សំណុំរឿងអតីតអ្នកកាសែត៖ តុលាការបញ្ជាឱ្យបើកការស៊ើបអង្កេតបន្ថែម ក្រោយពីជំនុំជម្រះរួចរាល់
នៅព្រឹកថ្ងៃព្រហស្បតិ៍នេះ ចៅក្រមតុលាការក្រុងភ្នំពេញបានកោះហៅអតីតអ្នកកាសែតវិទ្យុអាស៊ីសេរីពីរនាក់ គឺលោក អ៊ួន ឈិន និង លោក យាង សុជាមេត្តា មកជួប ដើម្បីស្តាប់ការប្រកាសសាលក្រម។ ជាសាលក្រម «ចាត់របៀប»ឱ្យបើកការស៊ើបអង្កេតលើចំណុចមួយចំនួនបន្ថែមទៀតក្នុងសំណុំរឿងរបស់ពួកគេ។ អតីតអ្នកកាសែតទាំងពីរ បានសម្តែងការខកចិត្តយ៉ាងខ្លាំង និង បានចាត់ទុកការសម្រេចនេះថា ជាការយកយុត្តិធម៌ និង សេរីភាពរបស់ពួកគេមកលេងសើច។
ចុះផ្សាយនៅថ្ងៃ៖
ស្តាប់ - ០២:៥១
ចំណុចដែលចៅក្រមសាលាដំបូងរាជធានីភ្នំពេញទាមទារឱ្យបើកការស៊ើបអង្កេតបន្ថែមទៀតនោះ គឺទៅលើកញ្ចប់ Hard-Disk ដែលលោក អ៊ួន ឈិន បានយកទៅប្រគល់ឱ្យស្ថានទូតអាមេរិក នៅក្រោយពេលដែលវិទ្យុអាស៊ីសេរីបានបិទការិយាល័យផ្សាយនៅកម្ពុជា។ ចៅក្រមចង់ដឹងថា តើកញ្ចប់ Hard-Disk នោះ មានអ្វីខ្លះ? ហើយថា ការយកកញ្ចប់ Hard-Disk នេះទៅប្រគល់ឱ្យស្ថានទូតអាមេរិក វាមិនមែនជាការងាររបស់អ្នកកាសែតនោះទេ។ នេះបើតាមការបញ្ជាក់ឱ្យដឹងរបស់លោក យាង សុធារិន្ទ ហៅ យាង សុជាមេត្តា។
ចំណុចមួយទៀត គឺចៅក្រមឱ្យស៊ើបអង្កេតលើសេចក្តីរាយការណ៍ព័ត៌មានចំនួនពីរចុងក្រោយរបស់លោកយាង សុមេត្តា ដែលបានសរសេរផ្ញើទៅឱ្យវិទ្យុអាស៊ីសេរីនៅអាមេរិក បន្ទាប់ពីបិទការិយាល័យផ្សាយនៅកម្ពុជា។ ចៅក្រមចង់ដឹងពីខ្លឹមសារនៃព័ត៌មានទាំងពីរនោះ។ ការស៊ើបអង្កតទាំងនេះ គឺនៅក្នុងសំណុំរឿងប្រគល់ឲ្យរដ្ឋបរទេសនូវព័ត៌មានជាអាទិ៍ដែលអាចធ្វើឲ្យអន្តរាយដល់ការការពារជាតិ។ ចំណែក នៅក្នុងសំណុំរឿងផលិតនិងកាន់កាប់រូបភាពអាសអាភាសវិញ ចៅក្រមតុលាការក្រុងភ្នំពេញបានបញ្ជាឱ្យស៊ើបអង្កេតថា តើលោក អ៊ួន ឈិន បានចែកចាយរូបភាពអាសអាភាសនេះទៅឱ្យអ្នកណាខ្លះ និង ថា តើលោក យាង សុជាមេត្តា បានចូលរួមថតរូបភាពអាសអាភាសនេះដែរឬអត់។
យ៉ាងណាក៏ដោយ ចៅក្រមតុលាការក្រុងភ្នំពេញ មិនបានប្រាប់ឱ្យដឹងថានឹងចាប់ផ្តើមការស៊ើបអង្កេតបន្ថែមនេះនៅពេលណា ហើយត្រូវប្រើប្រាស់ពេលវេលាប៉ុណ្ណានោះទេ។ ការណ៍នេះបានធ្វើឱ្យលោកយាង សុធារិន្ទ ហៅយាង សុជាមេត្តា ខកចិត្តនិងសោកស្តាយយ៉ាងខ្លាំង។ លោកបានប្រាប់វិទ្យុបារាំងអន្តរជាតិថា លោកមិនខ្លាចការស៊ើបអង្កេតបន្ថែមនេះទេ តែការសម្រេចស៊ើបអង្កេតបន្ថែម ដោយមិនកំណត់រយៈពេលបែបនេះ គឺហាក់ដូចជាយកយុត្តិធម៌ និង សេរីភាពរបស់ពួកគេទៅលេងសើចដូច្នោះដែរ។
ម្យ៉ាងវិញទៀត លោកយាង សុជាមេត្តា ក៏បានសម្តែងនូវការងឿងឆ្ងល់ដែរ ថាហេតុអ្វីបានតុលាការបញ្ជាឱ្យបើកការស៊ើបអង្កេតបន្ថែម បន្ទាប់ពីសំណុំរឿងរបស់លោកត្រូវជំនុំជម្រះរួចរាល់ហើយនោះ។ សំណុំរឿងអតីតអ្នកកាសែតទាំងពីរត្រូវបានតុលាការក្រុងភ្នំពេញបើកសវនាការជំនុំជម្រះកាលពីថ្ងៃទី២៦ កក្កដា ឆ្នាំ២០១៩ ហើយបានលើកពេលប្រកាសសាលក្រមម្តងរួចមកហើយកាលពីចុងខែសីហា។ ប៉ុន្តែ លោកសំ ចំរើន មេធាវីការពារក្តីអតីតអ្នកកាសែតទាំងពីរបានអះអាងថា ការសម្រេចរបស់ចៅក្រមនេះ គឺមិនខុសនីតីវិធីច្បាប់ឡើយ តែវាបានប៉ះពាល់យ៉ាងធ្ងន់ធ្ងរដល់សិទ្ធិ និង ផលប្រយោជន៍របស់អ្នកទាំងពីរ។ លោកមេធាវីសំ ចំរើន បានគូសបញ្ជាក់ថា លោកនឹងពិភាក្សាជាមួយកូនក្តី ដើម្បីសម្រេចថានឹងធ្វើយ៉ាងណាបន្តទៀតចំពោះរឿងនេះ។
សូមបញ្ជាក់ថា អតីតអ្នកកាសែតវិទ្យុអាស៊ីសេរីទាំងពីរត្រូវបានតុលាការក្រុងភ្នំពេញចោទប្រកាន់ពីបទ “ផ្ដល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ” និងបទ “ផលិតនិងកាន់កាប់រូបភាពអាសអាភាស”។ ពួកគេត្រូវបានតុលាការឃុំខ្លួនអស់រយៈពេលជាង៩ ខែ និង បានដោះលែងឱ្យក្រៅឃុំបណ្តោះអាសន្នរហូតមកដល់ពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ