លោក សួន សេរីរដ្ឋា ប្តឹងសុំផ្អាកសកម្មភាពគណបក្សអំណាចខ្មែរដែលដឹកនាំដោយប្រធានថ្មី
ក្រោយចេញពីពន្ធនាគារវិញបានតែជាងពីរសប្តាហ៍ លោក សួន សេរីរដ្ឋា បានប្តឹងសុំផ្អាកសកម្មភាពគណបក្សអំណាចខ្មែរ ដោយចោទប្រធានថ្មីនៃគណបក្សនេះថា បានក្លែងបន្លំហត្ថលេខាសុំឈប់របស់ប្រធានចាស់ ដើម្បីបានឡើងធ្វើជាប្រធានថ្មី។ ប៉ុន្តែ លោក សួង សោភ័ណ្ឌ ជាប្រធានថ្មីគណបក្សអំណាចខ្មែរ បានប្រកាសប្តឹងបកវិញតាមផ្លូវតុលាការទៅលើ លោក សួន សេរីរដ្ឋា ពីបទបរិហាកេរ្តិ៍។
ចុះផ្សាយនៅថ្ងៃ៖
ស្តាប់ - ០១:៥៨
លោក សួន សេរីរដ្ឋា បានដាក់ពាក្យបណ្តឹងមួយទៅកាន់ក្រសួងមហាផ្ទៃ កាលពីថ្ងៃទី១០ខែកញ្ញា ដោយសុំឲ្យក្រសួងនេះ ផ្អាកសកម្មភាពរបស់គណបក្សអំណាចខ្មែរដែលដឹកនាំដោយប្រធានថ្មី គឺលោក សួង សោភ័ណ្ឌ។ លោក សួង សោភ័ណ្ឌ ដែលឡើងជាប្រធានគណបក្សនេះ បន្ទាប់ពីលោក សួន សេរីរដ្ឋា ត្រូវបានចាប់ដាក់ពន្ធនាគារក្រោមបទចោទប្រមាថកងទ័ព។ លោក សួន សេរីរដ្ឋា ត្រូវបានលោកនាយករដ្ឋមន្រ្តី ហ៊ុន សែន ស្នើព្រះមហាក្សត្រលើកលែងទោសកាលពីចុងខែសីហា បន្ទាប់ពី លោកបានសុំទោសប្រមុខរដ្ឋាភិបាល និងប្រមុខកងទ័ព។
លោក សួន សេរីរដ្ឋា បានលើកឡើងក្នុងលិខិតដាក់ជូន លោក ស ខេង រដ្ឋមន្រ្តីក្រសួងមហាផ្ទៃថា៖ លោកមិនដែលបានចុះហត្ថលេខា លើលិខិតលាលែងពីប្រធានបក្សទេ តែលោកទទួលស្គាល់ថា បានចុះហត្ថលេខាតែងតាំង លោក សួង សោភ័ណ្ឌ ជាប្រធានស្តីទីគណបក្សអំណាចខ្មែរដើម្បីដឹកនាំការងារប្រចាំថ្ងៃតែប៉ុណ្ណោះ។
ក្នុងលិខិតដដែលនេះ លោក សួន សេរីរដ្ឋា បានចោទលោក សួង សោភ័ណ្ឌ ថាបានក្លែងហត្ថលេខារបស់លោក ធ្វើលិខិតលាលែងក្លែងក្លាយ បន្លំសមាជិកបក្ស។ មិនតែប៉ុណ្ណោះ លោក សួន សេរីរដ្ឋា បានបន្ថែមថា លោក សួង សោភ័ណ្ឌ បានតែងតាំងអនុប្រធានបក្សពីររូបជំនួសអនុប្រធានដែលនៅក្នុងតំណែង ហើយប្តូររូបសញ្ញាគណបក្ស និងធ្វើសោធនកម្មច្បាប់លក្ខន្តិកៈគណបក្សទាំងរំលោភច្បាប់ដើម។
ទោះជាយ៉ាងណាយោងតាម លិខិតរបស់ក្រសួងមហាផ្ទៃ កាលពីថ្ងៃទី១ ខែកុម្ភៈឆ្នាំ២០១៨ គឺលោក ស ខេង បានទទួលស្គាល់លទ្ធផលនៃការធ្វើសមាជរបស់គណបក្សអំណាចខ្មែរ ដែលធ្វើកាលពីថ្ងៃទី១៥ ខែធ្នូឆ្នាំ២០១៧។ ជាសមាជដែលបានធ្វើវិសោធនកម្មច្បាប់លក្ខន្តិកៈ ការប្តូររូបសញ្ញាសំគាល់ និងការតែងតាំងអនុប្រធានពីររូបជំនួសអនុប្រធានដែលបានលាឈប់។
លោក សួង សោភ័ណ្ឌ ជាប្រធានថ្មីគណបក្សអំណាចខ្មែរ បានប្រាប់វិទ្យុបារាំងអន្តរជាតិ RFI ថាលោកនឹងប្តឹងបកវិញតាមផ្លូវតុលាការទៅលើ លោក សួន សេរីរដ្ឋា ពីបទបរិហាកេរ្តិ៍ នៅសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ