ចិននិងអាស៊ាន បើកធ្វើលំហាត់សមយុទ្ធ នៅលើដែនសមុទ្រចិនខាងត្បួង
នៅថ្ងៃទី៣១តុលានេះ ចិន និងប្រទេសជាច្រើនរបស់អាស៊ាន បានធ្វើលំហាត់សមយុទ្ធរួមគ្នា ជាលក្ខណៈទ្រង់ទ្រាយធំ លើកដំបូង នៅលើដែនសមុទ្រចិនខាងត្បូង។ សមុទ្រចិនខាងត្បូង ដែលកំពុងពោរពេញដោយវិបត្តិ រវាងចិននិងរដ្ឋសមាជិកមួយចំនួនរបស់អាស៊ាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
លំហាត់សមយុទ្ធនៅលើដែនសមុទ្រនេះ គឺជាការសាកល្បងធ្វើប្រតិបត្តិការសង្គ្រោះបន្ទាន់។ សេណារីយ៉ូ នៅក្នុងលំហាត់នេះ គឺមានការបើកបះទង្គិចគ្នា រវាងនាវាដឹកអ្នកដំណើររបស់ចិន និងកប៉ាល់ដឹកទំនិញរបស់កម្ពុជា។ នៅក្នុងនោះ គឺបានបណ្តាលឲ្យមានមនុស្សប្រមាណ១០រងរបួស ហើយមនុស្សជិត៣០នាក់ បានធ្លាក់ទៅក្នុងទឹកសមុទ្រ និងជាង៣០០នាក់ រង់ចាំការសង្គ្រោះ ពីក្រុមឆ្មាំសមុទ្រ និងគ្រូពេទ្យសង្គ្រោះបន្ទាន់។
លំហាត់ប្រតិបត្តិសង្គ្រោះបន្ទាន់តាមផ្លូវសមុទ្រ ដ៏ធំនៅក្នុងតំបន់នេះ បានរៀបចំធ្វើឡើងនៅខេត្តក្វាំងទុង ប្រទេសចិន។ លំហាត់នេះ បានផ្តួចផ្តើមដោយចិន ដែលជាលទ្ធផលនៃជំនួបលើកទី១១របស់រដ្ឋមន្ត្រីការពារជាតិអាស៊ាននិងចិន កាលពីខែតុលា នៅហ្វីលីពីន។ សម្រាប់លំហាត់ដ៏ធំលើកដំបូងនេះ មានមនុស្សប្រមាណជាង១ពាន់នាក់ នាវានិងកប៉ាល់ដឹកជញ្ចូនចំនួន២០ ព្រមទាំងឧទ្ធម្ភាគចក្រ ចំនួន៣ សម្រាប់ធ្វើប្រតិបត្តិសង្គ្រោះបន្ទាន់។ នៅក្នុងនោះដែរ គឺមានការចូលរួមពីកងទ័ពជើងទឹក មកពីរដ្ឋសមាជិកអាស៊ានចំនួន៦ គឺកម្ពុជា ថៃ ឡាវ ភូមា ប្រុយណេ និងហ្វីលីពីន។
ជាការកត់សម្គាល់ លំហាត់សង្គ្រោះបន្ទាន់តាមដែនសមុទ្រសម្រាប់ថ្នាក់តំបន់នេះ គឺគ្មានវត្តមានប្រទេសវៀតណាម ម៉ាឡេស៊ី និងឥណ្ឌូនេស៊ី នោះទេ។ ប្រទេសទាំងអស់នេះ កំពុងតែមានជម្លោះរ៉ាំរ៉ៃ នៅក្នុងវិបត្តិដែនសមុទ្រចិនខាងត្បួង។ លើកលែងតែ ហ្វីលីពីន ដែលជាប្រទេសជាប់ក្នុងជម្លោះសមុទ្រចិនដែរនោះ តែ ហ្វីលីពីន បានចូលរួមធ្វើលំហាត់សមយុទ្ធនេះ ព្រោះថា ហ្វីលីពីន របស់ ប្រធានាធិបតី រ៉ូឌ្រីហ្គូ ឌុយទែរតេ បានអនុវត្តនយោបាយទន់ភ្លន់ ចំពោះចិន។
កាលពីឆ្នាំ២០១៦កន្លងទៅ តុលាការអន្តរជាតិ បានចេញសេចក្តីសម្រេចឲ្យ ហ្វីលីពីន ឈ្នះក្តីចំពោះសំណុំរឿងសមុទ្រចិនខាងត្បួង ក៏ប៉ុន្តែ លោក រ៉ូឌ្រីហ្គូ ឌុយទែរតេ បានបដិសេធមិនអនុវត្តសេចក្តីសម្រេចនោះឡើយ ហើយសុខចិត្តទទួលយកជំនួយវិនិយោគនិងពាណិជ្ជកម្ម រាប់ពាន់លានដុល្លារ ពីប្រទេសចិនទៅវិញ។ ជំហររបស់ហ្វីលីពីនយ៉ាងដូច្នេះ គឺបានធ្វើឲ្យវៀតណាម ខឹងសម្បារ ហើយក៏ត្រូវវៀតណាម រិះគន់ស្តីបន្ទោសហ្វីលីពីនយ៉ាងសម្បើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ