រដ្ឋាភិបាលលើកពេលបោះឆ្នោតព្រឹទ្ធសភាទៅខែកុម្ភៈឆ្នាំក្រោយវិញ
រដ្ឋាភិបាលកម្ពុជានៅថ្ងៃទី២៧ ខែតុលានេះ បានសម្រេចកែសម្រួលកាលបរិច្ឆេទ នៃការបោះឆ្នោតជ្រើសតាំងសមាជិកព្រឹទ្ធសភា ទៅថ្ងៃទី២៥ ខែកុម្ភ ឆ្នាំក្រោយវិញ។ ការលើកពេលនេះ ត្រូវបានអ្នកជំនាញឃ្លាំមើលការបោះឆ្នោតនៅកម្ពុជាចាត់ទុកថា ដោយសាររដ្ឋាភិបាលកំពុងរងចាំឲ្យវិសោធនកម្មច្បាប់៤ អនុវត្តជាផ្លូវការ ក្រោយការឡាយព្រះហត្ថលេខា ដោយព្រះមហាក្សត្រ។
ចុះផ្សាយនៅថ្ងៃ៖
ស្តាប់ - ០២:០៧
យោងតាមសេចក្តីសម្រេច ដែលមានហត្ថលេខាលោកនាយករដ្ឋមន្ត្រីហ៊ុន សែន ចុះថ្ងៃទី២៧ ខែតុលា បានសម្រេចកែសម្រួលកាលបរិច្ឆេទនៃការបោះឆ្នោតជ្រើសតាំងសមាជិកព្រឹទ្ធសភាសម្រាប់នីតិកាលទី៤នៃព្រឹទ្ធសភា ទៅធ្វើនៅថ្ងៃអាទិត្យទី២៥ ខែកុម្ភៈ ឆ្នាំ២០១៨វិញ។
ក្នុងសេចក្តីសម្រេចរបស់រដ្ឋាភិបាលដដែលក៏ បានចាត់ទុកសេចក្តីសម្រេចកាលពីថ្ងៃទី២៨ ខែកក្កដា ឆ្នាំ២០១៧ ស្តីពីការប្រកាសកាលបរិច្ឆេទនៃការបោះឆ្នោតជ្រើសតាំងសមាជិកព្រឹទ្ធសភាសម្រាប់នីតិកាលទី៤ នៃព្រឹទ្ធសភា ត្រូវទុកជានិរាករណ៍ និងជំនួសដោយសេចក្តីសម្រេចថ្មីនេះ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានថ្លែងថាការផ្លាស់ប្តូរពេលវេលានេះ គឺរដ្ឋាភិបាលជាអ្នកកំណត់ ទោះបីជាបោះឆ្នោតជ្រើសតាំងតំណាងរាស្ត្រ ឬបោះឆ្នោតក្រុមប្រឹក្សាឃុំសង្កាត់ក៏ដោយ។ លោកបញ្ជាក់ថាមូលហេតុនៃការផ្លាស់ប្តូរនេះ គ.ជ.ប មិនមែនជាអ្នកត្រូវឆ្លើយនោះទេ។
អ្នកនាំពាក្យរូបនេះបន្ថែមថា គ.ជ.ប ទទួលខុសត្រូវក្នុងការអនុវត្តច្បាប់ និងរៀបចំបច្ចេកទេសក្នុងការបោះឆ្នោត ដូច្នេះបោះឆ្នោតជ្រើសតាំងសមាជិកព្រឹទ្ធសភាពេលណាក៏ដោយ គ.ជ.ប បានត្រៀមខ្លួនរួចហើយទៅតាមកាលបរិច្ឆេទ ដែលបានគ្រោងទុក ឬមានការផ្លាសប្តូរណាមួយនោះ។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិច (NICFEC) លោក សម គន្ធាមី អះអាងប្រាប់វិទ្យុបារាំងអន្តរជាតិនៅថ្ងៃទី២៧ ខែតុលាថា ការផ្លាស់ប្តូរពេលវេលានេះ ក៏អាចទាក់ទងនឹងរឿងស្ថានការណ៍នយោបាយនៅកម្ពុជាបច្ចុប្បន្នដែរ។
ក្រៅពីនេះ លោក សម គន្ធាមី យល់ឃើញថាការពន្យារពេលនេះ គឺប្រហែលជា គ.ជ.ប រៀបចំចាត់ចែងការងាររៀបចំការបោះឆ្នោតព្រឹទ្ធសភាមិនទាន់។ លោកបញ្ជាក់ថារដ្ឋាភិបាលក៏ប្រហែលជារងចាំវិសោធនកម្មច្បាប់ថ្មី៤ ដែលព្រះមហាក្សត្រទើបឡាយព្រះហត្ថលេខា កាលពីថ្ងៃទី២៥ ខែតុលា ចូលជាធរមាន ទើបរដ្ឋាភិបាលលើកពេលក្នុងការបោះឆ្នោតជ្រើសតាំងសមាជិកព្រឹទ្ធសភា៕
សូមបញ្ជាក់ថា ការបោះឆ្នោតព្រឹទ្ធសភានេះ ដំបូងឡើយគ្រោងនឹងធ្វើនៅថ្ងៃអាទិត្យ ទី១៤ ខែមករា ឆ្នាំ២០១៨ តែត្រូវពន្យារពេលទៅចុងខែកុម្ភៈ ពីព្រោះវាទាក់ទិនទៅនឹងការរំលាយគណបក្សនយោបាយ។ នេះបើតាមប្រសាសន៍លោកហ៊ុន សែនកាលពីថ្ងៃអាទិត្យ ទី២៣ ខែតុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ