អង្គការលើកលែងទោសអន្តរជាតិ ចេញរបាយការណ៍រិះគន់តុលាការកម្ពុជា ចំពេលឃោសនាបោះឆ្នោត
អង្គការលើកលែងទោសអន្តរជាតិ (Amnesty International) នៅថ្ងៃទី ៣០ ឧសភា នេះ បានចេញផ្សាយរបាយការណ៍ថ្មី ស្តីពី “ប្រព័ន្ធតុលាការដែលមិនយុត្តិធម៌”នៅកម្ពុជា។ ជារបាយការណ៍ដែលបានរិះគន់ប្រព័ន្ធយុត្តិធម៌នៅកម្ពុជា ចំពេលដែលប្រទេសនេះ កំពុងរៀបចំយុទ្ធនាការឃោសនាបោះឆ្នោត។ សម្រាប់គណបក្សប្រឆាំង បានស្វាគមន៍ចំពោះរបាយការណ៍នេះ ប៉ុន្តែអ្នកនាំពាក្យរដ្ឋាភិបាលកម្ពុជា បានចាត់ទុករបាយការណ៍នេះថា មានចរិតនយោបាយ និងលំអៀងទៅរកគណបក្សប្រឆាំង។
ចុះផ្សាយនៅថ្ងៃ៖
ស្តាប់ - ០២:២៨
នៅក្នុងរបាយការណ៍ជាភាសាអង់គ្លេសកម្រាស់ជាង៣០ទំព័រនេះ បានចោទដោយត្រង់ៗទៅលើរដ្ឋាភិបាលកម្ពុជាថា កំពុងប្រើប្រាស់ប្រព័ន្ធតុលាការ ដើម្បីបំបិតសំឡេងអ្នករិះគន់រដ្ឋាភិបាលកម្ពុជា។ របាយការណ៍ដែលមានចំណងជើងថា “ប្រព័ន្ធតុលាការដែលមិនយុត្តិធម៌” នេះ បានកត់សំគាល់ថា ចាប់តាំងពីក្រោយការបោះឆ្នោតជាតិកាលពីខែកក្កដាឆ្នាំ២០១៣មក ប្រព័ន្ធតុលាការកម្ពុជា ហាក់បានតម្រង់ទិសវាយប្រហារទៅលើអ្នកការពារសិទ្ធិមនុស្ស សកម្មជនសហជីព សកម្មជនដីធ្លី និងសកម្មជនគណបក្សប្រឆាំង ដែលជាគូប្រជែងដ៏ខ្លាំងក្លារបស់គណបក្សកាន់អំណាច។
បើតាម Amnesty International ការក្តាប់យកប្រព័ន្ធយុត្តិធម៌យ៉ាងណែនដៃ បាននាំអំណាចឲ្យរាជរដ្ឋាភិបាលកម្ពុជា ក្នុងការចោទប្រកាន់ និងចាប់ខ្លួន ទៅលើសមាជិកនិងសកម្មជនគណបក្សប្រឆាំង ដែលគិតមកទល់នឹងពេលនេះ មានសកម្មជនសិទ្ធិមនុស្ស អ្នកនយោបាយសរុប២៧នាក់ហើយ ដែលត្រូវបានចាប់ឃុំខ្លួននៅក្នុងពន្ធនាគារ ហើយមនុស្សជាង១០០នាក់ផ្សេងទៀត បានក្លាយជាកម្មវត្ថុនៃការចោទប្រកាន់ក្នុងសំណុំរឿងព្រហ្មទណ្ឌ។ របាយការណ៍នេះ បានចោទប្រកាន់តុលាការកម្ពុជាដោយត្រង់ៗដែរថា មានចេតនារក្សាទុកសំណុំរឿងជាច្រើនដោយមិនដំណើរការស៊ើបអង្កេតឬកាត់ទោសនោះទេ។
អ្វីជាការកត់សំគាល់ ការចេញផ្សាយរបាយការណ៍របស់អង្គការលើកលែងទោសអន្តរជាតិនៅពេលនេះ គឺចំពេលដែលប្រទេសកម្ពុជាកំពុងរៀបចំការបោះឆ្នោតឃុំសង្កាត់អាណត្តិទី៤ ដែលអ្នកវិភាគមួយចំនួនបានលើកឡើងថា អាចនឹងធ្វើឲ្យប៉ះពាល់ដល់ប្រជាប្រិយភាពរបស់គណបក្សកាន់អំណាចផងដែរ។ ប៉ុន្តែអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានចាត់ទុករបាយការណ៍នេះថា ជារបាយការណ៍ដែលមានចរិតនយោបាយ និងគ្មានតម្លៃសម្រាប់ការគិតនោះទេ។ លោកបានចាត់ទុករបាយការណ៍នេះថា បានសំដៅវាយប្រហារមកលើរដ្ឋាភិបាលនៅមុនពេលបោះឆ្នោត។ យ៉ាងណាក៏ដោយ លោក ផៃ ស៊ីផាន បានការពារចំណាត់ការរបស់តុលាការកម្ពុជាលើករណីទាំងនេះថា គឺជាការអនុវត្តច្បាប់តែប៉ុណ្ណោះ។
ចំណែក លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានស្វាគមន៍ចំពោះរបាយការណ៍នេះនិងបានចាត់ទុកថា ជារបាយការណ៍ដែលបានផ្តល់ភាពយុត្តិធម៌ដល់គណបក្សប្រឆាំង សកម្មជនសិទ្ធិមនុស្ស និងអ្នកអត្ថាធិប្បាយមួយចំនួន ដែលកំពុងរងបណ្តឹងនៅក្នុងប្រព័ន្ធតុលាការកម្ពុជា។ លោកបានចាត់ទុករបាយការណ៍នេះថា នឹងអាចជួយដល់ការសម្រេចចិត្តរបស់ប្រជាពលរដ្ឋកម្ពុជា នៅក្នុងពេលបោះឆ្នោតនាពេលខាងមុខនេះ។
យ៉ាងណាក៏ដោយ នៅពេលបិទបញ្ចប់របាយការណ៍របស់ខ្លួន Amnesty International បានផ្តល់អនុសាសន៍ជាច្រើនចំណុចដល់រដ្ឋាភិបាលកម្ពុជា ក្នុងនោះក៏បានទាមទារឲ្យតុលាការកម្ពុជា ទម្លាក់ចោលការចោទប្រកាន់ទៅលើសកម្មជនទាំងនោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ