ចិនប្រកាសសន្យាបើកចំហទីផ្សារទៅបារាំងនិងសហភាពអឺរ៉ុប
ថ្ងៃទី២នៃដំណើរទស្សនកិច្ចនៅចិន លោកប្រធានាធិបតីបារាំង អេម៉ាណុយអែល ម៉ាក្រុង ចូលរួមក្នុងពិព័រណ៍ពាណិជ្ជកម្មនៅសៀងហៃ ដោយនៅក្នុងនោះ លោកប្រធានាធិបតីចិន ស៊ី ជីនពីង បានសន្យាបើកចំហទីផ្សារចិនបន្ថែមទៀត។ ទន្ទឹមនេះ ប្រមុខរដ្ឋបារាំង ក៏បានស្វាគមន៍ដោយបើកចំហដៃជានិច្ចរង់ចាំចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅក្នុងសុន្ទរកថាផ្លូវការចំពោះមុខប្រមុខដឹកនាំបារាំង លោកប្រធានាធិបតីចិន ស៊ី ជីនពីង ប្រកាសសន្យាបើកចំហទីផ្សារ ដោយលោកមានសុដិទ្ធិនិយមខ្លាំងមុតមាំចំពោះការបើកចំហនេះ។ ប្រមុខរដ្ឋចិនក៏បានលើកឡើងពីយន្តការដើម្បីជំរុញនិងសម្រួលបរិយាកាសវិនិយោគ ដោយលោក ស៊ី ជីនពីង បញ្ជាក់ឱ្យមន្ត្រីថ្នាក់ក្រោយត្រូវបន្តកិច្ចសហការធ្វើជំនួញទាំងទ្វេភាគីនិងពហុភាគី ឱ្យបានល្អ ព្រមទាំងបន្តអនុវត្តឱ្យខ្ជាប់ខ្ជូននូវដំណើរការជាយុទ្ធសាស្ត្រនៃគម្រោង«ខ្សែក្រវាត់និងផ្លូវ» ជាតទៅទៀត។
ពីភាគីបារាំងវិញ ក្រោយពីឱ្យប្រមុខរដ្ឋចិនភ្លក់រសជាតិស្រាក្រហមបារាំងរួចមក, លោកប្រធានាធិបតីបារាំង អេម៉ាណុយអែល ម៉ាក្រុង បានលើកសរសើរទាក់ទាញចិន ថា«ប៉ុន្មានឆ្នាំចុងក្រោយនេះ ចិនបានប្រឹងប្រែងច្រើនក្នុងការកែសម្រួលនិងកែទម្រង់នៃបរិយាកាសវិនិយោគ ហើយចិនក៏បានជួយកាត់បន្ថយការកម្រិតថ្លៃទំនិញខ្ពស់ពេក ផងដែរ»។ លោកប្រមុខរដ្ឋបារាំងវ័យក្មេង ម៉ាក្រុង សម្តែងទឹកចិត្តថា សហភាពអឺរ៉ុបនិងបារាំង រង់ចាំបើកដៃចំហ ចាំទទួលចិន តែលោកក៏សុំឱ្យចិនត្រូវចេះលួងលោមអឺរ៉ុប និងកែទម្រង់ឱ្យស៊ីជម្រៅជាងនេះបន្ថែមទៀត។
ក្នុងដំណើរទស្សនកិច្ចផ្លូវរដ្ឋជាលើកទីពីររបស់លោក ម៉ាក្រុង នៅស្រុកចិននេះ ថ្នាក់ដឹកនាំបារាំង រំពឹងសង្ឃឹមថានឹងអាចបានចុះកិច្ចព្រមព្រៀងពាណិជ្ជកម្មយ៉ាងធំដុំជាមួយមហាយក្សចិន ដោយក្នុងនោះ លោកម៉ាក្រុងបាននាំអ្នកនិយោគទុននិងប្រធានក្រុមហ៊ុនបារាំងធំៗទៅជាមួយផង។ ចិនជាអតិថិជនលំដាប់ទី៧របស់បារាំង ហើយក៏ជាអ្នកទទួលការនាំចូលទំនិញបារាំង ធំ លំដាប់ទី២។ នៅឆ្នាំ២០១៨កន្លងទៅ ការនាំទំនិញបារាំងចេញទៅស្រុកចិន បានកើនឡើង១១ភាគរយ ដែលមានរង្វង់ទឹកប្រាក់ ប្រមាណ២១ពាន់លានអឺរ៉ូ។
សម្រាប់ថ្ងៃពុធទី៦វិច្ឆិកា ជាថ្ងៃទី៣ បិទបញ្ចប់ដំណើរទស្សនកិច្ច, ប្រមុខរដ្ឋទាំងពីរ គ្រោងនឹងជជែកសំណុំរឿងក្តៅ គឺស្តីពីកិច្ចព្រមព្រៀងអាកាសធាតុក្រុងប៉ារីស។ ជាកិច្ចព្រមព្រៀងគិតគូរថែរក្សាការពារបរិស្ថាននិងអាកាសធាតុពិភពលោក ដែលអាមេរិករបស់លោក ដូណាល់ ត្រាំ ដកខ្លួនជាឯកតោភាគី ដោយចិត្តឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ