អង្គការតម្លាភាពកម្ពុជាប្រកាសមិនចូលរួមសង្កេតការណ៍បោះឆ្នោត
នៅថ្ងៃទី២០ ខែមិថុនា នេះ អង្គការតម្លាភាពកម្ពុជា បានប្រកាសថា ខ្លួននឹងមិនចូលរួមសង្កេតការណ៍ការបោះឆ្នោតថ្នាក់ជាតិ ដែលនឹងធ្វើឡើងនៅថ្ងៃទី២៩ ខែកក្កដា ខាងមុខនេះទេ។ រហូតមកដល់ពេលនេះមានអង្គការសមាគមធំៗចំនួន៣ហើយ បានប្រកាសមិនចូលរួមសង្កេតការណ៍ ខណៈការបោះឆ្នោតខាងមុខនេះ មិនមានវត្តមានអតីតគណបក្សសង្រ្គោះជាតិចូលរួម។
ចុះផ្សាយនៅថ្ងៃ៖
សេចក្តីប្រកាសព័ត៌មានរបស់អង្គការតម្លាភាពកម្ពុជា ចេញផ្សាយនៅថ្ងៃទី២០ ខែមិថុនា បានបញ្ជាក់ថា បរិយាកាស និងលក្ខខណ្ឌនយោបាយក្នុងអំឡុងពេលប៉ុន្មានខែមុនការបោះឆ្នោត ថ្ងៃទី២៩ ខែកក្កដា បានធ្វើឲ្យអង្គការតម្លាភាពកម្ពុជាពុំអាចប្រមូលបានធនធានគ្រប់គ្រាន់ ដើម្បីធ្វើការសង្កេតការណ៍បោះឆ្នោត និងរួមចំណែកនៅក្នុងដំណើរការបោះឆ្នោតខាងមុខនេះ ប្រកបដោយអត្ថន័យនោះឡើយ។
ទាក់ទងទៅនឹងការសង្កេតការណ៍បោះឆ្នោតនេះ លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ថា រហូតមកដល់ពេលនេះ មានអ្នកសង្កេតការណ៍ជាតិជិត៣ម៉ឺននាក់ នឹងចូលរួមសង្កេតការណ៍ការបោះឆ្នោត ដូច្នេះអវត្តមានរបស់អង្គការសមាគមណាមួយ នឹងមិនប៉ះពាល់ដល់ភាពត្រឹមត្រូវនៃការបោះឆ្នោតទេ។
លោក ហង្ស ពុទ្ធា បានថ្លែងបន្តថា គ.ជ.ប បានទទួលស្គាល់អង្គការសមាគមប្រមាណ៦០ស្ថាប័ន ដែលនឹងចូលរួមសង្កេតការណ៍ការបោះឆ្នោតនាពេលខាងមុខនេះ ហើយ គ.ជ.ប កំពុងបន្តពិនិត្យលើពាក្យស្នើសុំចូលរួមសង្កេតការណ៍ពីអង្គការ សមាគមចំនួន៣២ទៀត។ ចំណែកអ្នកសង្កេតការណ៍អន្តរជាតិវិញ គ.ជ.ប បានទទួលស្គាល់ចំនួន១៣នាក់ ហើយនៅមុនថ្ងៃបោះឆ្នោត១ថ្ងៃ គ.ជ.ប នឹងទទួលស្វាគមន៍អ្នកសង្កេតការណ៍អន្តរជាតិប្រមាណ៣០នាក់បន្ថែមទៀត។
អង្គការតម្លាភាពកម្ពុជា កន្លងមកធ្លាប់បានចូលរួមក្នុងការងារកំណែទម្រង់ការបោះឆ្នោត និងសង្កេតការណ៍ការបោះឆ្នោតពីរលើក ពោលគឺការបោះឆ្នោតជ្រើសតាំងតំណាងរាស្ត្រនៅឆ្នាំ២០១៣ និងការបោះឆ្នោតជ្រើសរើសក្រុមប្រឹក្សាឃុំ សង្កាត់ឆ្នាំ២០១៧ ក្នុងគោលបំណងលើកកម្ពស់សុចរិតភាព និងតម្លាភាពក្នុងដំណើរការបោះឆ្នោត។
កាលពីខែឧសភាកន្លងទៅ អង្គការឃ្លាំមើលការបោះឆ្នោតសំខាន់ៗចំនួនពីរ រួមមាន គណៈកម្មាធិការដើម្បីការបោះឆ្នោតដោយសេរី និងយុត្តិធម៌ (ខុមហ្វ្រែល) និងគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និចហ្វិច) បានប្រកាសមិនចូលរួមសង្កេតការបោះឆ្នោត ដែលគ្រោងធ្វើឡើងនៅថ្ងៃទី២៩ ខែកក្កដា ខាងមុខនេះទេ។
អង្គការទាំងពីរនេះ ធ្លាប់បានលើកមូលហេតុថា បារម្ភពីសុវត្ថិភាព ក្រោយពីការបិទបន្ទប់ស្ថានការណ៍សម្រាប់ឃ្លាំមើលការបោះឆ្នោត និងថា ការបោះឆ្នោតជាតិនៅខែកក្កដាខាងមុខនេះ នឹងធ្វើឡើងដោយមិនមានការប្រកួតប្រជែងគ្នាខ្លាំងក្លានោះទេ។
សូមបញ្ជាក់ថា ការទទួលចុះឈ្មោះក្រុមអ្នកសង្កេតការណ៍ជាតិ និងអន្តរជាតិ បានចាប់តាំងពីថ្ងៃទី២៣ ខែមេសា រហូតទៅដល់ថ្ងៃទី ២៥ ខែកក្កដាខាងមុខ។ យ៉ាងណាក៏ដោយ នេះជាលើកដំបូងហើយ ដែលអង្គការសង្គមស៊ីវិលសំខាន់ៗចំនួន៣ បានប្រកាសបដិសេធចូលរួមក្នុងកិច្ចដំណើរការសង្កេតការណ៍បោះឆ្នោត បើគិតចាប់តាំងពីឆ្នាំ១៩៩៨មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ