គំនរស្បែកជើងកណ្តាលក្រុងប៉ារីស ដើម្បីបរិហារការទំលាក់គ្រាប់បែកសម្លាប់ជនស្លូតត្រង់
នៅទីលានកណ្តាលក្រុងប៉ារីស កាលពីរសៀលថ្ងៃសៅរ៍ ទី២៩កញ្ញា មានការជួបជុំគ្នាមួយ ក្រោមការផ្តួចផ្តើម របស់អង្គការជនពិការអន្តរជាតិ ដែលបានអំពាវនាវ ឲ្យមនុស្សយកស្បែកជើងចាស់ៗ មកដាក់គរគ្នា ពូនជាភ្នំ។ ការដាក់គរស្បែកជើងនេះ គឺធ្វើឡើង ដើម្បីបរិហារអំពីការទំលាក់គ្រាប់បែក និងប្រើគ្រាប់ផ្ទុះ នៅតាមតំបន់មានសង្រ្គាម ទូទាំងពិភពលោក ដែលគ្រាប់ផ្ទុះទាំងនោះ បានផ្តាច់ជីវិតជនស្លូតត្រង់ និងបានធ្វើមានមនុស្សពិការ រាប់សែននាក់។ បើតាមអង្គការជនពិការពិភពលោក មានមនុស្សយ៉ាងហោច៩០នាក់ ក្នុងមួយថ្ងៃ ដែលរងគ្រោះការការទំលាក់គ្រាប់បែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
សកម្មភាពជួបជុំនៅតាមទីលានសាធារណៈ ដែលអង្គការជនពិការអន្តរជាតិ Handicap International បានរៀបចំឡើងនេះ មានធ្វើនៅតាមទីក្រុងធំៗនានា ទូទាំងប្រទេសបារាំង។ នៅក្រុងប៉ារីស គំនរស្បែកជើងគរដូចភ្នំ ត្រូវបានរៀបចំនៅទីលានPlace de la République គឺក្នុងគោលបំណងអំពាវនាវ បំផុសបំផុលឲ្យមតិមហាជនស្វែងយល់ ពីទុក្ខវេទនា របស់ប្រជាជនស្លូតត្រង់ នៅតាមតំបន់មានសង្រ្គាម។ ក្រៅពីគំនរស្បែកជើង សកម្មជនអង្គការជនពិការអន្តរជាតិ បានរៀបចំជាស្តង់ និងមានការពន្យល់បង្ហាញ អំពីគ្រោះថ្នាក់ និងរបៀបដោះគ្រាប់មីនទៀតផង។
យោងតាមតួលេខអង្គការនេះ ជនរងគ្រោះដោយសារគ្រាប់ផ្ទុះ និងគ្រាប់បែកទំលាក់ពីលើអាកាស គឺមាន៩២% សុទ្ធតែជាប្រជាជនសាមញ្ញស្លូតត្រង់។ នៅយេម៉ែន នៅស៊ីរី អ៊ីរ៉ាក់ សូម៉ាលី ជាដើម ជនរងគ្រោះមានសរុបយ៉ាងហោច ៩០នាក់ ជារៀងរាល់ថ្ងៃ បានស្លាប់បាត់បង់ជីវិត ឬត្រូវរងរបួសពិការ ដោយសារតែគ្រាប់មីន និងគ្រាប់បែកទំលាក់។ អង្គការជនពិការអន្តរជាតិ បានយកឱកាសជួបជុំនេះ ដើម្បីរៀបចំធ្វើញត្តិមួយ ផ្ញើរទៅកាន់ប្រទេសធំទាំងអស់ ដែលមានចំណែក្នុងសកម្មភាពទំលាក់គ្រាប់បែក និងសង្រ្គាមទាំងនេះ ឲ្យបញ្ឈប់ការធ្វើបាប ទៅលើប្រជាជនសាមញ្ញស្លូតត្រង់។
លោក Xavier Du Crest de Villeneuve នាយកអង្គការជនពិការអន្តរជាតិ ប្រចាំប្រទេសបារាំង បានលើកឡើងថា ប្រទេសទាំងអស់ត្រូវតែគោរពសន្ធិសញ្ញាអន្តរជាតិ មិនត្រូវទំលាក់គ្រាប់បែលនៅតាមទីប្រជុំជន កន្លែងរស់នៅរបស់ប្រជាជនស្លូតត្រង់ទេ។ បច្ចុប្បន្ននេះ មានប្រទេសជាង១០ ដោយមានការគាំទ្រពីអង្គការសហប្រជាជាតិ កំពុងពិភាក្សាគ្នា ដើម្បីធ្វើសេចក្តីប្រកាសនយោបាយរួមមួយ ក្នុងនាមសហគមអន្តរជាតិ ដើម្បីទាមទារឲ្យបញ្ឈប់ការទំលាក់គ្រាប់បែក សម្លាប់ជនស្លូតត្រង់។
លោក Manuel Patrouillard អគ្គនាយកអង្គការជនពិការអន្តរជាតិ បានអំពាវនាវឲ្យលោកប្រធានាធិបតីបារាំង ឆក់ឱកាស ដែលបារាំងនឹងរៀបចំវេទិការអន្តរជាតិស្តីពីសន្តិភាព នៅទីក្រុងប៉ារីស ក្នុងខែវិច្ឆិកាខាងមុខនេះ ដើម្បីដាស់សតិស្មារតីរបស់មេដឹកទាំងអស់។ លោកលើកឡើងថា បារាំង មិនអាចបន្តស្រែកថាចង់ឃើញពិភពលោកមានសន្តិភាព តែទន្ទឹមគ្នានេះ បារាំងនៅតែបន្តលក់អាវុធយន្ត ហោះទំលាក់គ្រាប់បែក ទៅឲ្យអារ៉ាប៊ីសាអ៊ូឌីត យកទៅទំលាក់គ្រាប់ សម្លាប់ប្រជាជនយេម៉ែន បានទៀតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ