អង្គការFAOចង់អោយចិននិងប្រទេសជិតខាងចិនពង្រឹងវិធានការទប់ទល់ផ្តាសាយបក្សី
នៅថ្ងៃសុក្រនេះ អង្គការកសិកម្មនិងចំណីអាហារពិភពលោកFAO បានផ្តល់អនុសាសន៍អោយចិន និងប្រទេសជិតខាងរបស់ខ្លួន ធ្វើការពង្រឹងបន្ថែមនូវវិធានការត្រួតពិនិត្យ និងវិធានការអនាម័យផ្សេងៗ ដើម្បីចៀសវាងការរាលដាល និងការវិវត្តន៍នៃមេរោគផ្តាសាយបក្សីH7N9។ មេរោគH7N9 បានសម្លាប់មនុស្សជាង១០នាក់ហើយ នៅចិន ក្នុងឆ្នាំ២០១៧នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
តាំងពីឆ្នាំ២០១៣មក គិតតាំងពីពេលដំបូង ដែលលេចមុខមេរោគផ្តាសាយបក្សីH7N9 គិតទៅមានមនុស្សជាង១២០០នាក់ ដែលត្រូវមេរោគនេះវាយប្រហារ។ អាជ្ញាធរចិនបានប្រកាសកាលពីខែមករា ថាមានមនុស្ស៧៩នាក់បានស្លាប់។ គិតទៅគឺច្រើនណាស់ ប្រៀបនឹងឆ្នាំ២០១៦ ក្នុងរយៈពេលដូចគ្នានេះ។ ក្នុងឆ្នាំ២០១៦រយៈពេលដដែលនេះ មានមនុស្សស្លាប់ដោយមេរោគផ្តាសាយបក្សីនេះ តែ៥នាក់ទេ។
ថ្ងៃសុក្រនេះ អង្គការកសិកម្មនិងចំណីអាហារពិភពលោក FAO បានផ្តល់អានុសាសន៍អោយ ប្រទេសចិននិងបណ្តាប្រទេសជិតខាងចិន បណ្តាប្រទេសដែលធ្វើពាណិជ្ជកម្មជាមួយចិនក្តី មិនធ្វើជាមួយក្តី- ប្រទេសទាំងអស់នេះ ចាំបាច់ត្រូវដាក់ចេញនូវប្រព័ន្ធចាប់រោគសញ្ញា និងប្រព័ន្ធប្រតិកម្មឡើង។ ទិសដៅគឺចៀសវាងកុំអោយមេរោគផ្តាសាយបក្សី H7N9 អាចរាលដាលនិងវិវត្តន៍បំផ្លែងលក្ខណៈបាន។
អង្គការ FAO ចង់អោយពង្រឹងបន្ថែមនូវការត្រួតពិនិត្យចាប់រោគសញ្ញា ធ្វើការសម្អាតកសិដ្ឋានចិញ្ចឹមសត្វស្លាប និងទីផ្សារដែលមានសត្វស្លាបឈឺ ហើយអាជ្ញាធរត្រូវអន្តរាគមន៍តាំងពីដំណាក់កាលដំបូងនៅកសិដ្ឋានរហូតដល់សត្វស្លាបដាក់ចេញលក់ និងក្លាយជាចំណីអាហារ។
តាំងពីឆ្នាំ២០១៣មក ប្រឈមនឹងមេរោគផ្តាសាយបក្សី ចិនបានចាត់វិធានការត្រួតពិនិត្យទីផ្សារសត្វស្លាប។ ចិនបានព្យួរបណ្តោះអាសន្នទីផ្សារលក់សត្វស្លាបរស់ នៅតាមក្រុងភាគខាងត្បូង ភាគកណ្តាល និងនៅខែត្រភាគខាងកើត Zhejiang។ ទោះយ៉ាងនេះក្តី នៅខែត្រក្វាងទុង ភាគខាងកើត គេបានរកឃើញថា មេរោគផ្តាសាយបក្សី H7N9 បានប្រែទៅជាជំងឺ អាចសម្លាប់សត្វស្លាបក្នុងពេលឆាប់បំផុត គឺត្រឹមតែ៤៨ម៉ោងប៉ុណ្ណោះ។ លក្ខណៈមេរោគផ្តាសាយបក្សីមួយនេះ អាចវិវត្តន៍បានគ្រប់ពេល ដូច្នេះ អង្គការ FAO ចង់អោយអាជ្ញាធរនិងមន្ទីរពិសោធន៍ចែករំលែកព័ត៌មាននិងលទ្ធផលការងារគ្នា អោយបានឆាប់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ