ក្រសួងដែនដីនិងក្រុមហ៊ុនជប៉ុន គ្រោងសង់អគារប៊ូឌីញថ្មី ក្នុងតម្លៃ៨០លានដុល្លារ
ក្រសួងរៀបចំដែនដី នគរូបនីយកម្ម និងសំណង់ សហការជាមួយក្រុមហ៊ុនជប៉ុន Arakawa គ្រោងសង់អគារប៊ូឌីញសថ្មី ក្នុងតម្លៃ៨០លានដុល្លារ ខណៈសំណង់អគារប៊ូឌីងសដ៏ចំណាស់នៅចំកណ្ដាលក្រុងភ្នំពេញកំពុងរងការខូចខាត និងទ្រុឌទ្រោម។ ប្លង់មេនៃគម្រោងនេះ ត្រូវបានបង្ហាញកាលពីព្រឹកមិញ នៅទីស្ដីការក្រសួងដែនដី ដោយមានការចូលរួមពីប្រជាពលរដ្ឋតំណាងសហគមន៍ប៊ូឌីញស និងអង្គការសង្គមស៊ីវិលពាក់ព័ន្ធផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
នៅចំពោះមុខតំណាងប្រជាពលរដ្ឋនៃសហគមន៍ប៊ូឌីញស នៅថ្ងៃព្រហស្បតិ៍ទី២៧តុលានេះ លោក ជា សុផារ៉ា រដ្ឋមន្ដ្រីក្រសួងដែនដី នគរូបនីយកម្មនិងសំណង់ បានប្រកាសពីគម្រោងសាងសង់អគារប៊ូឌីញសថ្មី ក្នុងតម្លៃ៨០លានដុល្លារ។ គម្រោងរបស់ក្រសួងដែនដីនេះ ធ្វើឡើងដោយសហការជាមួយក្រុមហ៊ុនជប៉ុន Arakawa ក្នុងគោលដៅធានាការរស់នៅប្រកបដោយសុវត្ថិភាព និងសុខុមាលភាព ខណៈអគារប៊ូឌីញស មានសភាពចាស់ទ្រុឌទ្រោម មិនមានការថែទាំ និងអាចប៉ះពាល់យ៉ាងខ្លាំងដល់សុវត្ថិភាពនិងសុខុមាលភាពរបស់ប្រជាពលរដ្ឋដែលរស់នៅទីនោះ។
បើតាមលោករដ្ឋមន្ដ្រី គម្រោងនេះរួមមាន ការសាងសង់ទីតាំងស្នាក់នៅបណ្ដោះអាសន្ននិងអគារថ្មីមានកម្ពស់២១ជាន់ ដែលក្នុងនោះត្រៀមធ្វើទីតាំងចំណត៣ជាន់ កន្លែងលក់ដូរ១ជាន់ និងកន្លែងស្នាក់នៅ៥ជាន់។ បន្ទប់ស្នាក់នៅនីមួយៗ នឹងមានទំហំធំជាងមុន១០ភាគរយ ហើយចាប់ពីជាន់ទី៩ឡើងទៅ នឹងផ្ដល់ជាកម្មសិទ្ធិវិនិយោគរបស់ក្រុមហ៊ុន Arakawa។
លោក ជា សុផារ៉ា បានស្នើឲ្យប្រជាពលរដ្ឋជឿជាក់លើរដ្ឋាភិបាល និងអត់ធ្មត់រង់ចាំអគារប៊ូឌីញសថ្មី ដែលនឹងលេចរូបរាងឡើងនៅក្នុងរយៈពេល៤ឆ្នាំខាងមុខ។ ជាអគារថ្មី ដែលលោករដ្ឋមន្ដ្រីជឿជាក់ថា នឹងផ្លាស់ប្ដូរជីវភាពរស់នៅរបស់ប្រជាពលរដ្ឋនៅក្នុងអគារប៊ូឌីញសជាក់ជាពុំខាន។
នាយកលេខាធិការដ្ឋាន នៃអង្គការក្រុមការងារពិសេសសិទ្ធិលំនៅឋាន លោក សៀរ ភារម្យ បានសាទរ និងគាំទ្រចំពោះគម្រោងអភិវឌ្ឍន៍នេះ។ យ៉ាងណាក៏ដោយ លោក សៀ ភារម្យ ដែលបានចូលរួមនៅក្នុងជំនួបរវាងលោកជា សុផារ៉ា និងតំណាងប្រជាពលរដ្ឋនៃសហគមន៍ប៊ូឌីញស នៅថ្ងៃព្រហស្បតិ៍នេះដែរ កំពុងតែរង់ចាំមើលជំហររបស់ប្រជាពលរដ្ឋ នៅចំពោះមុខគម្រោងអភិវឌ្ឍនេះដែរ។ ប្រសិនបើប្រជាពលរដ្ឋយល់ព្រមតាមសំណើរបស់ក្រសួងដែនដី នោះគម្រោងអភិវឌ្ឍអគារប៊ូឌីញសនឹងក្លាយទៅជាយុទ្ធសាស្ត្រឈ្នះ-ឈ្នះសម្រាប់គ្រប់ភាគី ទាំងសម្រាប់ប្រជាពលរដ្ឋ រដ្ឋាភិបាល និងក្រុមហ៊ុនវិនិយោគ។ នេះបើតាមលោក សៀ ភារម្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ