វៀតណាមទាមទារជាថ្មីឲ្យកម្ពុជាផ្តល់សិទ្ធិស្របច្បាប់ដល់ជនជាតិខ្លួន
បន្ទាប់ពីរដ្ឋាភិបាលកម្ពុជាប្រកាសថានឹងដកហូតឯកសារពីជនបរទេសដែលកាន់កាប់មិនប្រក្រតីឬអាចនិយាយបានថាកាន់កាប់ដោយខុសច្បាប់ រហូតដល់៧ម៉ឺននាក់ ដែលភាគច្រើនជាជនជាតិវៀតណាមនោះ រដ្ឋាភិបាលវៀតណាមបានបញ្ចេញប្រតិកម្មតបភ្លាមៗ។ តែមន្រ្តីក្រសួងមហាផ្ទៃបញ្ជាក់ថានេះជាការអនុវត្តច្បាប់របស់ប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
អត្ថបទដោយ៖ អ៊ឹង ប៊ុនថន
តាមរយៈសេចក្តីថ្លែងការណ៍នៅថ្ងៃអង្គារ វៀតណាមបានអំពាវនាវដល់រដ្ឋាភិបាលកម្ពុជា ធានាសិទ្ធិស្របច្បាប់ដល់ជនអន្តោប្រវេសន៍របស់ខ្លួនដែលកំពុងរស់នៅលើទឹកដីខ្មែរ។ការអំពាវនាវនេះធ្វើឡើងក្រោយពីក្រសួងមហាផ្ទៃកម្ពុជាកាលពីពេលថ្មីៗនេះ បានលើកឡើងថា នឹងដកហូតឯកសារមិនត្រឹមត្រូវពីជនអន្តោប្រវេសន៍ប្រហែល៧ម៉ឺននាក់ដែលភាគច្រើនជាជនជាតិវៀតណាម។
អ្នកនាំពាក្យក្រសួងការបរទេសវៀតណាមលោកស្រី ឡេធីធូហាំង បាននិយាយនៅក្នុងសេចក្តីថ្លែងការណ៍ថាវៀតណាមសង្ឃឹមថាប្រទេសកម្ពុជានឹងចាត់វិធានការសមស្របដើម្បីធានាសិទ្ធិស្របច្បាប់ដល់ជនជាតិវៀតណាមនៅកម្ពុជា។ នេះបើតាមទីភ្នាក់ងារសារព័ត៌មាន Reuter ។
ស្រ្តីអ្នកនាំពាក្យរូបនេះ បញ្ជាក់ថា "វៀតណាមសង្ឃឹមថាពួកគេនឹងមានឯកសារស្របច្បាប់កាន់កាប់និងអាចរក្សាជីវិតដោយមានស្ថេរភាពនិងបន្តរួមចំណែកដល់ការអភិវឌ្ឍសេដ្ឋកិច្ចរបស់កម្ពុជា "។
ឆ្លើយតបនឹងការទាមទាររបស់វៀតណាមនេះ លោក ខៀវ សុភ័គ អ្នកនាំពាក្យសួងមហាផ្ទៃ ប្រាប់វិទ្យុបារាំងRFIថា ចំណាត់ការរបស់កម្ពុជា ធ្វើឡើងទៅតាមផ្លូវច្បាប់ដោយថាមិនចាប់បញ្ជួនចេញទាំងឡានៗដូចកាលពីសម័យ លន់ នល់ និងសម័យប៉ុល ពត នោះទេ។
បើតាមលោក ខៀវ សុភ័គ ជនជាតិវៀតណាមដែលកាន់កាប់ឯកសារខុសច្បាប់នេះគឺធ្វើឡើងដោយក្រសួងមហាផ្ទៃតាំងទស្សវត្ស៨០មកម្លេះ។ លោកថា ឯកសារខុសច្បាប់ខ្លះដែលផ្តល់សញ្ជាតិឲ្យជនជាតិវៀតណាមខ្លះគឺធ្វើឡើងដោយមន្រ្តីក្រសួងមហាផ្ទៃមួយចំនួនកាលពីជំនាន់មុន។
លោក ខៀវ សុភ័គ អះអាងថាមូលហេតុដែលក្រសួងមហាផ្ទៃទើបចាប់ផ្តើមដកហូតឯកសារខុសច្បាប់ទាំងនោះពីជនជាតិវៀតណាមវិញគឺដោយសារទើបតែមានច្បាប់ថ្មី។
បើតាមរបាយការណ៍ របស់ក្រសួងមហាផ្ទៃ ជនបរទេសអន្តោប្រវេសន៍ នៅកម្ពុជាសរុបជាង ១៦ម៉ឺននាក់ ក្នុងនោះ ជនជាតិវៀតណាម មានរហូតដល់ទៅជាង៩៩%ឬស្មើនឹងជាង១៥ម៉ឺននាក់។ ប៉ុន្តែមជ្ឈដ្ឋានខ្លះក៏ដូចជាក្រុមគណបក្សនៅក្រៅរដ្ឋាភិបាលមួយចំនួន ជឿជាក់ថាជនជាតិវៀតណាមនៅកម្ពុជា មានចន្លោះពី ៧សែនទៅ១លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ