លោក ស៊ុន ចាន់ថុល៖ កម្ពុជានឹងកែច្បាប់ចរាចរណ៍ជាថ្មី ដើម្បីបន្ថែមទឹកប្រាក់ផាកពិន័យច្រើនជាងមុន
លោកស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន និង ជាអនុប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានអះអាងឱ្យដឹងថា ច្បាប់ចរាចរណ៍ផ្លូវគោកនឹងត្រូវធ្វើវិសោធនកម្មជាថ្មីម្តងទៀតនាពេលខាងមុខ ដើម្បីរឹតបន្តឹងបន្ថែមលើអ្នកដែលប្រព្រឹត្តខុសច្បាប់។ តែទោះជាបែបនេះក្តី លោកស៊ុន ចាន់ថុល មិនបានបញ្ជាក់ច្បាស់ពីកាលបរិច្ឆេទនៃការធ្វើវិសោធនកម្មនេះទេ ដោយគ្រាន់តែអះអាងថា បានបង្កើតក្រុមការងារធ្វើកិច្ចការនេះរួចរាល់ហើយ។
ចុះផ្សាយនៅថ្ងៃ៖
ស្តាប់ - ០២:៣៣
នៅក្នុងសន្តិសីទប្រចាំឆ្នាំលើកទី២ស្តីពីសុវត្ថិភាពចរាចរណ៍ផ្លូវគោកនៅប្រទេសកម្ពុជាកាលពីថ្ងៃព្រហស្បតិ៍ លោករដ្ឋមន្រ្តីស៊ុន ចាន់ថុល ដែលជាអនុប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានគូសបញ្ជាក់ថា បំណងនៃការធ្វើវិសោធនកម្មថ្មីលើច្បាប់ចាស់នេះ គឺផ្តោតសំខាន់លើពីរចំណុចធំៗ។ ទីមួយ គឺបន្ថែមទឹកប្រាក់នៃការផាកពិន័យឱ្យបានច្រើនជាងមុន ព្រោះថាទឹកប្រាក់ផាកពិន័យដែលអនុវត្តបច្ចុប្បន្ន គឺនៅទាបខ្លាំងណាស់បើប្រៀបធៀបនឹងប្រទេសគេផ្សេង។ ចំណែក ទីពីរវិញគឺនឹងធ្វើកែប្រែទៅលើបញ្ហារថយន្តកែច្នៃ រថយន្តដឹកទំនិញលើសទម្ងន់កំណត់ និង ខុសលក្ខណៈបច្ចេកទេសជាដើម។
បើតាមលោកស៊ុន ចាន់ថុល គម្រោងកែច្បាប់នេះ គឺធ្វើឡើងក្នុងចេតនាល្អ ដើម្បីជំរុញឱ្យការអនុវត្តច្បាប់រឹតរឹងតែមានប្រសិទ្ធភាព។ ជាមួយគ្នានេះ លោកក៏បានសង្កត់ធ្ងន់ថា ក្រុមការងារដែលទើបបង្កើតឡើង នឹងធ្វើការពិភាក្សាលម្អិតអំពីសេចក្តីព្រាងវិសោធនកម្មនេះ មុនបញ្ជូនទៅកាន់ទីស្តីការគណៈរដ្ឋមន្រ្តីកម្ពុជាពិនិត្យ និងអនុម័តនិង បញ្ជូនបន្តទៅកាន់រដ្ឋសភាជាតិ ដើម្បីធ្វើវិសោធនចេញច្បាប់ថ្មី។
សូមបញ្ជាក់ថា ច្បាប់ស្តីពីចរាចរណ៍ផ្លូវគោកថ្មីនេះ ធ្លាប់ត្រូវបានធ្វើវិសោធនកម្មម្តងរួចមកហើយកាលពីឆ្នាំ២០១៧កន្លងទៅ។ កាលណោះ រដ្ឋាភិបាលកម្ពុជាបានសម្រេចកែប្រែលើមាត្រាមួយចំនួនទាក់ទងនឹងការធ្វើបណ្ណបើកបរ ការកាត់ឈ្មោះយានយន្ត ការបើកបរក្រោមឥទ្ធិពលគ្រឿងស្រវឹង និងការពាក់ខ្សែក្រវាត់សម្រាប់អ្នកធ្វើដំណើរតាមរថយន្តជាដើម។ ការធ្វើវិសោធនកម្មច្បាប់ស្តីពីចរាចរណ៍ផ្លូវគោកថ្មីនេះ គឺ ដើម្បីកាត់បន្ថយអត្រាគ្រោះថ្នាក់ចរាចរណ៍នៅកម្ពុជា។
ក៏ប៉ុន្តែ បើទោះជាមានការធ្វើវិសោធនកម្មថ្មីក្តី ក៏គ្រោះថ្នាក់ចរាចរណ៍នៅតែឆក់យកអាយុជីវិតប្រជាពលរដ្ឋកម្ពុជាយ៉ាងផុយស្រួយ និង ដ៏គួរឱ្យព្រួយបារម្ភ។ កាលពីឆ្នាំ២០១៨កន្លងទៅ គ្រោះថ្នាក់ចរាចរណ៍បានសម្លាប់ជីវិតមនុស្សចំនួន១៨០០នាក់ ពោល គឺក្នុងមួយថ្ងៃមានស្លាប់ជាមធ្យមពី៥ទៅ៦នាក់ ដោយសារចរាចរណ៍។ ចំណែកនៅក្នុងឆមាសទី១ក្នុងឆ្នាំនេះវិញ គ្រោះថ្នាក់ចរាចរណ៍បានឆក់យកអាយុជីវិតមនុស្សចំនួន១ ០៣៣នាក់។
លោកទេសរដ្ឋមន្រ្តីស៊ុន ចាន់ថុល បានអះអាងថា ចំនួនអ្នកស្លាប់ដោយគ្រោះថ្នាក់ចរាចរណ៍នេះអាចនឹងកើនឡើងដល់ជាង ២ ០០០នាក់ នៅដំណាច់ឆ្នាំនេះ បើសិនមិនមានការរឹតបន្តឹងច្បាប់នោះទេ។ បើតាមលោកស៊ុន ចាន់ថុលដដែល គ្រោះថ្នាក់ចរាចរណ៍បានធ្វើឱ្យកម្ពុជាខាតថវិកាប្រមាណពី៣៣០លានទៅ៣៥០លានដុល្លារអាមេរិកក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ