ប៉ុន្មានម៉ោងមុនបាតុកម្មបក្សប្រឆាំង តុលាការកំពូលវ៉េណេស៊ុយអេឡាថយក្រោយមួយជំហាន
នៅវ៉េណេស៊ុយអេឡា ថ្ងៃសៅរ៍១មេសានេះ បក្សប្រឆាំងគ្រោងធ្វើមហាបាតុកម្ម តវ៉ានឹងតុលាការកំពូល ដែលកាលពីថ្ងៃព្រហស្បតិ៍ បានសម្រេចចិត្តរឹបអូសអំណាចនិតិបញ្ញត្តិ ពីរដ្ឋសភាមកគ្រប់គ្រង។ ប៉ុន្មានម៉ោងមុនបាតុកម្ម ប្រធានាធិបតីនីកូឡា ម៉ាឌុយរ៉ូ បានប្រកាសថា តុលាការកំពូលនឹងមើលឡើងវិញ នូវការសម្រេចចិត្តនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
គួររំលឹកថា កាលពីថ្ងៃព្រហស្បតិ៍ តុលាការកំពូលវ៉េណេស៊ុយអេឡាបានសម្រេចដកហូតអំណាចនិតិបញ្ញត្តិពីរដ្ឋសភាមកគ្រប់គ្រង។ ហើយប៉ុន្មានថ្ងៃមុនការសម្រេចនេះ តុលាការកំពូលក៏ទើបនឹងសម្រេចដកអភ័យឯកសិទ្ធិពីសមាជិកសភាដែរ។ ការសម្រេចរឹបអូសអំណាចសភាមកគ្រប់គ្រង បានធ្វើអោយមានប្រតិកម្មថ្កោលទោស ពីសំណាក់សហគមន៍អន្តរជាតិ ពីអាមេរិក សហភាពអឺរ៉ុប អង្គការសហប្រជាជាតិ បូករួមប្រទេសចំនួន៦ នៅអាមេរិកខាងត្បូង។
បក្សប្រឆាំងដែលបានឈ្នះឆ្នោត ចូលគ្រប់គ្រងសភា ឆ្នាំ២០១៥នោះ បានអំពាវនាវអោយមានប្រជាជនចុះបាតុកម្មតាមដងផ្លូវ នៅថ្ងៃសៅរ៍នេះ ដើម្បីតស៊ូ និងដាក់សម្ពាធរដ្ឋអំណាច។ ថ្ងៃសុក្រម្សិលមិញ សមាជិកសភាបាននាំគ្នាបើកអង្គប្រជុំ នៅទីលានសាធារណៈ ក្នុងក្រុងការ៉ាកាស ដើម្បីគូសបញ្ជាក់ថា សភាជាតិ គឺជាតំណាងប្រជាជន។
ថ្ងៃសុក្រម្សិលមិញ ជាលើកដំបូង មន្ត្រីមួយចំនួនមកពីក្រុមប្រធានាធិបតីម៉ាឌុយរ៉ូ ក៏បានរិះគន់ការសម្រេចដកហូតអំណាចរដ្ឋសភា របស់តុលាការកំពូលនេះដែរ។ ប្រឈមនឹងការរិះគន់ពីសហគមន៍អន្តរជាតិ ពិសេសពីមនុស្សក្នុងក្រុមខ្លួនឯងដែរនោះ ប្រធានាធិបតីម៉ាឌុយរ៉ូ បានប្រកាសបញ្ច្រាសស្រកីទៅវិញថា នៅវ៉េណេស៊ុយអេឡា រដ្ឋធម្មនុញ្ញ សិទ្ធិមនុស្ស និងអំណាចប្រជាជន មានដំណើរការពេញលេញ។ យប់មិញនេះ លោកម៉ាឌុយរ៉ូ បានប្រជុំក្រុមប្រឹក្សាសន្តិសុខជាតិ ដើម្បីរកដំណោះស្រាយ។ តំណាងស្ថាប័នធំៗក្នុងស្រុក បាននាំគ្នាបង្ខំតុលាការកំពូលអោយពិនិត្យមើលការសម្រេចចិត្តឡើងវិញ។
សូមបញ្ជាក់ថា នៅវ៉េណេស៊ុយអេឡា ប្រធានាធិបតីជាអ្នកក្តាប់អំណាចពេញទី ទោះបីជាបក្សប្រឆាំងបានឈ្នះឆ្នោត ក្នុងឆ្នាំ២០១៥ក្តី។ ការដែលតុលាការកំពូលបានសម្រេចដកហូតអភ័យឯកសិទ្ធិពីសមាជិកសភា អាចបើកផ្លូវអោយសមាជិកសភាបក្សប្រឆាំង ប្រឈមការចោទប្រកាន់ពីបទក្បត់ជាតិ នៅតុលាការយោធាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ