បក្សកាន់អំណាចស្នើឲ្យក្រសួងពាក់ព័ន្ធចាត់វិធានការចំពោះអ្នកប្រើរថយន្តរដ្ឋឃោសនាឲ្យបក្ស
គណបក្សប្រជាជននឹងស្នើឲ្យក្រសួងមហាផ្ទៃ ក្រសួងការពារជាតិ និងគណៈកម្មាធិការជាតិរៀបចំការបោះឆ្នោត (គ.ជ.ប) ចាត់វិធានការផ្លូវច្បាប់ចំពោះអ្នកគាំទ្របក្សរបស់ខ្លួន ដែលប្រើប្រាស់រថយន្តរដ្ឋចូលរួមឃោសនា ។ នេះបើតាមអ្នកនាំពាក្យគណបក្សប្រជាជន។ ចំណាត់ការនេះ ធ្វើឡើងក្រោយពីមានរូបភាពចែកចាយតាមបណ្តាញសង្គម បង្ហាញពីការប្រើប្រាស់រថយន្តរដ្ឋបិទសញ្ញាគណបក្សសម្រាប់យុទ្ធនាការឃោសនាបោះឆ្នោត។
ចុះផ្សាយនៅថ្ងៃ៖
ស្តាប់ - ០១:៥៦
លោក សុខ ឥសាន អ្នកនាំពាក្យគណបក្សកាន់អំណាចបានថ្លែងប្រាប់វិទ្យុបារាំងអន្តរជាតិនាថ្ងៃទី១១ ខែកក្កដានេះថា ប្រសិនបើមានករណីយករថយន្តស្លាកលេខ នគរបាល និងស្លាកលេខ ខេមរភូមិន្ទ ទៅប្រើប្រាស់ក្នុងការឃោសនាមែន នោះគឺជាកំហុសឆ្គងរបស់បុគ្គលតែប៉ុណ្ណោះ ពីព្រោះថ្នាក់ដឹកនាំគណបក្សកាន់អំណាចមិនមានគោលការណ៍ឲ្យប្រើរថយន្តរដ្ឋនោះទេ។
អ្នកនាំពាក្យរូបនេះឲ្យដឹងទៀតថា គណបក្សបានប្រជុំគណៈកម្មាធិការកណ្តាល ដើម្បីរាយការណ៍ទៅក្រសួងមហាផ្ទៃ និងក្រសួងការពារជាតិ។ តាមរយៈសេចក្ដីរាយការណ៍នេះ ក្រសួងទាំងពីរ នឹងត្រួតពិនិត្យទៅលើបុគ្គលណាដែលល្មើសនឹងច្បាប់ស្តីពីការបោះឆ្នោត មុននឹងចាត់វិធានការផ្ទៃក្នុងចំពោះបុគ្គលនោះ។ លោកបន្ថែមថា គណបក្សក៏បានទាក់ទងទៅ គ.ជ.ប ដើម្បីឲ្យស្ថាប័នរៀបចំការបោះឆ្នោតមួយនេះ ចាត់វិធានការផ្លូវច្បាប់ចំពោះអ្នកប្រើប្រាស់សម្បត្តិរដ្ឋ យកទៅឃោសនាឲ្យគណបក្សដែរ។
គួរកត់សម្គាល់ថា នៅមុនការឃោសនាបោះឆ្នោត រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងការពារជាតិ និងលោកនាយករដ្ឋមន្ត្រី ហ៊ុន សែន ផង បានអំពាវនាវមិនឲ្យមន្ត្រីប្រើប្រាស់ទ្រព្យសម្បត្តិរដ្ឋ ឬថវិការដ្ឋ ក្នុងការឃោសនាបំរើគណបក្សនយោបាយនោះទេ។ លោក ហ៊ុន សែន បញ្ចាក់ថា គ្មានគណបក្សនយោបាយណាមានលទ្ធភាពក្នុងការប្រើប្រាស់មធ្យោបាយរដ្ឋទេ គឺមានតែគណបក្សប្រជាជនកម្ពុជា ដូច្នេះត្រូវហាមដាច់ខាតការប្រើប្រាស់រថយន្ត ដែលមានស្លាកលេខ ខេមរភូមិន្ទ ឬនគរបាល។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និកហ្វិក) បានថ្លែងថា គណបក្សគួរតែចេញសេចក្តីព្រមាន ឬណែនាំ ចំពោះបុគ្គលណា ដែលប្រើប្រាស់មធ្យោបាយរដ្ឋក្នុងការឃោសនាបំរើគណបក្ស។ លោកបន្តថា សកម្មភាពទាំងនេះ នឹងធ្វើឲ្យប៉ះពាល់ដល់គណបក្សកាន់អំណាច។
សូមជម្រាបជូនថា ការឃោសនាបោះឆ្នោតនីតិកាលទី៦ ធ្វើឡើងចាប់ពីថ្ងៃទី០៧ ដល់ថ្ងៃទី២៧ ខែកក្កដា ហើយការបោះឆ្នោតនឹងត្រូវធ្វើឡើងនៅថ្ងៃទី២៩ ខែកក្កដា។ ការបោះឆ្នោតនេះ មានគណបក្សនយោបាយចំនួន២០ចូលរួម ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ