តើមេរោគអេបូឡាឆ្លងពីអាហ្រ្វិកចូលមកទឹកដីអាមេរិកបានយ៉ាងម៉េច?
ចុះផ្សាយនៅថ្ងៃ៖
ស្តាប់ - ០៧:១២
តាំងពីថ្ងៃពុធ ទី ១ តុលា អាជ្ញាធរអាមេរិក នៅទីក្រុងដាឡាស រដ្ឋតិចសាស់ តាមរក កំណត់អត្តសញ្ញាណក្រុមមនុស្សដែលធ្លាប់មានទំនាក់ទំនងជាមួយជនជាតិលីបេរីយ៉ាម្នាក់ ដែលមានផ្ទុកមេរោគអេបូឡា នៅទីក្រុងដាឡាស រដ្ឋតិចសាស់។ តាមអាជ្ញាធរ នៅក្នុងចំណោមអ្នកដែលបានចូលមកពាក់ព័ន្ធជាមួយអ្នកជម្ងឺ មានផងដែរ សិស្សសាលាក្មេងៗ ដែលជាអ្នកជិតខាងរបស់អ្នកជម្ងឺ។ ករណីរកឃើញជាលើកទីមួយ អ្នកជម្ងឺឆ្លងមេរោគអេបូឡានៅលើទឹកដីអាមេរិក បានបង្កឲ្យមានការចោទសំណួរជាច្រើនពីសមត្ថភាពត្រួតពិនិត្យ និងតាមដានមេរោគអេបូឡារបស់ស្ថាប័នសុខាភិបាលអាមេរិក នៅតាមព្រលានយន្តហោះ ក៏ដូចជានៅតាមមន្ទីរពេទ្យ។ ការរកឃើញជាលើកទីមួយ ករណីឆ្លងមេរោគអេបូឡានៅលើទឹកដីអាមេរិកបានបង្កឲ្យមានការព្រួយបារម្ភពីការឆ្លងរាតត្បាតរបស់អេបូឡានៅអាមេរិក។ ហេតុអ្វីបានជាអ្នកជម្ងឺមានមេរោគអេបូឡាមិនបានទទួលការព្យាបាល ប៉ុន្តែ ផ្ទុយទៅវិញ បែរជាត្រូវបញ្ជូនឲ្យត្រលប់ទៅផ្ទះវិញ?
រហូតមកដល់ពេលនេះ អាមេរិកធ្លាប់បានព្យាបាលគ្រូពេទ្យ និងអ្នកធ្វើការខាងសាសនាអាមេរិកបួននាក់ ដែលត្រូវបញ្ជូនពីប្រទេសលីបេរីយ៉ា ដោយសារតែបានឆ្លងមេរោគអេបូឡា។ ប៉ុន្តែ នេះជាលើកទីមួយ ដែលគេរកឃើញករណីអ្នកកើតជំងឺអេបូឡា នៅក្នុងទឹកដីអាមេរិក។ អ្នកជម្ងឺនោះឈ្មោះ Duncan ជនជាតិលីបេរីយ៉ា បានធ្វើដំណើរមកដល់អាមេរិក នៅថ្ងៃទី ២០ខែកញ្ញា ដែលបើតាមកាសែតអាមេរិក គឺគាត់មកលេងក្រុមគ្រួសាររបស់គាត់ នៅរដ្ឋតិចសាស់។
ទើបតែថ្ងៃទី ២៥ គឺបួនថ្ងៃ មកដល់ទឹកដីអាមេរិក គាត់ត្រូវបានគេដឹកចូលផ្នែកសង្រ្គោះបន្ទាន់ នៅក្នុងមន្ទីរពេទ្យក្រុងដាឡាស។ នៅទីនោះ គាត់បានប្រាប់គ្រូពេទ្យថា គាត់ទើបធ្វើដំណើរមកពីតំបន់អាហ្រ្វិក។ គ្រូពេទ្យដែលរកឃើញថា គាត់គ្រុនក្តៅខ្លួនមិនធ្ងន់ធ្ងរ និងមានត្រឹមតែឈឺពោះ បានសម្រេចឲ្យគាត់ប្រើថ្នាំ អង់ទីប្យូទិច និងទៅ សម្រាកនៅផ្ទះវិញ។
នៅថ្ងៃទី ២៨ គាត់ត្រូវបញ្ជូនត្រលប់មកផ្នែកសង្រ្គោះបន្ទាន់ជាថ្មី។ គឺនៅពេលនោះហើយដែលគេបានផ្អើល ភ័យស្លន់ស្លោរ ព្រោះ គេបានធ្វើរោគវិនិច្ឆ័យ រកឃើញថា បុរស ជាតិ លីបេរីយ៉ា មានផ្ទុកមេរោគអេបូឡា។ រហូតមកដល់ពេលនេះ អ្នកជំនាញនៅមិនទាន់ដឹងថា តើបុរសជាតិលីបេរីយ៉ាអាចឆ្លងមេរោគអេបូឡាបានដោយរបៀបណា និងនៅទីណាទេ។ តាមគ្រូពេទ្យ អ្នកជម្ងឺពេលនេះកំពុងស្ថិតនៅក្នុងស្ថានភាពដាបខ្លាំង និងត្រូវបានគេដាក់ព្យាបាលឲ្យនៅដាច់ឆ្ងាយពីអ្នកដទៃ។
អ្នកទទួលខុសត្រូវរបស់មន្ទីរពេទ្យ ក្រុងដាឡាស បានទទួលស្គាល់ពីចំណុចខ្វះខាត និងកំហុសរបស់ខ្លួន ដែលបណ្តោយឲ្យអ្នកជម្ងឺ មានសង្ស័យឆ្លងមេរោគអេបូឡាត្រលប់ទៅផ្ទះវិញ។ តាមអ្នកទទួលខុសត្រូវខាងលើ អ្នកជម្ងឺបានប្រាប់គ្រូពេទ្យដែលត្រូវចុះព័ត៌មានថា គាត់មកពីអាហ្វ្រិក ចំណែកបងប្អូនរបស់អ្នកជម្ងឺបានបញ្ជាក់ថា គាត់ទើបមកពី ប្រទេសលីបេរីយ៉ា ប៉ុន្តែ ព័ត៌មានពីប្រភពធ្វើដំណើររបស់អ្នកជម្ងឺ នៅអាហ្វ្រិក មិនត្រូវបានបញ្ជូនទៅថ្នាក់លើ ដែលជាអ្នកសម្រេចចិត្តនោះទេ។ តាមប្រធានមន្ទីរពេទ្យ មន្ទីរពេទ្យមានសម្ភារៈគ្រប់គ្រាន់ និងវិធីសាស្រ្តដើម្បីបង្ការ ទប់ទល់នឹងមេរោគអេបូឡា។ កាលពីមួយសប្តាហ៍មុនអ្នកជម្ងឺ ចូលមកមន្ទីរពេទ្យ បុគ្គលិកពេទ្យទើបបានត្រូវកោះប្រជុំ និងបង្រៀនឲ្យដឹងពីវិធីដើម្បីទប់ស្កាត់មេរោគអេបូឡា។ នេះគឺដូចជាការចំអកនៃព្រហ្មលិខិត ព្រោះ មួយសប្តាហ៍ក្រោយ មន្ទីរពេទ្យបានទទួលអ្នកជម្ងឺមេរោគអេបូឡា ដោយទាំងមិនដឹងថា គេមានមេរោគអេបូឡា។
អ្នកជម្ងឺអេបូឡា ត្រូវគេបញ្ជូនឲ្យទៅនៅផ្ទះ ដើរហើរដូចអ្នកដទៃ នៅក្នុងទឹកដីអាមេរិក។ នេះជាកំហុសឆ្គងមួយដែលគេមិនអាចអត់អោនឲ្យបាន។ នេះបើតាមគ្រូពេទ្យជំនាញអាមេរិក។ ដូចបានលើកនិយាយ ក្នុងរយៈពេលបួនថ្ងៃនេះ អ្នកជម្ងឺអាចចម្លងទៅមនុស្សដទៃទៀតជាច្រើន។ អាជ្ញាធរអាមេរិកពេលនេះ កំពុងកំណត់អត្តសញ្ញាណក្រុមមនុស្សដែលបានចូលមកប៉ះពាល់ ទាក់ទងជាមួយអ្នកជម្ងឺ ចាប់តាំងពីថ្ងៃដែលគាត់មានកើតរោគសញ្ញាឆ្លងមេរោគអេបូឡា គឺថ្ងៃទី ២៤រហូតដល់ថ្ងៃដែលគាត់ចូលព្យាបាលនៅមន្ទីរពេទ្យថ្ងៃ ទី ២៨។
តាមមជ្ឈមណ្ឌលត្រួតពិនិត្យ និងបង្ការជម្ងឺដែលធ្វើការជាពិសេសទៅលើមេរោគអេបូឡា គេកំណត់ឃើញមានមនុស្សពី ១៨ ទៅ ២១នាក់ដែលបានចូលទៅពាក់ព័ន្ធជាមួយអ្នកជម្ងឺ តាំងពីថ្ងៃ ដែលគ្រូពេទ្យឲ្យទៅគាត់ទៅសម្រាកនៅផ្ទះ។ ពួកគេទាំងនោះ ដែលក្នុងនោះក៏មានសិស្សសាលាផងដែរ ត្រូវបានគេដាក់នៅដាច់ដោយឡែក ក្នុងអំឡុងពេល២១ថ្ងៃ ដើម្បីតាមដានរកករណីឆ្លង។ ប្រធានមជ្ឈមណ្ឌលនេះមិនបដិសេធទេ ថា នឹងមានករណីឆ្លងថ្មី នៅក្នុងពេលប៉ុន្មានសប្តាហ៍ខាងមុខ ជាពិសេស សាច់ញាតិជិតស្និទ្ធម្នាក់របស់អ្នកជម្ងឺ កំពុងត្រូវគេតាមដានដោយម៉ត់ចត់បំផុតផងដែរ។
សេតវិមានអាមេរិកក៏បានចេញសេចក្តីប្រកាសព័ត៌មាន ដើម្បីធានាកុំឲ្យប្រជាជនអាមេរិកភ័យស្លន់ស្លោ
តាមអាជ្ញាធរអាមេរិក គេគ្មានហេតុផលដែលត្រូវភ័យព្រួយ ថាមេរោគអេបូឡារាតត្បាតនៅអាមេរិកទេ ព្រោះអាមេរិកមិនមែនអាហ្វ្រិក។ អាមេរិកមានប្រព័ន្ធសុខាភិបាល ទំនើប មានមន្ទីរពេទ្យ បណ្តាញប្រយុទ្ធប្រឆាំងនឹងមេរោគអេបូឡា និងកំពុងធ្វើពិសោធន៍ដើម្បីផលិតថ្នាំព្យាបាលជម្ងឺអេបូឡា។ អាមេរិកធ្លាប់បានព្យាបាលអ្នកជម្ងឺអេបូឡាជនជាតិអាមេរិក ឲ្យជាសះស្បើយ។ ម្យ៉ាងទៀត អាជ្ញាធរអាមេរិកមានសមត្ថភាពអាចកំណត់បានយ៉ាងលឿន អ្នកដែលធ្លាប់ចូលទៅប៉ះពាល់អ្នកជម្ងឺ និងអាចដាក់ពួកគេឲ្យព្យាបាល នៅដាច់ឆ្ងាយពីគេឯង។
មជ្ឈមណ្ឌលត្រួតពិនិត្យ និងបង្ការជម្ងឺបានបញ្ជាក់ហើយ បញ្ជាក់ទៀត ថា គេមិនអាចឆ្លងមេរោគអេបូឡាតាមផ្លូវដកដង្ហើម ទេ ប៉ុន្តែ តាមការប៉ះពាល់វត្ថុជាតិរាវ ដូចជាឈាម ទឹកមាត់ ឬញើស របស់អ្នកដែលចេញរោគសញ្ញាអេបូឡា។ បើគេបានប៉ះពាល់វត្ថុជាតិរាវរបស់អ្នកណាម្នាក់ ដែលគ្មានចេញរោគសញ្ញាអេបូឡា នោះគេមិនចាំបាច់បារម្ភទេ។ មជ្ឈមណ្ឌលត្រួតពិនិត្យអាមេរិកខំពន្យល់ដើម្បីទប់អារម្មណ៍របស់អ្នកដំណើរតាមជើងអាកាស ដែលភ័យខ្លាចថា ពួកគេអាចឆ្លងមេរោគអេបូឡាពីបុរសលីបេរីយ៉ានៅលើយន្តហោះ។
យ៉ាងណាក៏ដោយ ការរកឃើញករណីឆ្លងជម្ងឺអេបូឡាមានជាលើកទីមួយនៅ អាមេរិកបានបង្ហាញថា មេរោគអេបូឡាចាប់ផ្តើមរាតត្បាតថ្នាក់អន្តរជាតិ ចេញពីទឹកដីអាហ្រ្វិកហើយ។ នៅទីកន្លែងណាក៏ដោយ នៅប្រទេសអ្នកមាន អភិវឌ្ឍន៍ ឬក្រីក្រ គឺមិនអាចរួចគេចផុតពីការឆ្លងមេរោគអេបូឡាដែរ។ ឧទាហរណ៍ជាក់ស្តែងបានបង្ហាញហើយថា បុរសលីបេរីយ៉ាត្រូវបានអាជ្ញាធរអាមេរិកអនុញ្ញាតឲ្យចូលក្នុងទឹកដី អាមេរិក ដោយមិនបានចាប់ឃាត់ឃាំងអ្វីទេ ព្រោះថា គេគ្មានហេតុផលអ្វី ដែលត្រូវហាមគាត់មិនឲ្យគាត់ចូលទឹកដីអាមេរិកដែរ។ គាត់មកពីលីបេរីយ៉ាមែន ប៉ុន្តែ គាត់គ្មានរោគសញ្ញាបង្ហាញថា គាត់មានជម្ងឺអេបូឡា។ ជម្ងឺអេបូឡាទើបលេចចេញ ក្រោយគាត់មកដល់ដី អាមេរិកបួនថ្ងៃក្រោយ។ មកដល់ពេលនេះ អាជ្ញាធរអាមេរិកនៅមិនទាន់បង្ហាញពី ចំណាត់ការយ៉ាងណា ទាក់ទងនឹងដំណើរឆ្លងកាត់របស់មនុស្ស ដែលអាចជាប្រភពនាំមេរោគអេបូឡា។ តាមអ្នកជំនាញសុខភាព មធ្យោបាយមានតែមួយ ដើម្បីទប់ស្កាត់ការឆ្លងរាលដាលថ្នាក់អន្តរជាតិ គឺត្រូវកម្ចាត់សម្បុកមេរោគអេបូឡានៅអាហ្រ្វិកខាងលិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ