មនុស្សជាង១០០នាក់ស្លាប់ដោយសារគ្រោះថ្នាក់ចរាចរណ៍ក្នុងរយៈពេល១៥ថ្ងៃនៃរដូវភ្ជុំបិណ្ឌ
មនុស្សជាង១០០នាក់បានស្លាប់ ខណៈជាង២០០នាក់បានរងរបួសធ្ងន់ស្រាល ដោយសារគ្រោះថ្នាក់ចរាចរណ៍ ក្នុងរយៈពេល១៥ថ្ងៃនៃពិធីបុណ្យកាន់បិណ្ឌនិងភ្ជុំបិណ្ឌ។ បើតាមសមត្ថកិច្ចតួលេខអ្នកស្លាប់និងរបួសនេះពុំមានការប្រែប្រួលឡើយបើធៀបនិងរយៈពេលដូចគ្នាក្នុងឆ្នាំ២០១៨។ ប៉ុន្តែសម្រាប់សង្គមស៊ីវិល បង្ហាញក្ដីព្រួយបារម្ភ ព្រោះចំនួនអ្នកស្លាប់នៅតែស្ថិតក្នុងកម្រិតមួយខ្ពស់ដដែល។
ចុះផ្សាយនៅថ្ងៃ៖
ស្តាប់ - ០១:៤០
រាប់ចាប់តាំងពីថ្ងៃទី១៤ ដល់ ថ្ងៃទី២៩ខែកញ្ញា គ្រោះថ្នាក់ចរាចរណ៍នៅទូទាំងប្រទេសសរុបចំនួន១៩៩លើក បណ្ដាលឲ្យមនុស្សស្លាប់១១០នាក់ របួសស្រាលជិត២០០នាក់។ លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងប្រាប់វិទ្យុបារាំងអន្តរជាតិRFI នៅថ្ងៃចន្ទនេះថា បើទោះបីជាចំនួនអ្នកស្លាប់ពុំមានការថយចុះ តែបង្ហាញពីភាពល្អប្រសើរដែលអ្នកស្លាប់មិនមានការកើនឡើង។ បើតាមអ្នកនាំពាក្យដដែល នេះដោយសារតែការយល់ដឹងរបស់អ្នកប្រើប្រាស់ផ្លូវរួមនឹងវិធានការទប់ស្កាត់របស់សមត្ថកិច្ច។
ប៉ុន្តែយ៉ាងណាក៏ដោយលោក គង់ រតនៈ ប្រធានស្ដីទីនៃវិទ្យាស្ថានជាតិសុវត្ថិភាពចរាចរណ៍ផ្លូវគោកមើលឃើញថា ទោះជាចំនួនអ្នកស្លាប់មិនមានការកើនឡើង តែអ្នកស្លាប់ក្នុងឱកាសបុណ្យកាន់បិណ្ឌនិងភ្ជុំបិណ្ឌកើនដល់២ដងបើធៀបនឹងថ្ងៃធម្មតាដែលមានអ្នកស្លាប់៥នាក់ជាមធ្យម។ មួយផ្នែកនៃបញ្ហានេះលោក គង់ រតនៈ អះអាងថា មកពីកំណើនយានយន្តមានការកើនឡើងជាង២០ភាគរយ។ ទន្ទឹមនឹងកំណើនយានយន្តមានការកើនឡើង តែឥរិយាបថអ្នកប្រើប្រាស់ផ្លូវមិនមានការផ្លាស់ប្ដូរឡើយ ពោលគឺមានការផ្លាស់ប្ដូរតិចតួចបំផុត។ ប្រឈមបញ្ហានេះ លោកគង់ រតនៈ អំពាវនាវឲ្យពលរដ្ឋកែប្រែទម្លាប់ក្នុងការប្រើប្រាស់ផ្លូវ ហើយសមត្ថកិច្ចត្រូវពង្រឹងការអនុវត្តច្បាប់នៅនឹងកន្លែងឲ្យមានប្រសិទ្ធភាព។
ក្រៅពីតែចរាចរណ៍,បញ្ហាគ្រោះអគ្គិភ័យក្នុងឱកាសនៃពិធីបុណ្យកាន់បិណ្ឌនិងភ្ជុំបិណ្ឌនេះកើតឡើង២លើកបណ្ដាលឲ្យឆេះផ្ទះ៣៦ខ្នង ខណៈមនុស្សម្នាក់បានស្លាប់ និងម្នាក់របួស។ ដោយឡែកជុំវិញការគ្រប់គ្រងសណ្ដាប់ធ្នាប់ទូទៅវិញគឺពុំមានបញ្ហាជាដុំកំភួនកើតឡើងឡើយពោលគឺអាជ្ញាធរគ្រប់គ្រង់សភាពការណ៍បានល្អប្រសើរ។ នេះបើតាមការអះអាងរបស់អ្នកនាំពាក្យអគ្គស្នងការនគរបាលជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ