យុវជន កែម ឡី និយមម្នាក់ត្រូវបានតុលាការដោះលែងនៅក្រៅឃុំជាបណ្តោះអាសន្ននៅថ្ងៃនេះ
ចៅក្រមតុលាការកំពូល នៅព្រឹកថ្ងៃទី ១៥ វិច្ឆិកា នេះ បានសម្រេចដោះលែងយុវជន សួង នាគព័ន្ធ ឲ្យនៅក្រៅឃុំជាបណ្តោះអាសន្ន បន្ទាប់ពីចៅក្រមបានបើកសវនាការនៅព្រឹកមិញនេះ។ អ្វីជាការកត់សំគាល់ ការដោះលែងយុវជនកែម ឡី និយមរូបនេះ គឺនៅក្នុងបរិបទនៃការវិវត្តន៍នយោបាយនៅកម្ពុជាមានការប្រែប្រួលនារយៈពេលចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:១៤
គឺបន្ទាប់ពីបានបើកសវនាការអស់រយៈពេលជាងមួយម៉ោងរួចមក ប្រធានចៅក្រមជំនុំជម្រះតុលាការកំពូលលោកចៅក្រម និល ណុន បានសម្រេចដោះលែងយុវជន សួង នាគព័ន្ធ ឲ្យនៅក្រៅឃុំជាបណ្តោះអាសន្ន ប៉ុន្តែមិនត្រូវបានទម្លាក់ចោលការចោទប្រកាន់នោះទេ។ នេះបើតាមការបញ្ជាក់ពីលោក សំ សុខគង់ មេធាវីការពារក្តីឲ្យ សួង នាគព័ន្ធ។ បើតាមលោកមេធាវី ការសម្រេចរបស់លោកចៅក្រម និល ណុន នេះ គឺដោយផ្អែកលើសំអាងហេតុត្រឹមត្រូវរបស់ក្រុមមេធាវីការពារក្តី ដែលស្នើសុំឲ្យកូនក្តីរបស់ខ្លួនបាននៅក្រៅឃុំ ហើយថា ការបន្តឃុំខ្លួនសួង នាគព័ន្ធ គឺមិនមានប្រយោជន៍ទៀតនោះទេ។
សួង នាគព័ន្ធ អាយុ ២៩ឆ្នាំ ត្រូវបានអាជ្ញាធរកម្ពុជាចាប់ខ្លួន កាលពីថ្ងៃទី ១០ កក្កដា នៅខាងក្រៅស្ថានីយប្រេងឥន្ធនៈកាល់តិចស្ដុបបូកគោ ចំពេលមានការប្រារព្ធខួប៣ឆ្នាំនៃការបាញ់សម្លាប់លោកបណ្ឌិត កែម ឡី អ្នកវិភាគនយោបាយនៅកម្ពុជា។ លោកត្រូវបានចោទប្រកាន់ពី «បទញុះញង់ឱ្យប្រព្រឹត្តបទឧក្រិដ្ឋ ជាអាទិ៍» ជាមួយនឹងយុវជន គង់ រ៉ៃយ៉ា ដែលត្រូវបានចាប់ខ្លួននៅថ្ងៃទី ០៩ កក្កដា នៅមុនព្រឹត្តិការណ៍រំលឹកខួប៣ឆ្នាំនៃឃាតកម្មលើលោកបណ្ឌិត កែម ឡី។ ក្រៅពីយុវជន សួង នាគព័ន្ធ យុវជន គង់ រ៉ៃយ៉ា ដែលរងការចោទប្រកាន់ដូចគ្នានេះ ត្រូវបានតុលាការកំពូលបដិសេធឲ្យនៅក្រៅឃុំកាលពីខែមុន ប៉ុន្តែភរិយារបស់លោក គង់ រ៉ៃយ៉ា សង្ឃឹមថា ស្វាមីរបស់ខ្លួន ក៏នឹងត្រូវបានអនុញ្ញាតឲ្យនៅក្រៅឃុំផងដែរ បន្ទាប់ពីមេធាវីបានដាក់លិខិតសុំនៅក្រៅឃុំជាថ្មីទៅកាន់តុលាការក្រុងភ្នំពេញ នៅថ្ងៃនេះ។
អ្វីជាការកត់សំគាល់ ការដោះលែងយុវជន កែម ឡី និយមឲ្យនៅក្រៅឃុំជាបណ្តោះអាសន្ននេះ គឺធ្វើឡើងនៅក្នុងបរិបទនៃការវិវត្តន៍ស្ថានការណ៍នយោបាយនៅកម្ពុជាកំពុងមានការប្រែប្រួល។ សកម្មជនអតីតគណបក្សប្រឆាំងជាច្រើននាក់ដែលរងការចោទប្រកាន់ពីបទរួមគំនិតក្បត់ ត្រូវបានតុលាការកម្ពុជាសម្រេចដោះលែងឲ្យនៅក្រៅឃុំ តាមរយៈការប្រកាសពីលោកនាយករដ្ឋមន្ត្រី ហ៊ុន សែន នៅថ្ងៃទី ១៤ វិច្ឆិកា។
ជុំវិញស្ថានការណ៍វិវត្តន៍ចុងក្រោយនេះ ត្រូវបានលោក សម រង្ស៊ី ចាត់ទុកថា គឺដោយសារតែការតស៊ូរបស់ប្រជារាស្ត្រខ្មែរពីខាងក្នុងប្រទេសផង និងដោយសារតែមានសម្ពាធអន្តរជាតិ ពីក្រៅប្រទេសផង។ ជាពិសេស គឺសហភាពអឺរ៉ុប ទើបតែបានដាក់ឱសានវាទឲ្យលោកនាយករដ្ឋមន្ត្រី ហ៊ុន សែន បើកផ្លូវឲ្យលទ្ធិប្រជាធិបតេយ្យនៅកម្ពុជាដំណើរការឡើងវិញ ឲ្យបានមុនថ្ងៃ ១២ ធ្នូ ២០១៩ នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ