បារាំង៖ រដ្ឋមន្ត្រីមហាផ្ទៃលាឈប់ម្នាក់ទៀត ធ្វើឲ្យរញ្ជួយរដ្ឋាភិបាលលោកម៉ាក្រុង
រដ្ឋាភិបាលបារាំង កំពុងតែរំជើបរំជួល បន្ទាប់ពី លោក ហ្សេរ៉ា កូឡុំ រដ្ឋមន្ត្រីក្រសួងមហាផ្ទៃបារាំង បានសម្រេចចិត្តលាឈប់ពីមុខតំណែង ក្រសួងដ៏សំខាន់នេះ ដើម្បីត្រលប់ ទៅធ្វើជាអភិបាលទីក្រុងលីយ៉ុងវិញ។ បន្ទាប់ពីបានបដិសេធ មិនព្រមឲ្យឈប់ លោកអេម៉ានុយអែល ម៉ាក្រុង ប្រធានាធិបតីបារាំង បានសម្រេចយល់ព្រម កាលពីយប់ថ្ងៃអង្គារទី២តុលា។ នេះគឺជារដ្ឋមន្ត្រីមានឋានៈស្មើទេសរដ្ឋមន្ត្រី ទី៣ហើយ ដែលបានដើរចេញពីរដ្ឋាភិបាលរបស់លោកម៉ាក្រុង។ ក្រុមគណបក្សប្រឆាំង ក៏ដូចជាអ្នកវិភាគនយោបាយបារាំង បានលើកឡើង ពីវិបត្តិធ្ងន់ធ្ងរក្នុងរដ្ឋាភិបាល ដឹកនាំដោយលោកម៉ាក្រុងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ព្រឹកថ្ងៃពុធ ទី៣ តុលានេះ កិច្ចប្រជុំគណរដ្ឋមន្ត្រីក្រោមអធិបតីលោកអេម៉ានុយអែល ម៉ាក្រុង នឹងពុំមានវត្តមាន របស់លោក ហ្សេរ៉ា កូឡុំ រដ្ឋមន្ត្រីក្រសួងមហាផ្ទៃ និងជាមនុស្សដ៏ស្និតបំផុត របស់លោកម៉ាក្រុងទៀតឡើយ។ លោក ហ្សេរ៉ា កូឡុំ បានសម្រេចចិត្តលាឈប់ ដើម្បីត្រលប់ទៅអង្គុយកៅអី អភិបាលក្រុងលីយ៉ុងវិញ។ ជាកៅអី ដែលលោកធ្លាប់អង្គុយ ដឹកនាំទីក្រុងនេះ អស់រយៈពេល១៦ឆ្នាំ រួចមកហើយ។
ពាក្យសុំលាឈប់ដំបូង ត្រូវបានលោកអេម៉ានុយអែល ម៉ាក្រុង បដិសេធ ក៏ប៉ុន្តែ លោក ហ្សេរ៉ា កូឡុំ បានចចេស ដាក់ស្នើពាក្យសុំលាឈប់ម្តងទៀត កាលពីរសៀលថ្ងៃអង្គារទី២តុលា។ ជាចុងក្រោយ លោកអេម៉ានុយអែល ម៉ាក្រុង បានសម្រេចចិត្តយល់ព្រម ក្នុងវេលាម៉ោង១២រំលងអាធ្រាត្រ។ នៅព្រឹកថ្ងៃពុធនេះ លោក អ៊ែដឌ័រ ហ្វីលីព ដែលជានាយករដ្ឋមន្ត្រី នឹងត្រូវដឹកនាំក្រសួងមហាផ្ទៃ ជាបណ្តោះអាសន្នសិន ទំរាំរកមនុស្សថ្មីមកជំនួសបាន។
គួររំលឹកថា លោក ហ្សេរ៉ា កូឡុំ ដែលមានវ័យ៧១ឆ្នាំ គឺជាមនុស្សដំបូងគេបង្អស់ ដែលបានជឿជាក់ លើសក្តានុពលនយោបាយ របស់លោកអេម៉ានុយអែល ម៉ាក្រុង ហើយបានចូលរួមគាំទ្រ ក្នុងការឃោសនា ដើម្បីឲ្យលោកម៉ាក្រុងបានឈ្នះឆ្នោតនៅឆ្នាំ២០១៧។ ក៏ប៉ុន្តែ ការចាកចេញរបស់លោក ហ្សេរ៉ា កូឡុំ នាពេលនេះ បានបង្ហាញអំពីភាពបែកបាក់ មិនចុះសម្រុងគ្នារវាងលោកនិងលោកម៉ាក្រុង។
ជាការកត់សំគាត់ ការបាត់បង់រដ្ឋមន្ត្រីក្រសួងមហាផ្ទៃនេះ បានបន្ថែមការលំបាក មួយកំរិតទៀត ឲ្យដល់រដ្ឋាភិបាលលោកម៉ាក្រុង បន្ទាប់ពីលោក នីកូឡា អ៊ុយឡូ រដ្ឋមន្ត្រីក្រសួងបរិស្ថាន បានលាចេញពីតំណែងដែរ កាលពីប៉ុន្មានសប្តាហ៍មុននេះ។ ជាងនេះទៅទៀត ការដាក់លោកនាយករដ្ឋមន្ត្រី ឲ្យដឹកនាំក្រសួងមហាផ្ទៃបណ្តោះអាសន្នសិននេះ គឺវាបង្ហាញថា លោកអេម៉ានុយអែល ម៉ាក្រុង កំពុងតែពិបាក នឹងរកអ្នកណាផ្សេងមកជំនួស ឲ្យសក្តិសមនឹងមុខងារក្រសួង ដ៏ធំមួយនេះណាស់។
លោកម៉ាក្រុងបានលុបចោល ដំណើរទស្សនកិច្ចទៅអាហ្វ្រិកខាងត្បូង នៅចុងសប្តាហ៍នេះ ដើម្បីយកពេលមកដោះស្រាយវិបត្តិផ្ទៃក្នុងរបស់រដ្ឋាភិបាលលោក។ ក្នុងចំណោមរដ្ឋមន្ត្រីធំៗ ដែលមានមុខ ក្នុងឆាកនយោបាយបារាំង គឺនៅសល់តែលោក ហ្សង់ អ៊ីវ ឡឺឌ្រីយ៉ង់ រដ្ឋមន្ត្រីក្រសួងការបរទេសម្នាក់ប៉ុណ្ណោះ ដែរបន្តនៅក្នុងរដ្ឋាភិបាល។ អ្នកវិភាគនយោបាយ បានលើកឡើងថា រដ្ឋាភិបាលលោកម៉ាក្រុង កំពុងតែបង្ហាញធាតុពិត នៃចំណុចខ្សោយ ព្រមទាំងភាពគ្មានសមត្ថភាព ព្រោះរដ្ឋាភិបាលនេះគ្មានធនធានមនុស្សសម្រាប់ដឹកនាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ