គ្រោះថ្នាក់ផ្លូវដែក៖ អ្នកកាសែត និងមេធាវីត្រូវអាជ្ញាធរបញ្ជាឲ្យបិទមាត់
គ្រោះថ្នាក់ រថភ្លើងលឿនបុកគ្នា នៅក្នុងប្រទេសចិនបានកន្លងផុតទៅ។ នៅជិតមួយសប្តាហ៍ក្រោយ ព័ត៌មានស្តីពីព្រឹត្តិការណ៍នេះត្រូវបានស្ងប់ស្ងាត់ទៅវិញ។ តាំងពីល្ងាចថ្ងៃសុក្រ កាសែតក្នុងស្រុក ជាភាសាចិន និងបរទេសត្រូវអាជ្ញាធរចិនហាមឃាត់ មិនឲ្យចុះផ្សាយអត្ថបទទាក់ទងនឹងគ្រោះមហន្តរាយដែលបានសម្លាប់មនុស្ស ៤០នាក់។ ចំណែកការិយាល័យមេធាវីវិញ ទើបបានទទួលលិខិតបញ្ជាបន្ទាន់ នៅថ្ងៃសៅរ៍ទី៣០កក្កដា ២០១១ ពីសមាគមមេធាវីប្រចាំទីក្រុងWenzhou ដែលបានដាស់តឿនមេធាវី មិនឲ្យទទួលករណីបណ្តឹងពីគ្រួសារជនរងគ្រោះដោយគ្រោះថ្នាក់បុក រថភ្លើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
សេចក្តីថ្លែងការណ៍រួមធ្វើឡើងដោយការិយាល័យច្បាប់ និងសមាគមមេធាវី ដែលបានផ្ញើទៅកាន់ក្រុមមេធាវីបានសរសេរថា មេធាវីត្រូវរាយការណ៍ទៅស្ថាប័នទាំងពីរខាងលើជាបន្ទាន់ បើសិនជាមានក្រុមគ្រួសាររបស់ជនរងគ្រោះក្នុងគ្រោះថ្នាក់រថភ្លើងចង់មករកជំនួយការពារផ្នែកច្បាប់។ សមាគមមេធាវី និងការិយាល័យច្បាប់របស់រដ្ឋនៅបានក្រើនរំលឹកដល់មេធាវី កុំឲ្យសម្រេចតែចិត្តឯង ដើម្បីចេញមុខការពារជនរងគ្រោះ ព្រោះថា ករណីគ្រោះថ្នាក់រថភ្លើងលើកនេះ មានលក្ខណៈរសើបខ្លាំង ហើយដែលអាចនឹងប៉ះពាល់ដល់ស្ថិរភាពសង្គម។
ទីភ្នាក់ងារព័ត៌មានចិន Xinhua បានស្រង់សំដីរបស់ប្រធានការិយាល័យច្បាប់ប្រចាំទីក្រុងWenzhou ដែលបានចេញមុខសុំទោសចំពោះសេចក្តីថ្លែងការណ៍ខាងលើ និងដែលនិយាយថា គឺមេធាវីមួយក្រុមក្នុងការិយាល័យដែលបានប្រមូលគ្នាសរសេរសេចក្តីថ្លែងការណ៍ និងចែកចាយ ដោយគ្មានបានសុំការអនុញ្ញាតពីប្រធានការិយាល័យច្បាប់។ ចំណែកប្រធានសមាគមមេធាវីវិញបានទទួលស្គាល់ថា ខ្លួនពិតជាបានផ្ញើបទបញ្ជាទៅមេធាវីមែន ប៉ុន្តែ ក្នុងន័យដាស់តឿនផ្សេង។ នោះគឺសមាគមមានការបារម្ភថានឹងអាចមានជម្លោះកើតឡើង ប្រសិនបើគេមិនអាចបែងចែកសេវាច្បាប់ទៅដល់ជនរងគ្រោះគ្រប់ៗគ្នា។
គ្រោះថ្នាក់រថភ្លើងលឿនបុកគ្នា កាលពីថ្ងៃសៅរ៍ទី២៣ កក្កដា ដែលបានបណ្តាលឲ្យមនុស្សស្លាប់ ៤០នាក់ និងរបួស២០០នាក់ បានធ្វើឲ្យមានសំណួរជាច្រើនចោទសួរឡើងពីសមត្ថភាពរបស់អាជ្ញាធរក្នុងការធានាសុវត្ថិភាពដល់ប្រជាជន។ ក្រោយថ្ងៃកើតហេតុ សំណួរចោទសួរ បទអត្ថាធិប្បាយរិះគន់ការងារគ្រប់គ្រងរបស់អាជ្ញាធរចិនត្រូវបានគេឃើញជាហូរហែក្នុងគ្រប់កាសែត។ ប៉ុន្តែ ចាប់តាំងពីល្ងាចថ្ងៃសុក្រ អាជ្ញាធរទទួលបន្ទុកឃោសនាការចិនទើបចេញបញ្ជា ហាមគ្រប់កាសែតទាំងអស់ មិនឲ្យសរសេរព័ត៌មានទាក់ទងគ្រោះថ្នាក់រថភ្លើងទៀតទេ។ គេអាចសរសេរបានតែព័ត៌មានណាដែលនិយាយពីចំណុចល្អ និង ព័ត៌មានដែលអាជ្ញាធរផ្តល់ឲ្យតែប៉ុណ្ណោះ។
បញ្ជាហាម បិទមិនឲ្យប្រព័ន្ធផ្សព្វផ្សាយនិយាយពីគ្រោះថ្នាក់រថភ្លើងបុកគ្នា បានធ្វើឲ្យកាសែតក្នុងស្រុកជាភាសាអង់គ្លេសមួយចំនួនត្រូវដកហូតទំព័ររបស់ខ្លួនខ្លះ ឬដកចេញពីតូបលក់កាសែតតែម្តង។ នាយកដ្ឋានទំនាក់ទំនងបក្សកុម្មុយនិស្តចិនបាននិយាយប្រាប់កាសែត Sunday Morning Post ថា នៅក្រោយគ្រោះថ្នាក់រថភ្លើងបុកគ្នា មតិសាធារណៈនៅចិន និងនៅក្រៅប្រទេសបានបង្កឲ្យមានការស្មុគស្មាញកាន់តែច្រើនដល់អាជ្ញាធរ។ ដូច្នេះ គ្រប់កាសែត ទស្សនាវដ្តី និងប្រព័ន្ធអ៊ិនធ័រណេតត្រូវបន្ថយល្បឿនឈប់និយាយពីរឿងនេះតទៅទៀត។
អាជ្ញាធរចេញបទបញ្ជាដាច់ណាត់លើកនេះ បន្ទាប់ពីកាសែតផ្លូវរដ្ឋរបស់ចិនខ្លួនឯងក៏ធ្លាប់បានសរសេររិះគន់ខ្លាំងៗដល់ការងារធ្វេសប្រហែលរបស់មន្រ្តីចិនទទួលបន្ទុកការងារផ្លូវដែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ