ខុទ្ទកាល័យ៖ លោក កឹម សុខា និងលោក សម រង្ស៊ី មិនបានទាក់ទងគ្នាតាមទូរស័ព្ទទេ
លោកមុត ចន្ថា នាយកខុទ្ទកាល័យរបស់លោក កឹម សុខា នៅព្រឹកថ្ងៃព្រហស្បតិ៍នេះ បានចេញមកទាត់ចោលថា លោកកឹម សុខា និង លោកសម រង្ស៊ី មិនបានទាក់ទងនិយាយគ្នាតាមទូរស័ព្ទណាមួយឡើយ។ ការចេញមកទាត់ចោលតាមរយៈទំព័រហ្វេសប៊ុកនេះ ធ្វើឡើងបន្ទាប់ពីប្រធានចលនាយុវជននៃចលនាសង្រ្គោះជាតិ នៅទីក្រុងឡូវែល សហរដ្ឋអាមេរិក បានសរសេរតាមហ្វេសប៊ុកថា លោកកឹម សុខា និងលោក សម រង្ស៊ី បានទូរស័ព្ទសួរសុខទុក្ខគ្នា។
ចុះផ្សាយនៅថ្ងៃ៖
ស្តាប់ - ០២:០២
ចំពោះព័ត៌មានដែលថា លោកកឹម សុខា និងលោកសម រង្ស៊ី បានទូរស័ព្ទសួរសុខទុក្ខគ្នានេះ លោកមុត ចន្ថា នាយកខុទ្ទកាល័យរបស់លោក កឹម សុខា បានចាត់ទុកថា ជាទង្វើដែលមានចេតនាទុច្ចរិតមកលើលោកកឹម សុខា ដែលជាប្រធានអតីតគណបក្សសង្រ្គោះជាតិ។ ហេតុដូច្នេះហើយ លោកបានស្នើឱ្យសមាជិកនៃអតីតគណបក្សសង្រ្គោះជាតិនៅអាមេរិកធ្វើការកែតម្រូវនូវព័ត៌មានរបស់ខ្លួននេះជាបន្ទាន់។
ការចេញប្រតិកម្មទាត់ចោលភ្លាមៗរបស់ខុន្ធកាល័យលោកកឹម សុខានេះ អ្នកវិភាគនយោបាយកម្ពុជា លោកបណ្ឌិតគិន ភា មើលឃើញនូវទិដ្ឋភាពពីរ។ ទី១ លោកថា ការសរសេរថា លោកកឹម សុខា និង លោកសម រង្ស៊ី ទាក់ទងគ្នាតាមទូរស័ព្ទនេះ អាចជារូបភាពក្លែងក្លាយមួយក្នុងគោលបំណងចង់បង្ហាញឱ្យឃើញថា លោកកឹម សុខា និង លោកសម រង្ស៊ី នៅតែជាមនុស្សតែមួយ។ តាមលោកបណ្ឌិតគិន ភា រូបភាពលោកកឹម សុខា និង លោកសម រង្ស៊ី ជាមនុស្សតែមួយនេះ គឺជានយោបាយឃោសនាដ៏សំខាន់បំផុតសម្រាប់ក្រុមអតីតគណបក្សប្រឆាំង។
ចំណែក ទិដ្ឋភាពទីពីរវិញ លោកបណ្ឌិតគិន ភិន លើកឡើងថា ព័ត៌មាននេះអាចនឹងធ្វើឱ្យមានការយល់ច្រឡំគ្នារវាងលោកកឹម សុខា និង តុលាការដែលជាអ្នកឃ្លាំមើលសកម្មភាពរបស់លោកកឹម សុខា។ ត្រង់ចំណុចនេះ លោកបណ្ឌិតគិន ភា បញ្ជាក់ថា តុលាការអាចនឹងគិតថា លោកកឹម សុខា អាចនឹងធ្វើសកម្មភាពនយោបាយដែលតុលាការហាមឃាត់ ព្រោះបើពួកគេទាក់ទងគ្នាមែន គឺគ្មាននិយាយអ្វីក្រៅពីនយោបាយឡើយ។
ក៏ប៉ុន្តែ លោកព្រាប កុល នាយកប្រតិបត្តិអង្គការតម្លាភាពកម្ពុជាវិញយល់ឃើញខុសពីនេះ។ លោកព្រាប កុល បានគូសបញ្ជាក់ថា ការសន្ទនារវាងលោកកឹម សុខា និង លោកសម រង្ស៊ី ពិបាកក្នុងការវិនិច្ឆ័យណាស់ថា អ្នកទាំងពីរនិយាយពីរឿងនយោបាយ ឫនិយាយគ្នាធម្មតា គឺគ្មាននរណាអាចដឹងនោះទេ។ សម្រាប់លោកព្រាប កុល ការជជែកគ្នារវាងលោកកឹម សុខា និង លោកសម រង្ស៊ី ទោះក្នុងមធ្យោបាយណាក៏ដោយ មិនគួរក្លាយជារឿងចម្រូងសម្រាសនោះទេ ពោល គឺគួរតែជារឿងធម្មតា។ ធម្មតា ព្រោះវា គឺជាសិទ្ធិសេរីភាពនៃការបញ្ចេញមតិក្នុងសង្គមប្រជាធិបតេយ្យ និង ដែលមានចែងនៅក្នុងរដ្ឋធម្មនុញ្ញកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ