គុយបាប្រារព្ធខួបកាន់អំណាច១០ឆ្នាំ របស់ប្រធានាធិបតី Raul Castro
ចុះផ្សាយនៅថ្ងៃ៖
ស្តាប់ - ០៥:៣៤
គិតដល់ថ្ងៃ៣១កក្កដា ២០១៦នេះ លោក Raul Castro អាយុ៨៥ឆ្នាំ បានកាន់អំណាចនៅគុយបា១០ឆ្នាំហើយ។ កាលពី១០ឆ្នាំមុន ដោយសារបញ្ហាសុខភាព អតីតប្រធានាធិបតី Fidel Castro បានផ្ទេរអំណាចអោយទៅលោក Raul Castro ជាប្អូនប្រុស។ កាលនោះ លោក Raul Castro នៅជារដ្ឋមន្ត្រីការពារជាតិ។ លោក រ៉ូល កាស្ត្រូ ត្រូវបានតែងតាំងជាប្រធានាធិបតីផ្លូវការ នៅឆ្នាំ២០០៨។
១០ឆ្នាំមកនេះ គុយបាចេះបត់បែនផ្នែកការទូត និងបានធ្វើកំណែទម្រង់ជាច្រើន ដែលគេស្មានមិនដល់។ នោះគឺការបើកចំហសេដ្ឋកិច្ច និងការខិតទៅរកអាមេរិកវិញ។ ប្រធានាធិបតី Raul Castro សន្យាចុះពីអំណាច នៅឆ្នាំ២០១៨។
គុយបានិងអាមេរិកជាអតីតសត្រូវក្នុងសង្គ្រាមត្រជាក់ បានខិតទំនាក់ទំនងរកគ្នាវិញ
ជាការនឹកស្មានមិនដល់ លោកRaul Castro បានធ្វើអោយគុយបាខិតទំនាក់ទំនងទៅរកអាមេរិក ដែលជាសត្រូវសម័យសង្គ្រាមត្រជាក់វិញ។ គុយបាបានចរចាសំងាត់១ឆ្នាំជាមួយអាមេរិក ហើយខែធ្នូ ឆ្នាំ២០១៤ គុយបានិងអាមេរិក បានប្រកាសជាប្រវតិ្តសាស្ត្ររួមគ្នាថា ប្រទេសទាំង២បានខិតទំនាក់ទំនងទៅរកគ្នាវិញហើយ។
ខែកក្កដាឆ្នាំ២០១៥ ប្រទេសទាំង២បានបើកស្ថានទូតឡើងវិញរៀងៗខ្លួន។ ខែមិនាឆ្នាំ២០១៦ លោកអូបាម៉ា បានបំពេញទស្សនកិច្ចនៅគុយបា ក្នុងនាមជាប្រធានាធិបតីអាមេរិក ដំបូង ដែលចុះទៅគុយបា គិតក្រោយបដិវត្តន៍របស់លោក Fidel Castro ។
គួររំលឹកថា អាមេរិកបានកាត់ផ្តាច់ទំនាក់ទំនងការទូតជាមួយគុយបា នៅឆ្នាំ១៩៦១ ក្រោយពេលលោកហ្វ៊ីឌែល កាស្ត្រូ ផ្តួលរលំមេដឹកនាំមុនមួយទៀត គឺលោក ផុលចិនស្យូ បាទីស្តា នៅដើមឆ្នាំ១៩៥៩។ អាមេរិកមិនទទួលស្គាល់របបលោកហ្វ៊ីឌែល កាស្ត្រូ ទេ ហើយបានដាក់ទណ្ឌកម្មសេដ្ឋកិច្ចលើគុយបា នៅឆ្នាំ១៩៦២។ ទំនាក់ទំនងអាមេរិក-គុយបា បានធ្លាក់ក្នុងវិបត្តិសង្គ្រាមត្រជាក់ ក្រោយពេលគេរកឃើញមីស៊ីលសូវៀតច្រើនដើម ក្នុងទឹកដីគុយបា ក្នុងឆ្នាំ១៩៦២។ អាមេរិកនិងគុយបាជាអតីតសត្រូវនឹងគ្នា ហើយបែរជាអាចងាកមកញញឹមដាក់គ្នាវិញ គឹជារឿងស្មានមិនដល់ទេ សម្រាប់សហគមន៍អន្តរជាតិ។
ដោយឡែក ក្រៅពីអាមេរិក គុយបាក៏បានពង្រឹងទំនាក់ទំនងជាមួយសហភាពអឺរ៉ុបផងដែរ ដោយបានចុះហត្ថលេខាកិច្ចព្រមព្រៀងទាក់ទងការចរចានយោបាយជាមួយប្រទេសអឺរ៉ុប។
កំណែទម្រង់ក្នុងស្រុករបស់លោក Raul Castro
គុយបាបានបើកចំហសេដ្ឋកិច្ច ដោយព្រមអោយមានការផ្តួចផ្តើមបែបឯកជន។ គេឃើញថា ដោយសារការបើកចំហរនេះ បច្ចុប្បន្ន ក្នុងចំណោមប្រជាជនសរុបជាង១១លាននាក់ ប្រជាជនកន្លះសែននាក់បានក្លាយជាអ្នកធ្វើការបែបឯករាជ្យ ធ្វើការជាឯកជន គឺថា ពួកគេបានបើកការរកស៊ីតូចតាចផ្ទាល់ខ្លួន។ អាជ្ញាធរក៏បានបន្ធូរលក្ខខណ្ឌខ្ចីប្រាក់ធនាគារដល់ពួកគេដែរ។ ពីមុនមក ក្នុងជំនាន់លោកFidel Castro ជាបងប្រុស រដ្ឋបានបិទមិនអោយមានការរកស៊ីបែបឯករាជ្យដូច្នេះទេ។
គុយបាក៏មានច្បាប់ជំរុញការវិនិយោគបរទេសដែរ ថែមទាំងបានកំណត់អត្រាពន្ធវិជ្ជមានសម្រាប់សហគ្រាសបរទេសទៀតផង។ រដ្ឋាភិបាលបានបើកកំពង់ផែឧស្សហកម្មម៉ារីយែល Mariel នៅភាគខាងលិចរដ្ឋធានីឡាហាវ៉ាន អនុញ្ញាតអោយសហគ្រាសបរទេស បានបោះទីតាំងនៅទីនោះ។
ពេលនេះ រដ្ឋាភិបាលលោក Raul Castro កំពុងពិនិត្យកិច្ចការទាក់ទងសហគ្រាសធុនធ្ងន់និងមធ្យម ចង់អោយសហគ្រាសប្រភេទនេះមានវត្តមានក្នុងស្រុកឡើងវិញដែរ។ សហគ្រាសធុនធ្ងន់និងធុនមធ្យម ត្រូវបានគុយបាលុបចោល តាំងពីឆ្នាំ១៩៦៨ម្ល៉េះ។ ចំពោះផ្នែកដីធ្លីវិញ តាំងពីឆ្នាំ២០០៧មក លោករ៉ូល កាស្ត្រូបានធ្វើកម្មវធីផ្តល់ដីទំនេរអោយប្រជាកសិករ កាប់គាស់ដាំដុះ ដើម្បីជំរុញការផលិតម្ហូបអាហារ ក្នុងស្រុក ព្រោះថា គុយបានាំចូលម្ហូបអាហារ ពីបរទេស ក្នុងអត្រាខ្ពស់ជិត៨០ភាគរយឯណោះ។
ក្រៅពីកំណែទម្រង់ខាងដើមនេះ ប្រទេសកុម្មុយនិស្តមួយនេះ បានបើកសិទ្ធិដើរហើរដោយសេរីដល់ប្រជាជនខ្លួនឡើងវិញ។ ពលរដ្ឋមានសិទ្ធិធ្វើដំណើរទៅបរទេស ដោយមិនចាំបាច់សុំលិខិតអនុញ្ញាតពីអាជ្ញាធរ រឺមានលិខិតបញ្ជាក់ពីបរទេសទៀតទេ។
ឃើញថា ប្រៀបនឹងរបបលោកFidel Castro ជាបងប្រុស ដែលគុយបាធ្លាក់ក្នុងភាពឯកា របបលោករ៉ូល កាស្ត្រូ ជាប្អូនប្រុស មានការបើកចំហរ បើកផ្លូវទូលាយច្រើន។ ប្រជាជនដែលចេញទៅធ្វើការនៅបរទេស ហើយត្រលប់មកស្រុកកំណើតវិញ ក៏ស្ទើរតែមីនជឿនឹងភ្នែក ចំពោះការប្រែប្រួលទាំងអស់នេះដែរ។
ទោះមានកំណែទម្រង់វិជ្ជមានបែបនេះ ក៏សេដ្ឋកិច្ចគុយបានៅតែជួបការលំបាក។ គុយបារងទណ្ឌកម្មសេដ្ឋកិច្ចពីអាមេរិក តាំងពីឆ្នាំ១៩៦២។ លើសពីនេះ គុយបាលែងទទួលបានការឧបត្ថម្ភពីសូវៀត តាំងតែពីសហភាពសូវៀតដួលរលំក្នុងទសវត្សឆ្នាំ១៩៩០ម្ល៉េះ។
សេដ្ឋកិច្ចគុយបាពឹងផ្អែកខ្លាំងលើវេណេស៊ុយអេឡា។ វេណេស៊ុយអេឡាផ្តល់ប្រេងដល់គុយបា និងជាដៃគូពាណិជ្ជកម្មចំបងរបស់គុយបា។ ប៉ុន្តែ វេណេស៊ុយអេឡាបានជួបវិបត្តិ ថ្លៃវត្ថុធាតុដើមធ្លាក់ចុះ ដូច្នេះ គឺប៉ះពាល់ដល់សេដ្ឋកិច្ចគុយបា។ គេរំពឹងថា កំណើនសេដ្ឋកិច្ចគុយបា ដែលមាន៤ភាគរយ ឆ្នាំ២០១៥ អាចនឹងធ្លាក់ចុះរហូតដល់២ភាគរយ សម្រាប់ឆ្នាំ២០១៦នេះ។
លោកអូបាម៉ាបានសន្យាស្នើសភាអាមេរិកអោយលើកលែងទណ្ឌកម្មគុយបាដែរ ប៉ុន្តែ វាជាការលំបាក ព្រោះសភាទាំង២ស្ថិតក្រោមការកាន់កាប់របស់បក្សប្រឆាំងសាធារណរដ្ឋ។
ក្រោមរបបដឹកនាំឯកបក្ស មេដឹកនាំគុយបាក្រោយរបបកាស្ត្រូ មានសិទ្ធិកាន់អំណាចបាន២អាណត្តិ
លោក Raul Castro បានកំនត់អោយគ្រប់តួនាទីដឹកនាំ មានអាណត្តិការងារត្រឹម៥ឆ្នាំ ហើយអាចបន្តបានត្រឹម២អាណត្តិ។ លោក Raul Castro ចង់អោយថ្នាក់ដឹកនាំនានាមិននៅក្រាញតំណែងរហូតចាស់ជ្រុលទេ គឺត្រូវទុកអោយក្មេងជំនាន់ក្រោយបានឡើងមកបន្តផង។ លោកបានសន្យាចុះពីអំណាចឆ្នាំ២០១៨។ លោកមីហ្គែល ដ្យា កានែល Miguel Diaz Canel ជាបុរសខ្លាំងទី២ក្នុងរបបដឹកនាំ អាចនឹងឡើងមកបន្តគ្រប់គ្រងប្រទេស។
គិតដល់ឆ្នាំ២០១៨ មានន័យថា លោកកាស្ត្រូ កាន់អំណាចនៅគុយបា១២ឆ្នាំ គឺយូរហើយដែរ មុននឹងសម្រេចឈប់ដឹកនាំប្រទេស។ លោកបានធ្វើអោយពិភពលោកបើកភ្នែកមើលគុយបាឡើងវិញ បើលោកចុះពីអំណាចទៅ លោកក៏ប្រហែលសប្បាយចិត្តច្រើនដែរ។
ការកាន់កាប់អំណាចយូរ រឺមិនយូរ មិនមានអ្វីប្លែកទេ ព្រោះគុយបាជាប្រទេសកុម្មុយនិស្ត ស្ថិតក្រោមការកាន់កាប់របស់គណបក្សតែមួយ។ គ្មានបក្សប្រឆាំងក្នុងស្រុកទេ។ ដូច្នេះ ការដឹកនាំ រុញគុយបាអោយវិវត្តន៍ទៅរកផ្លូវល្អរឺមិនល្អ គឺជាការទទួលខុសត្រូវរបស់បក្សតែមួយ។
គុយបារងការរិះគន់នយោបាយដោយសារបក្សតែមួយនេះឯង ព្រោះថា គ្មានបក្សប្រឆាំងហើយ បើចង់ប្រឆាំងក៏អាចត្រូវអាជ្ញាធររារាំងដែរ។ គុយបាអួតថា គ្មានអ្នកទោសនយោបាយ ទេ តែបើយោងតាមគណៈកម្មការសិទ្ធិមនុស្សគុយបា (CCDH) គុយបាមានអ្នកជាប់ឃុំដោយសាររឿងនយោបាយ ៩៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ