បោះឆ្នោតសភាបារាំងជុំទីមួយ៖ អ្នកមិនទៅបោះឆ្នោតមានដល់ជាង៥១%
ការបោះឆ្នោតជ្រើសរើសសមាជិកសភាបារាំង ជុំទីមួយ បានប្រព្រឹត្តិធ្វើទៅ កាលពីថ្ងៃអាទិត្យម្សិលមិញ ដែលការចូលរួមទៅបោះឆ្នោត របស់ប្រជាជន បានធ្លាក់ចុះយ៉ាងខ្លាំង ពោលគឺមាន មិនដល់៥០%ផងទេ។ សម្រាប់លទ្ធផលបឋម ដូចដែលការស្ទាបស្ទង់ស្ថិតិបានបង្ហាញ គឺគណបក្សរបស់លោកប្រធានាធិបតី អេម៉ានុយអែល ម៉ាក្រុង ដែលមានសមាជិកសភា ច្រើនជាងគេបង្អស់ ដែលនឹងឈានចូលទៅ ក្នុងការបោះឆ្នោត នៅជុំទីពីរ នៅសប្តាហ៍ក្រោយ។ ហើយបើតាមការប៉ាន់ស្មាន បក្សលោកប្រធានាធិបតី ប្រាកដជាបានទទួលសំលេងភាគច្រើន នៅក្នុងសភា សម្រាប់អាណត្តិថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
អ្វីដែលគេកត់សំគាល់ខ្លាំងបំផុត ក្រោយការបោះឆ្នោតជ្រើសរើសសមាជិកសភាបារាំង នៅជុំទីមួយនេះ គឺចំនួនអ្នកមិនទៅបោះឆ្នោត ដែលមានប្រមាណជា៥១,៣% ដែលនេះ គឺជាតួលេខច្រើនលើសលប់មិនធ្លាប់មាន ទាល់តែសោះ ក្នុងប្រវត្តិបោះឆ្នោត នៃសាធារណៈរដ្ឋទី៥របស់បារាំង។
ចំនួនអ្នកមិនទៅបោះឆ្នោត ក្នុងតួលេខខ្ពស់បែបនេះ បានជះឥទ្ធិពលទៅដល់លទ្ធផលជាទូទៅនៅជុំទីមួយ របស់បេក្ខជនម្នាក់ៗ ព្រោះ បេក្ខជនម្នាក់អាចឈ្នះ ដាច់មិនបាច់មានជុំទីពីរ ល្គិកណា ទាល់តែបានសម្លេងឆ្នោតសរុបយ៉ាងហោច ២៥% នៃចំនួនអ្នកចុះឈ្មោះបោះឆ្នោត ក្នុងមណ្ឌលខ្លួន។ ហើយបេ្ខជនម្នាក់ អាចចូលរួមនៅជុំទីពីរបាន ល្គិកណាបានទទួលសម្លេងឆ្នោតយ៉ាងហោច ១២,៥% នៃចំនួនអ្នកចុះឈ្មោះបោះឆ្នោត។ ជារួមគឺគ្មានបេក្ខជនណា បានឈ្នះដាច់នៅជុំទីមួយទេ ហើយជាទូទៅ សឹងតែគ្រប់មណ្ឌល នៅជុំទីពីរ គឺនឹងមានបេក្ខជន២រូបប្រជែងគ្នា មិនមាន៣ ដូចកាលពីអាណត្តិមុនៗឡើយ។
សម្រាប់លទ្ធផលបឋម នៅវេលាម៉ោង ១១យប់ ម៉ោងនៅក្នុងប្រទេសបារាំង គឺបេក្ខជនសមាជិកសភារបស់គណបក្ស La République en Marche ! ដែលជាបក្សរបស់លោកប្រធានធិបតីម៉ាក្រុង បានទទួលសម្លេងនាំមុខគេ សឹងតែគ្រប់មណ្ឌល។ តួលេខទូទាំងប្រទេសបង្ហាញថា គណបក្សលោកប្រធានាធិបតី បានសម្លេងឆ្នោត ប្រមាណ៣២%។ បើតាមតួលេខនេះ គណបក្សរបស់លោកម៉ាក្រុង ប្រាកដជាបានទទួលសំលេងភាគច្រើនក្នុងសភា ពោលគឺ នឹងមានសមាជិកសភា ចន្លោះពី ៣៩០ ទៅ ៤៣០ នាក់ ក្នុងចំណោមអាសនៈទាំងអស់៥៧៧។ ដូចការប៉ាន់ស្មានរបស់អ្នកវិភាគ ប្រជាជនបារាំង បានប្រគល់ការទុកចិត្តទៅលើប្រធានាធិបតីថ្មី ដើម្បីឲ្យលោកអាចមានលទ្ធភាព ធ្វើច្បាប់កំណែទំរង់ធំៗ។
តែយ៉ាងណា បេក្ខជន ក៏ដូចជាគណបក្សនយោបាយផ្សេងទៀត ដែលឈានទៅដល់ជុំទីពីរ បានលើកឡើងថា អ្វីៗនៅមិនទាន់ប្រាកដនៅឡើយ។ អ្នកគាំទ្ររបស់ពួកគេ ដែលមិនបានទៅបោះឆ្នោត កាលពីជុំទីមួយ នឹងនាំគ្នា ទៅបោះនៅជុំទីពីរ ដើម្បីទប់កុំឲ្យបក្សលោកប្រធានាធិបតីម៉ាក្រុង បានសម្លេងភាគច្រើនក្នុងសភា។
ដោយឡែក គណបក្សស្តាំនិយម និងឆ្វេងនិយម ដែលជាគណបក្សធំ តែងតែឈ្នះឆ្នោតរាល់លើក ជាប្រពៃណីមក បានសារភាពទទួលស្គាល់បរាជ័យរបស់បក្សខ្លួន ដែលមិនអាចទាក់ទាញទំនុកចិត្តរបស់ប្រជាជនបារាំង។ ចំនួនអ្នកទៅបោះឆ្នោត មានមិនដល់៥០%នេះ ក៏បង្ហាញផងដែរ អំពីភាពនឿយណាយ និងការបាក់ទឹកចិត្តរបស់ប្រជាជន ទៅលើអ្នកនយោបាយបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ