របាយការណ៍ UNODC៖ កាស៊ីណូនៅកម្ពុជា អាចជាកន្លែងលាងលុយកខ្វក់ពីឧក្រិដ្ឋកម្មគ្រឿងញៀន
ការិយាល័យអង្គការសហប្រជាជាតិ ស្តីពី គ្រឿងញៀន និង ឧក្រិដ្ឋកម្ម (UN Office on Drugs and Crimes) កាលពីថ្ងៃទី ១៨ កក្កដា បានចេញផ្សាយរបាយការណ៍ស្តីពី «បណ្តាញឧក្រិដ្ឋកម្មនៅអាស៊ីអាគ្នេយ៍៖ ការវិវឌ្ឍន៍ ទំហំរីកចំរើន និងផលប៉ះពាល់ (Transnational Organized Crime in Southeast Asia : Evolution, Growth and Impact)»។ ជារបាយការណ៍ ដែលបានលើកឡើងពីឧក្រិដ្ឋកម្មគ្រឿងញៀន ការជួញដូរមនុស្ស និងសត្វព្រៃនៅក្នុងតំបន់អាស៊ីអាគ្នេយ៍។ ប៉ុន្តែតាមរយៈរបាយការណ៍ដែលមានកម្រាស់ជិត២០០ទំព័រនេះ បានលើកឡើងពីការព្រួយបារម្ភថា ការកើនឡើងនៃចំនួនកាស៊ីណូនៅតំបន់អាស៊ីអាគ្នេយ៍ ក្នុងនោះមានកម្ពុជាផង ថាអាចជាកន្លែងលាងលុយកខ្វក់ ពីជំនួញខុសច្បាប់ទាំងនោះ។
ចុះផ្សាយនៅថ្ងៃ៖
ស្តាប់ - ០២:៣៤
តាមរយៈរបាយការណ៍ដែលមានកម្រាស់១៩៤ទំព័រ ដែលមានចំណងជើងថា «ឧក្រិដ្ឋកម្មឆ្លងដែនក្នុងតំបន់អាស៊ីអាគ្នេយ៍» ការិយាល័យអង្គការសហប្រជាជាតិ ស្តីពី គ្រឿងញៀន និង ឧក្រិដ្ឋកម្ម (UN Office on Drugs and Crimes) បានដាក់ការព្រួយបារម្ភថា ការកើនឡើងនៃចំនួនកាស៊ីណូនៅក្នុងតំបន់អាស៊ីអាគ្នេយ៍ ក្នុងនោះរួមមានប្រទេសកម្ពុជាផង ថាអាចជាទីកន្លែងនៃការលាងលុយកខ្វក់របស់ក្រុមឧក្រិដ្ឋជនគ្រឿងញៀន។
របាយការណ៍ដែលបានចេញផ្សាយពីទីក្រុងបាងកកប្រទេសថៃ កាលពីថ្ងៃទី ១៨ កក្កដានេះបានកត់សំគាល់ថា គិតត្រឹមខែមករាឆ្នាំ២០១៩មក មានកាស៊ីណូចំនួន២៣០ ត្រូវបានបង្កើតឡើងនៅក្នុងតំបន់អាស៊ីអាគ្នេយ៍ ដោយក្នុងនោះ នៅកម្ពុជាមានកាស៊ីណូចំនួន១៥០កន្លែង និងកាស៊ីណូ៦៧កន្លែងផ្សេងទៀត មានទីតាំងស្ថិតនៅក្នុងប្រទេស ហ្វីលីពីន មីយ៉ាន់ម៉ា និងប្រទេសឡាវ ជាដើម។ របាយការណ៍របស់អង្គការសហប្រជាជាតិ ស្តីពី គ្រឿងញៀន និង ឧក្រិដ្ឋកម្មនេះ បានដាក់ការព្រួយបារម្ភថា ការកើនឡើងនៃចំនួនកាស៊ីណូនៅក្នុងតំបន់អាស៊ីអាគ្នេយ៍នេះ កើតឡើងក្រោយពីមានការបង្ក្រាបទៅលើករណីលាងលុយកខ្វក់ នៅទីក្រុងម៉ាកាវ ប្រទេសចិន កាលពី២០១៤។ ក្រោយការបង្ក្រាបការលាងលុយកខ្វក់នោះ ទំនងជាបាននាំឲ្យមានការផ្លាស់ប្តូរសកម្មភាពឧក្រិដ្ឋកម្មទៅកាន់តំបន់អាស៊ីអាគ្នេយ៍ ជាពិសេសចំពោះប្រទេសនៅក្នុងតំបន់ទន្លេមេគង្គ ដែលមានប្រព័ន្ធច្បាប់ទន់ខ្សោយ។
លោក Jeremy Douglas អ្នកតំណាងនៃការិយាល័យនេះ បានថ្លែងនៅក្នុងឱកាសធ្វើបទបង្ហាញរបាយការណ៍នេះថា តំបន់អាស៊ីអាគ្នេយ៍ គឺជាជង្រុក គឺជាស្នូលកណ្តាល នៃការជួញដូរថ្នាំញៀន ប្រភេទម៉េតំហ្វេតាមីន នៃសកលលោកទាំងមូល។ ចំណែកឯចំណូលរាប់សិបពាន់លានដុល្លារ ដែលបានមកពីជំនួញឧក្រិដ្ឋកម្មគ្រឿងញៀននេះ ត្រូវគេយកទៅលាងសម្អាត ក្រោមរូបភាពផ្សេងៗ ដូចជា តាមរយៈកាស៊ីណូ និងការវិនិយោគសំណង់អចលនទ្រព្យ នៅតាមប្រទេសមួយចំនួន ដូចជា នៅកម្ពុជា និង ប្រទេសឡាវ ជាដើម។
យ៉ាងណាក៏ដោយ លោក ខៀវ សុភ័គ អ្នកនាំពាក្យក្រសួងមហាផ្ទៃ បានស្វាគមន៍ចុះស៊ើបអង្កេតភ្លាម ទៅលើកាស៊ីណូណាមួយ ដែលត្រូវបានបង្ហាញនៅក្នុងរបាយការណ៍នេះថា មានករណីលាងលុយកខ្វក់។ ប៉ុន្តែថា កម្ពុជានឹងមិនស្វាគមន៍ឡើយ ចំពោះរបាយការណ៍ដែលចោទប្រកាន់មកលើប្រទេសកម្ពុជាជាលក្ខណៈទូទៅ។ លោកបានចាត់ទុករបាយការណ៍បែបនោះថា ជារបាយការណ៍បែបនយោបាយ។
គួរជំរាបជូនថា កាលពីពេលថ្មីៗនេះ សមត្ថកិច្ចកម្ពុជា បានរឹបអូសប្រាក់ជាង៧លានដុល្លារ ពីជនបរទេស ក្រោយពីស៊ើបអង្កេតរកឃើញថា ថវិកាទាំងនោះ គ្មានប្រភពច្បាស់លាស។ ប៉ុន្តែ ទាក់ទងនឹងបទល្មើសលាងលុយកខ្វក់ តាមរយៈការលេងល្បែងនៅក្នុងកាស៊ីណូនេះ អាជ្ញាធរកម្ពុជា នៅមិនទាន់រកឃើញនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ