ហុងគ្រី ឈរខាងកម្ពុជាជុំវិញភាពចម្រូងចម្រាស់ EBA រវាងកម្ពុជានិងសហភាពអឺរ៉ុប
នាយករដ្ឋមន្ត្រីហុងគ្រី លោក វិចទ័រ អ័របេន (Viktor Orban) បានថ្លែងថា ជំហររបស់ ហុងគ្រី តែងគាំទ្រជានិច្ច ជុំវិញការប្រទាញប្រទង់គ្នារឿងចំណាត់ការដកប្រព័ន្ធអនុគ្រោះពន្ធ អ្វីៗទាំងអស់លើកលែងតែអាវុធ (EBA) របស់សហភាពអឺរ៉ុប ពីប្រទេសកម្ពុជា។ ការលើកឡើងរបស់នាយករដ្ឋមន្ត្រីហុងគ្រីដូច្នេះ ធ្វើឡើងបន្ទាប់ពី មានជំនួបទ្វេរភាគីមួយកាលពីថ្ងៃទី១៣ ខែឧសភា ជាមួយលោកនាយករដ្ឋមន្ត្រី ហ៊ុន សែន តាមរយៈដំណើរទស្សនកិច្ចនៅប្រទេសហុងគ្រី និងចូលរួមសន្និសីទកំពូល CICA នៅប្រទេសតាគីជីស្ថាន។
ចុះផ្សាយនៅថ្ងៃ៖
ស្តាប់ - ០២:១៣
នៅក្នុងជំនួបជាមួយលោកនាយករដ្ឋមន្ត្រីហ៊ុន សែន រយៈពេលជិត២ម៉ោង លោកនាយករដ្ឋមន្ត្រីហុងគ្រី វិចទ័រ អ័របេន បានលើកឡើងថា បញ្ហាEBA វាគឺជារឿងខ្វែងគំនិតគ្នារវាងសហភាពអឺរ៉ុប និងកម្ពុជា ផ្ទុយទៅវិញហុងគ្រី តែងតែឈរ និងគាំទ្រកម្ពុជាជានិច្ច។
លោកនាយករដ្ឋមន្ត្រី ហុងគ្រី បញ្ជាក់ដែរថា ហុងគ្រី មិនគាំទ្របញ្ហានយោបាយ និងបញ្ហាពាណិជ្ជកម្ម សេដ្ឋកិច្ច ដែលមានភាពច្របូកច្របល់គ្នានោះទេ ព្រមទាំងប្រាប់ឲ្យលោកនាយករដ្ឋមន្ត្រី ហ៊ុន សែន ទុកចិត្តចំពោះហុងគ្រី ដែលជាសមាជិកមួយរួបរបស់សហភាពអឺរ៉ុប ក្នុងការតស៊ូមតិជាមួយនឹងសហភាពអឺរ៉ុបទាក់ទិនទៅនឹងបញ្ហាEBA នេះ។
សូមបញ្ជាក់ថាជំនួបពិភាក្សារវាងប្រមុខរដ្ឋាភិបាលទាំងពីរ ដែលរំលេចឡើងនូវប្រធានបទ EBA នៅទីក្រុងប៊ុយដាប៉េសនេះ គឺធ្វើឡើងបន្ទាប់ពីមន្ត្រីរបស់គណៈកម្មការអឺរ៉ុប និងមន្ត្រីទទួលបន្ទុកកិច្ចការអន្តរជាតិអឺរ៉ុប បានបញ្ចប់បេសកកម្មស្វែងរកការពិតរបស់ខ្លួនរយៈពេល១សប្តាហ៍ នៅកម្ពុជាកាលពីដើមខែនេះ។ ទស្សនកិច្ចនេះ ជាផ្នែកមួយនៃការត្រួតពិនិត្យ និងវាយតម្លៃដែលនឹងធ្វើឡើងរហូតដល់ពាក់កណ្ដាលខែសីហា ដែលជានីតិវិធីមុនឈានដល់ការសម្រេចថា តើត្រូវព្យួរប្រព័ន្ធអនុគ្រោះពន្ធ EBA ពីកម្ពុជាឬក៏អត់។
ដោយឡែក ទស្សនកិច្ចរបស់លោកនាយករដ្ឋមន្ត្រី ហ៊ុន សែន នៅប្រទេសហុងគ្រី ក៏បាននាំមកនូវការចុះកិច្ចព្រមព្រៀងចំនួន៣ផងដែរគឺ ទី១៖ កិច្ចព្រមព្រៀងរវាងរដ្ឋាភិបាលកម្ពុជា និងរដ្ឋាភិបាលហុងគ្រី ស្តីពីកិច្ចសហប្រតិបត្តិការសេដ្ឋកិច្ច។ ទី២៖ កម្មវិធីផ្លាស់ប្តូរវិស័យអប់រំ រវាងក្រសួងអប់រំកម្ពុជា និងក្រសួងធនធានមនុស្សហុងគ្រីសម្រាប់ឆ្នាំ២០២០ ២០២១ និងឆ្នាំ២០២២។ ទី៣៖ អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការ និងអភិវឌ្ឍន៍ធនធានមនុស្ស ទេសចរណ៍ រវាងវិទ្យាស្ថានជាតិទេសចរណ៍កម្ពុជា ជាមួយសាកលវិទ្យាល័យ Milton Friedman University នៃប្រទេសហុងគ្រី។
ដោយឡែក សមភាគីកម្ពុជា-ហុងគ្រី ក៏បានឯកភាពគ្នា បើកស្ថានទូតជាថ្មីឡើងវិញ នៅឆ្នាំ២០២១ ដែលជាខួប៦៥ឆ្នាំ នៃទំនាក់ទំនងការទូតប្រទេសទាំងពីរ រួមនឹងស្នើឲ្យហុងគ្រី ជួយជួសជុលប្រាសាទកោះកេរ ស្ថិតនៅក្នុងខេត្តព្រះវិហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ