ប្រាក់ឈ្នួលកម្មករកាត់ដេរឆ្នាំ២០១៩៖ លោក ហ៊ុន សែន ថា មិនក្រោម១៨០ដុល្លារទេ
លោកនាយករដ្ឋមន្ដ្រី ហ៊ុន សែន នៅព្រឹកថ្ងៃសុក្រ ទី០៥តុលានេះ បានប្រកាសថា ប្រាក់ឈ្នួលអប្បបរមាសម្រាប់កម្មករកាត់ដេរសម្រាប់ឆ្នាំ២០១៩ខាងមុខ គឺមិនក្រោម១៨០ដុល្លារទេ។ ការប្រកាសរបស់លោកនាយករដ្ឋមន្ដ្រីដូច្នេះ ធ្វើឡើងតែប៉ុន្មានម៉ោងប៉ុណ្ណោះ មុនពេលក្រុមការងារត្រីភាគីចរចាប្រាក់ឈ្នួលកម្មករ ត្រូវប្រជុំគ្នាជាលើកចុងក្រោយនៅរសៀលម៉ោង២ ដើម្បីសម្រេចប្រាក់ឈ្នួលកម្មករឆ្នាំ២០១៩។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ការចរចាប្រាក់ឈ្នួលដែលចាប់ផ្ដើមតាំងពីខែកញ្ញា នឹងត្រូវបិទបញ្ចប់ជាផ្លូវការហើយនៅថ្ងៃសុក្រនេះ តាមរយៈកិច្ចប្រជុំលើកទី១០ និងជាលើកចុងក្រោយ របស់ក្រុមការងារត្រីភាគី។ ក្រុមការងារត្រីភាគីដែលមានសមាសភាពមកពីរដ្ឋាភិបាល១៦រូប តំណាងថៅកែរោងចក្រ១៦រូប និងសហជីពដែលជាតំណាងកម្មករនិយោជិតចំនួន១៦រូប។
នៅក្នុងកិច្ចប្រជុំថ្ងៃសុក្រនេះ ភាគីទាំង៣ នឹងបោះឆ្នោតជ្រើសយកតួលេខមួយ ក្នុងចំណោមតួលេខចំនួនពីរ ដើម្បីកំណត់ជាប្រាក់ឈ្នួលកម្មករសម្រាប់ឆ្នាំ២០១៩។ តួលេខទាំងពីរនោះ គឺ ១៧៧ដុល្លារ ដាក់ចេញដោយភាគីរដ្ឋាភិបាលនិងថៅកែរោងចក្រ និង ១៨២ដុល្លារ ពីខាងសហជីពតំណាងឲ្យកម្មករ។
ក្រៅពីចង់បានប្រាក់ឈ្នួល១៨២ដុល្លារសម្រាប់កម្មករផ្នែកកាត់ដេរនិងវាយនភណ្ឌក្នុងឆ្នាំ២០១៩ហើយ ភាគីសហជីពបានស្នើទៅរដ្ឋាភិបាលឲ្យបន្តបញ្ចុះតម្លៃនិងពង្រីកសេវាទឹកភ្លើង បញ្ចុះថ្លៃឈ្នួលបន្ទប់ ពង្រឹងសេវាសុខាភិបាល ដកពាក្យបណ្ដឹងប្រឆាំងនឹងសហជីព និងកុំឲ្យយកពន្ធលើស្លាកយីហោនិងប្រាក់ចំណូលផ្សេងៗ។ សម្រាប់និយោជកវិញ សហជីពចង់ឲ្យផ្ដល់ប្រាក់ថ្លៃដឹកជញ្ជូន និងអាហារថ្ងៃត្រង់បន្ថែមទៀតសម្រាប់កម្មករ។
គួរជម្រាបថា ប៉ុន្មានម៉ោងមុនពេលក្រុមការងារត្រីភាគីបើកកិច្ចប្រជុំសម្រេចចុងក្រោយនៅរសៀលថ្ងៃសុក្រនេះ លោកនាយករដ្ឋមន្ដ្រី បានប្រកាសថា ប្រាក់ឈ្នួលអប្បបរមាសម្រាប់កម្មករកាត់ដេរសម្រាប់ឆ្នាំ២០១៩ខាងមុខ គឺមិនក្រោម១៨០ដុល្លារទេ។
ចាប់តាំងពីឆ្នាំ២០១៣មក សហជីពបានកត់សម្គាល់ឃើញថា ប្រមុខរដ្ឋាភិបាល លោក ហ៊ុន សែន បានយកចិត្តកម្មករកាត់ដេរជាពិសេស ដោយបានផ្ដល់អត្ថប្រយោជន៍ផ្សេងៗជាប់មិនចេះដាច់។ ក្រៅពីការសម្របសម្រួលឲ្យមានការចរចាប្រាក់ឈ្នួលជារៀងរាល់ឆ្នាំ លោក ហ៊ុន សែន បានផ្ដល់អ្វីដែលលោកហៅថា «កាដូ» សម្រាប់កម្មករ ដូចជាការជិះរថយន្តក្រុងឥតគិតថ្លៃ មិនចាំបាច់បង់ថ្លៃគាំពារសុខភាព និងកំណត់ឲ្យមានប្រាក់រ៉ឺត្រែតចាប់ពីឆ្នាំ២០១៩តទៅ។ ចុងក្រោយនេះ រដ្ឋាភិបាលលោក ហ៊ុន សែន បានកំណត់ឲ្យថៅកែរោងចក្របើកប្រាក់ខែឲ្យកម្មករ២សប្ដាហ៍ម្ដង ចាប់ពីខែមករាឆ្នាំ២០១៩តទៅដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ