តុលាការកំពូលសម្រេចរក្សាឃុំខ្លួនលោកគឹម សុខនៅក្នុងពន្ធនាគារដដែល
តុលាការកំពូលនៅព្រឹកថ្ងៃទី១០ ខែមករានេះ បានបើកសវនាការលើបណ្តឹងសុំនៅក្រៅឃុំជាលើកទី២របស់លោកគឹម សុខ បន្ទាប់ពីការស្នើសុំនៅក្រៅឃុំជាលើកទី១ត្រូវបានទាត់ចោលជាបន្តបន្ទាប់។ សម្រាប់បណ្តឹងសុំនៅក្រៅឃុំជាលើកទី២នេះ តុលាការកំពូលបានសម្រេចរក្សាការឃុំខ្លួនលោកគឹម សុខនៅក្នុងពន្ធនាគារដដែល។ លោកគឹម សុខ ត្រូវបានសាលាដំបូងរាជធានីភ្នំពេញផ្តន្ទាទោសឲ្យជាប់ពន្ធនាគារ១៨ខែ និងសងជំងឺចិត្តលោកនាយករដ្ឋមន្រ្តីហ៊ុន សែន ចំនួន៨០០លានរៀល។
ចុះផ្សាយនៅថ្ងៃ៖
ស្តាប់ - ០២:០៩
លោកគឹម សុខ អ្នកឃ្លាំមើលបញ្ហាសង្គមនិងនយោបាយកម្ពុជា ត្រូវបានតុលាការក្រុងភ្នំពេញផ្តើមឃុំខ្លួននៅក្នុងពន្ធនាគារព្រៃសតាំងពីថ្ងៃទី១៧កុម្ភៈ ឆ្នាំ២០១៧ កន្លងទៅ។ ការឃុំខ្លួននេះ ធ្វើឡើងភ្លាមៗ បន្ទាប់ពីលោកបានចូលខ្លួនទៅកាន់តុលាការ ដើម្បីបំភ្លឺជុំវិញពាក្យបណ្តឹងរបស់លោកនាយករដ្ឋមន្រ្តីហ៊ុន សែនដែលបានប្តឹងលោកពីរឿងចោទថា គណបក្សប្រជាជនកម្ពុជានៅក្រោយខ្នងឃាតកម្មលោកបណ្ឌិតកែម ឡី។ ក្នុងពេលត្រូវឃុំខ្លួនបណ្តោះអាសន្ន លោកគឹម សុខ និងមេធាវីបានខ្នះខ្នែងដាក់ពាក្យស្នើសុំនៅក្រៅឃុំជាបន្តបន្ទាប់ ប៉ុន្តែត្រូវតុលាការគ្រប់លំដាប់ថ្នាក់ទាត់ចោលគ្មានសល់។
លុះការស្នើសុំនៅក្រៅឃុំមិនបានសម្រេច លោកគឹម សុខ តាមរយៈមេធាវីក៏បានស្នើទៅកាន់តុលាការម្តងទៀត ដោយសុំឲ្យមានវត្តមានលោកនាយករដ្ឋមន្រ្តីហ៊ុន សែន ដែលជាដើមបណ្តឹងមកតទល់ជាមួយលោកនៅក្នុងសវនាការ។ ប៉ុន្តែសំណើនេះក៏ត្រូវបានទាត់ចោលដូចគ្នាដែរ។ នេះក៏ព្រោះតែតុលាការថា វាពុំមែនជារឿងចាំបាច់ ដោយសារតែលោកនាយករដ្ឋមន្រ្តីហ៊ុន សែន បានប្រគល់សិទ្ធិទាំងអស់ឲ្យទៅមេធាវីទៅហើយ។ សម្រេចសម្រួលទៅ កិច្ចខិតខំប្រឹងប្រែងរបស់លោកគឹម សុខ និងមេធាវីរបស់លោក ត្រូវអសារបង់ទាំងអស់។
នៅថ្ងៃទី១០ ខែសីហា ឆ្នាំ២០១៧ សាលាដំបូងរាជធានីភ្នំពេញបានសម្រេចផ្តន្ទាទោសលោកគីម សុខ ឲ្យជាប់ពន្ធនាគាររយៈពេល១៨ខែ និង បង់ប្រាក់សងជំងឺចិត្តលោកហ៊ុន សែន ចំនួន៨០០លានរៀល ដោយចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ» ។ បន្ទាប់មក លោកគឹម សុខក៏បានប្តឹងជំទាស់ទៅកាន់សាលាឧទ្ធរណ៍ ប៉ុន្តែសាលាឧទ្ធរណ៍បានសម្រេចរក្សាទុកទោសដដែល។ យ៉ាងណាក៏ដោយ មេធាវី ក៏បានដាក់បណ្តឹងសារទុក្ខប្រឆាំងនឹងការសម្រេចនេះទៅតុលាការកំពូលទៀត ប៉ុន្តែមកដល់ពេលនេះ តុលាការកំពូលមិនទាន់សម្រេចថា បើកសវនាការនៅពេលណានៅឡើយទេ។
គិតមកដល់ពេលនេះ លោកគឹម សុខ ត្រូវបានតុលាការឃុំខ្លួននៅក្នុងពន្ធនាគារអស់រយៈពេលជិតមួយឆ្នាំមកហើយ។ សូមជំរាបជូនថា ក្រៅតែពីសំណុំរឿងចោទថា គណបក្សប្រជាជននៅពីក្រោយឃាតកម្មបាញ់សម្លាប់លោកបណ្ឌិតកែម ឡីនេះ លោកគឹម សុខ ក៏កំពុងរងនូវបណ្តឹងមួយផ្សេងទៀតផងដែរពីលោកនាយករដ្ឋមន្រ្តីហ៊ុន សែន គឺការចោទប្រកាន់ថា រដ្ឋាភិបាលខ្មែរបង្កើតប្រព័ន្ធសម្លាប់មនុស្សរកឃាតករមិនឃើញ។ នៅក្នុងបណ្ដឹងនេះលោក ហ៊ុន សែន ទារសំណងជំងឺចិត្តពីលោកគឹម សុខ ចំនួន២៥០០ដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ