អេស្ប៉ាញ៖រុស្ស៊ីលុបចោលសំណើចូលចតនាវាចម្បាំង នៅកំពង់ផែអេស្ប៉ាញ
អេស្ប៉ាញបានប្រកាស នៅថ្ងៃពុធនេះថា រុស្ស៊ីបានលុបចោលសំណើសុំចូលចតនាវាចម្បាំងនៅកំពង់ផែក្រុងCeutaរបស់អេស្ប៉ាញ។ ការប្រកាសនេះ ធ្វើឡើងក្នុងពេលរដ្ឋមន្ត្រីការពារជាតិអូតង់ កំពុងពិភាក្សាគ្នា ពីការពង្រាយកម្លាំងទ័ពនៅអឺរ៉ុបខាងកើត ប្រឈមការគំរាមពីរុស្ស៊ី។ មុននេះបន្តិច អេស្ប៉ាញទើបតែប្រកាសថា កំពុងពិនិត្យសំណើសុំចូលចតនាវារុស្ស៊ីប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២២
រុស្ស៊ីប្រហែលមិនចង់អោយអេស្ប៉ាញជាសមាជិកអង្គការអូតង់ រងសម្ពាធខ្លាំងពីអង្គការអូតង់ទេមើលទៅ ទើបបានជាលុបចោលទៅវិញនូវសំណើសុំចូលចតនាវាចម្បាំង នៅកំពង់ផែអេស្ប៉ាញ។ ថ្ងៃពុធនេះ អេស្ប៉ាញបានប្រកាសថា កំពុងពិនិត្យសំណើសុំចូលចតនាវារបស់រុស្ស៊ី។ តែបន្តិចក្រោយមក ក៏ប្រកាសថា ស្ថានទូតរុស្ស៊ីនៅក្រុងម៉ាឌ្រីដ បានដកសំណើនេះចេញទៅវិញ។
យោងតាមអង្គការអូតង់ នាវាចម្បាំងរុស្ស៊ីមាន៨គ្រឿង ក្នុងនោះមាននាវាផ្ទុកយន្តហោះ អាមៀរ៉ាល់ គូស្នេតសូវ Amiral Kouznetsov ផ្ទុកយន្តហោះប្រដេញនិងឧទ្ធម្ភាគចក្រច្រើនគ្រឿង បានធ្វើដំណើរមកពីភាគខាងជើងរុស្ស៊ី។ រុស្ស៊ីធ្លាប់ប្រាប់ថា បញ្ជូននាវាផ្ទុកយន្តហោះនេះ ទៅស៊ីរី ដើម្បីពង្រឹងកម្លាំងយោធារុស្ស៊ីក្នុងតំបន់នោះ។ កាលពីថ្ងៃសុក្រ នាវាទាំងនេះបានឆ្លងកាត់សមុទ្រManche ទៅក្បែរច្រកឆ្នេរអឺរ៉ុប Gibraltar។
ថ្ងៃពុធនេះ មុននឹងអេស្ប៉ាញប្រកាសថា រុស្ស៊ីលុបចោលសំណើសុំចូលចតនាវាចម្បាំងនៅកំពង់ផែអេស្ប៉ាញ អង្គការអូតង់ និងអង់គ្លេសបានដាក់សម្ពាធអេស្ប៉ាញ អោយពិចារណាអោយមែនទែន រឿងសម្រេចទទួលអោយនាវារុស្ស៊ីមកចុះចតចាក់សាំងនេះ។ អូតង់មិនចង់អោយអេស្ប៉ាញទទួលនាវារុស្ស៊ីទេ។ អូតង់រំលឹកឡើងវិញ នូវការសង្ស័យថា នាវាចម្បាំងរុស្ស៊ីទាំងនោះ ធ្វើដំណើរទៅស៊ីរី ដើម្បីបង្កើនការវាយប្រហារ នៅទីក្រុងអាឡិប។
ដោយឡែក ក្រសួងការបរទេសអេស្ប៉ាញប្រាប់ថា នាវារុស្ស៊ីបានចូលចតចាក់សាំង នៅតាមកំពង់ផែអេស្ប៉ាញ ច្រើនឆ្នាំមកហើយ។ អេស្ប៉ាញត្រួតពិនិត្យជានិច្ច ចំពោះករណីសំណើចូលចតនិមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ