លោក សម រង្ស៊ី ប្រតិកម្មជាលើកដំបូង ក្រោយពីសភាគ្រោងធ្វើវិសោនធកម្មច្បាប់បែងចែកកៅអីបក្សប្រឆាំង
លោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងរស់នៅដោយនិរទេសខ្លួននៅក្រៅប្រទេស កាលពីយប់ថ្ងៃទី ១៣ តុលា បានបញ្ចេញប្រតិកម្មជាលើកដំបូង ទាក់ទងនឹងគម្រោងរបស់គណបក្សកាន់អំណាច ដែលចង់រំលាយគណបក្សសង្គ្រោះជាតិ និងយកតំណែងរបស់គណបក្សប្រឆាំងទាំងនៅថ្នាក់ជាតិនិងថ្នាក់មូលដ្ឋាន ទៅចែកឲ្យគណបក្សដទៃ។ តាមរយៈវីដេអូឃ្លីបជិត៨នាទី លោក សម រង្ស៊ី បានហៅគម្រោងនេះថា គឺជាអំពើប្លន់ឆន្ទៈរាស្ត្រជាង៣លាននាក់ដែលបានបោះឆ្នោតឲ្យគណបក្សប្រឆាំង។
ចុះផ្សាយនៅថ្ងៃ៖
ស្តាប់ - ០២:៣០
ផ្តើមចេញពីប្រតិកម្មខាងលើនេះ លោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងរស់នៅដោយនិរទេសខ្លួននៅក្រៅប្រទេស ដើម្បីគេចចេញពីការកាត់ទោសដោយតុលាការទីក្រុងភ្នំពេញតាំងពីខែវិច្ឆិកា ឆ្នាំ២០១៥នោះ បានហៅគម្រោងធ្វើវិសោធនកម្មច្បាប់របស់គណបក្សកាន់អំណាចនៅក្នុងសប្តាហ៍នេះថា គឺជាអំពើប្លន់ឆន្ទៈរាស្ត្រជាង៣លាននាក់ដែលបានបោះឆ្នោតឲ្យគណបក្សប្រឆាំង។ តាមរយៈវីដេអូឃ្លីបជាង៨នាទី ដែលគេបានឃើញបង្ហោះនៅលើគណនីហ្វេសបុករបស់លោក កាលពីថ្ងៃទី ១៣ តុលា លោក សម រង្ស៊ី បានហៅវិសោធនកម្មច្បាប់ទាំងបួននោះថា គឺធ្វើឡើងតាមតែការនឹកឃើញ និងការចង់បានរបស់គណបក្សកាន់អំណាចប៉ុណ្ណោះ។
នេះគឺជាលើកទីមួយហើយ ដែលអតីតប្រធានគណបក្សសង្គ្រោះជាតិ លោក សម រង្ស៊ី បានបញ្ចេញប្រតិកម្មខ្លាំងក្លាមួយទៅកាន់រដ្ឋាភិបាលទីក្រុងភ្នំពេញ បន្ទាប់ពីរដ្ឋសភាដែលមានតែសមាជិកគណបក្សកាន់អំណាចចំនួន៦៧រូបនៅក្នុងសប្តាហ៍នេះ បានស្នើធ្វើវិសោធនកម្មច្បាប់ចំនួនបួន គឺច្បាប់ស្តីពីការបោះឆ្នោតជ្រើសតាំងតំណាងរាស្ត្រ, ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា, ច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ និងច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់។ វិសោធនកម្មច្បាប់ទាំងបួន ដែលកំពុងស្ថិតនៅក្នុងដៃរបស់គណៈកម្មការទី៦នៃរដ្ឋសភាពិនិត្យ តាំងពីថ្ងៃទី ១២តុលានោះ គឺដើម្បីឈានទៅបែងចែកអាសនៈរបស់គណបក្សដែលត្រូវរំលាយទៅឲ្យគណបក្សដទៃ។
លោក សម រង្ស៊ី បានប្រៀបធៀបទៅនឹងចំណាត់ការចុងក្រោយរបស់អាជ្ញាធរក្រុងភ្នំពេញនៅប៉ុន្មានសប្តាហ៍ចុងក្រោយនេះថា មិនបានឆ្លុះបញ្ចាំងពីការប្រកួតប្រជែងតាមបែបកីឡានោះទេ។ គេមិនដែលឲ្យគូរប្រកួតម្ខាង កែរបទបញ្ញត្តិចុះឡើង នៅក្នុងពេលប្រកួត ឬកំពុងរៀបចំប្រកួតនោះទេ។ នេះបើតាមលោក សម រង្ស៊ី។
បន្ថែមលើនេះ លោក សម រង្ស៊ី បានចាត់ទុកគម្រោងបែបនេះថា គឺជារឿងចម្លែកមួយ ដែលគេកម្រនឹងឃើញមាននៅក្នុងប្រវត្តិសាស្ត្រវិវត្តន៍នៃលទ្ធិប្រជាធិបតេយ្យនៅក្នុងពិភពលោក។ យ៉ាងណាក៏ដោយ លោក សុខ ឥសាន អ្នកនាំពាក្យគណបក្សប្រជាជនកម្ពុជា និងជាសមាជិកសភាមួយរូបដែលចូលរួមប្រជុំសភាកាលពីថ្ងៃទី១២ តុលា បានចាត់ទុកការចោទប្រកាន់នេះថា គឺជាការវាយតម្លៃមិនត្រឹមត្រូវមកលើគណបក្សកាន់អំណាចរបស់លោក។ គណបក្សកាន់អំណាច ដែលនឹងមិនទទួលយកអាសនៈសភារបស់គណបក្សដែលត្រូវរំលាយនោះទេ។
យ៉ាងណាក៏ដោយ នៅចុងបញ្ចប់នៃប្រតិកម្មរបស់អតីតប្រធានគណបក្សប្រឆាំង លោក សម រង្ស៊ី នៅតែជឿជាក់ថា រដ្ឋាភិបាលទីក្រុងភ្នំពេញ នឹងមិនអាចធ្វើបែបនេះបានទេ។ ត្បិតប្រតិកម្មជុំវិញពិភពលោក នឹងធ្វើឲ្យរដ្ឋាភិបាលទីក្រុងភ្នំពេញ ងាកមករកគន្លងនៃលទ្ធិប្រជាធិបតេយ្យឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ