉ាក្រុង ហើយបាននិយាយថា ត្រូវជម្នះ ឲ្យបាន ដើម្បីបំបាត់រាល់ការមិនទុកចិត្តគ្នាទៅវិញទៅមក កាលពីគ្រាមុន។
និយាយគ្នា ដោយត្រង់ទៅត្រង់មក
សួរថា តើការជួបគ្នាថ្ងៃនេះ នឹងប្រព្រឹត្តិទៅដោយរបៀបណា ? លោកម៉ាក្រុង បានឆ្លើយប្រាប់ថា លោកនឹងនិយាយត្រង់ទៅត្រង់មក ដោយមិនញញើត នឹងលោកពូទីនទេ។ ពោលគឺ និយាយដោយត្រង់អស់ពីពោះ គ្រប់រឿងទាំងអស់ ជាមួយរុស្ស៊ី។
មានបញ្ហាច្រើនណាស់ ដែលចោទឡើង ក្នុងសំណុំរឿងវិបត្តិអន្តរជាតិ តួយ៉ាងដូចជាវិបត្តិអ៊ុយក្រែន និងសង្រ្គាមនៅស៊ីរីជាដើម ដែលទាំងអស់នេះ សុទ្ធតែមានពាក់ព័ន្ធជាមួយរុស្ស៊ី។គឺបញ្ហាទាំងអស់នេះហើយ ដែលលោកម៉ាក្រុង ចង់និយាយជាមួយលោកពូទីន ដោយត្រង់ទៅត្រង់មក។ ក៏ដោយសារតែបញ្ហាទាំងអស់នេះដែរ ដែលបានបង្ករឲ្យបារាំង និងរុស្ស៊ីមើលមុខគ្នាមិនត្រង់កាលពីពេលកន្លងមក។
តែយ៉ាងណា មន្ត្រីទូតរុស្ស៊ី បានអះអាងថា គេសង្ឃឹមថា ជំនួបជាមួយប្រធានាធិបតីបារាំងថ្មីនាពេលនេះ នឹងបើកផ្លូវឲ្យមានការនិយាយគ្នា ឲ្យបានច្បាស់ ដើម្បីដោះស្រាយបញ្ហាទាំងអស់នេះ។ តាមពិតទៅ រុស្ស៊ី ក៏កំពុងរកច្រកចេញដែរ ព្រោះដោយសារតែវិបត្តិនៅស៊ីរី និងនៅអ៊ុយក្រែន គឺរុស្ស៊ីកាន់តែឯកោ លើឆាកអន្តរជាតិ។ រុស្ស៊ីមិនអាចបន្តស្ថានការណ៍នេះបានទៀតទេ។
លោកម៉ាក្រុង៖ "វិបត្តិអន្តរជាតិ ទាំងអស់ មិនអាចដោះស្រាយចេញទេ បើគ្មានរុស្ស៊ី"
រដ្ឋបាលរបស់លោកត្រាំ កំពុងជំពាក់វាក់វិន និងរឿងរ៉ាវជាច្រើន គ្មានមុខមាត់ឯណា មកចូលរួមដោះស្រាយបញ្ហា អន្តរជាតិឡើយ។ ដូច្នេះគឺពេលនេះហើយ ដែលបារាំង តំណាងឲ្យសហភាពអឺរ៉ុប ត្រូវចូលរួមរិះរកដំណោះស្រាយ។ លោកម៉ាក្រុង បាននិយាយកាលពីចុងសប្តាហ៍នេះថា វិបត្តិអន្តរជាតិទាំងអស់មិនអាចដោះស្រាយបានទេ បើគ្មានរុស្ស៊ី។ មានន័យថាត្រូវតែមានការនិយាយគ្នា ជាមួយរុស្ស៊ី តែនិយាយដោយម៉ឺងម៉ាត់ និងដោយត្រង់។ យ៉ាងណាមិញ លោកម៉ាក្រុង បានព្រលយពាក្យថា រុស្ស៊ីបានឈ្លានពានអ៊ុយក្រែន។
ក្នុងសំណុំរឿងអ៊ុយក្រែននេះ បើតាមការវិភាគ លោកពូទីន ចង់ឲ្យលោកម៉ាក្រុង បន្តគោលនយោបាយចាស់ របស់លោកហូឡង់ ដោយរក្សាតួអង្គ៤ ក្នុងការដោះស្រាយវិបត្តិអ៊ុយក្រែន គឺបារាំង អាល្លឺម៉ង់ អ៊ុយក្រែន និងរុស្ស៊ី។ ពោលគឺមានន័យថា មិនត្រូវឲ្យអាមេរិក រឺអង្គការអូតង់លូកដៃចូលទេ។
ចំណែកសំណុំរឿងស៊ីរីវិញ គឺវាមានភាពស្មុគស្មាញណាស់។ បញ្ហាចោទ គឺត្រូវនិយាយគ្នា ថាត្រូវចាត់ការយ៉ាងណា លើរដ្ឋាភិបាលរបស់បាស្ឆា អាល់អាសាដ។ លោកពូទីន ប្រាកដជាអំពាវនាវ ឲ្យផ្តល់អទិភាព ដល់ការកម្ទេចបណ្តាញភេវកម្មជីហាត ហើយទុកឲ្យរបបផ្តាច់ការស៊ីរី នៅបន្តកាន់កាប់អំណាច។ ត្រង់ចំណុចនេះ ប្រធានាធិបតីថ្មីបារាំង អាចត្រូវតែសំឡឹងមើល បញ្ហាចំពោះមុខ ជាក់ស្តែងនៅស៊ីរីផ្ទាល់។ ពេលខ្លះយើងត្រូវទទួលយក នូវលទ្ធផលខ្លះ បើទោះបីជាមិនបានទាំងអស់ ជាជាងអត់សោះ។ ហើយមួយវិញទៀត បើប្រឈមមុខតតាំងនិងរុស្ស៊ី ក៏មិនប្រាកដថាអាចដោះស្រាយបញ្ហាបានដែរ។
មន្ត្រីទូតទាំងបារាំង ទាំងរុស្ស៊ី បាននិយាយថា កុំសង្ឃឹមថា ជំនួបរវាងលោកម៉ាក្រុង និងលោកពូទីន នៅថ្ងៃនេះ បានចេញជាលទ្ធផលអ្វីជាដុំកំភួននោះ។ វាគ្រាន់តែជាចំណុចចាប់ផ្តើម ដើម្បីបង្កើតឲ្យមានបរិយាកាសសុទិដ្ឋិនិយម ក្នុងការរួមគ្នា ដោះស្រាយបញ្ហា ជាជាងការឈរស្រែកនៅតែផ្ទះ រៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ