អាមេរិកប្រកាសលែងផ្តល់ទិដ្ឋាការដល់មន្រ្តីខ្មែរដែលខ្លួនចាត់ទុកថា បានចូលរួមបំផ្លាញលទ្ធិប្រជាធិបតេយ្យនៅកម្ពុជា
ក្រសួងការបរទេសអាមេរិកនឹងលែងផ្តល់ទិដ្ឋាការដល់មន្រ្តីរដ្ឋាភិបាលកម្ពុជាមួយចំនួនក្នុងការធ្វើដំណើរទៅកាន់សហរដ្ឋអាមេរិក ក្រោមហេតុផលថា មន្រ្តីទាំងនោះបានរួមចំណែកបំផ្លាញលទ្ធិប្រជាធិបតេយ្យនៅកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងការបរទេសអាមេរិកនៅថ្ងៃទី៦ ធ្នូ។ ចំពោះវិធានការនេះ មន្រ្តីរដ្ឋាភិបាលកម្ពុជាបានចាត់ទុកថា ជាទង្វើមួយបំផ្លាញលទ្ធិប្រជាធិបតេយ្យនៅកម្ពុជាទៅវិញទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
មន្រ្តីរដ្ឋាភិបាលកម្ពុជាដែលអាមេរិកប្រកាសដាក់ទណ្ឌកម្មផ្នែកទិដ្ឋាការនេះ គឺសំដៅទៅលើមន្ត្រីទាំងឡាយណាដែលជាប់ពាក់ព័ន្ធក្នុងអ្វីដែលអាមេរិកចាត់ទុកថា ជាការបំផ្លាញលទ្ធិប្រជាធិបតេយ្យនៅក្នុងប្រទេសកម្ពុជា។ ទង្វើបំផ្លាញលទ្ធិប្រជាធិបតេយ្យនេះ គឺអាមេរិកចង់សំដៅទៅលើការរំលាយគណបក្សប្រឆាំងដ៏ធំជាងគេនៅកម្ពុជា និងការហាមឃាត់មិនឲ្យថ្នាក់ដឹកនាំគណបក្សនេះធ្វើសកម្មភាពនយោបាយ ការចាប់លោកកឹម សុខា ដាក់ពន្ធនាគារ ការរឹតបន្តឹងលើសង្គមស៊ីវិល និងការបង្រ្កាបលើប្រព័ន្ធផ្សព្វផ្សាយមួយចំនួនទៀត។
យ៉ាងណាក៏ដោយ ក្រសួងការបរទេសអាមេរិកមិនបានចុចឲ្យចំឈ្មោះថាតើមានមន្រ្តីរដ្ឋាភិបាលកម្ពុជាណាខ្លះទេ ប៉ុន្តែបានបញ្ជាក់ឲ្យដឹងថា សមាជិកគ្រួសាររបស់មន្រ្តីទាំងនោះ ក៏នឹងត្រូវលែងផ្តល់ទិដ្ឋាការក្នុងការចូលទៅកាន់ដឹកដីអាមេរិកផងដែរ។ បន្ថែមលើវិធានការថ្មីនេះ អាមេរិកក៏បានអំពាវនាវឲ្យរដ្ឋាភិបាលកម្ពុជាបង្វិលស្ថានការទាំងអស់ឲ្យដូចដើមឡើងវិញដែលទង្វើនេះអាចឈានទៅរកការលើកលែងទណ្ឌកម្មថ្មីរបស់អាមេរិកនេះវិញ ។
លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីកម្ពុជាបានចាត់ទុកការប្រកាសដាក់ទណ្ឌកម្មផ្នែកទិដ្ឋាការរបស់អាមេរិកនេះថា ជាទង្វើបំផ្លាញលទ្ធិប្រជាធិបតេយ្យដែលខ្លួនបានកសាងនៅកម្ពុជា ហើយវាក៏ជាការបំផ្លាញនូវទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរផងដែរ។ សម្រាប់រដ្ឋាភិបាលកម្ពុជា លោកផៃ ស៊ីផាន អះអាងថា ការអំពាវនាវរបស់អាមេរិកគឺមិនអាចធ្វើតាមបានទេ ដោយកម្ពុជានៅតែបន្តដើរទៅមុខដដែល។
ជាការសម្គាល់ នេះគឺជាវិធានការទីពីរហើយរបស់អាមេរិកមកលើកម្ពុជា បន្ទាប់ពីវិធានការទីមួយបានដាក់ចេញ នោះគឺការបញ្ឈប់ជំនួយរបស់អាមេរិកមកកាន់គណៈកម្មាធិការជាតិរៀបចំការបោះឆ្នោតកម្ពុជា។ ដោយឡែកសម្រាប់ស្ថានការនយោបាយនៅកម្ពុជា អាមេរិកអះអាងថា នឹងនៅតែបន្តឃ្លាំមើលតទៅទៀតហើយថា នឹងចាត់វិធានការបន្ថែម បើមានការចាំបាច់។
កញ្ញាកឹម មនោវិទ្យា ដែលធ្លាប់ជាអគ្គនាយករងកិច្ចការសាធារណៈរបស់អតីតគណបក្សសង្គ្រោះជាតិជឿថា វិធានការបន្ទាប់របស់អាមេរិក អាចជាការដាក់មន្ត្រីកម្ពុជាទៅក្នុងបញ្ជីខ្មៅ(Specifically Designated Nationals list) និងការកាត់ជំនួយមករដ្ឋាភិបាលកម្ពុជាទាំងស្រុងក្នុងឆ្នាំ២០១៨ ព្រមទាំងឈានដល់ការដកហូតកូតានាំចេញពីកម្ពុជាផង។ ប្រឈមនឹងវិធានការទាំងនេះ កញ្ញាកឹម មនោវិទ្យា ដែលជាកូនស្រីលោកកឹម សុខា បានអំពាវនាវដល់រដ្ឋាភិបាលខ្មែរ ពិចារណាឲ្យទាន់ពេលដោះស្រាយនូវបញ្ហាទាំងអស់ដែលបានកើតឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ