ក្រសួងបរិស្ថាន៖ ទីក្រុងភ្នំពេញ មិនមានបញ្ហាខ្យល់ពុលបង្កឡើងដោយធាតុល្អិតឆ្មានោះទេ
ក្រសួងបរិស្ថាន កាលពីថ្ងៃម្សិលមិញ (៤ ឧសភា) បានចេញមកបញ្ជាក់ថា ទីក្រុងធំៗរបស់កម្ពុជាពិសេសទីក្រុងភ្នំពេញ មិនមានបញ្ហាខ្យល់ពុលលើសពីកម្រិតសុវត្ថិភាពសុខភាពនោះទេ។ ការចេញមកបញ្ជាក់របស់ក្រសួងបរិស្ថាន គឺបន្ទាប់ពីមានការផ្សព្វផ្សាយព័ត៌មានថា ស្ថានភាពគុណភាពខ្យល់នៅក្នុងរាជធានីភ្នំពេញ កំពុងទទួលរងការបំពុលលើសពីកម្រិតសុវត្ថិភាពដែលបង្កឡើងដោយធាតុល្អិតឆ្មាៗ។
ចុះផ្សាយនៅថ្ងៃ៖
ស្តាប់ - ០២:៣៩
លទ្ធផលនៃការអង្កេតតាមដានគុណភាពខ្យល់នៅតាមទីក្រុងធំៗ ពិសេសនៅក្នុងទីក្រុងភ្នំពេញ បានបង្ហាញថា កម្ពុជាមិនទាន់មានការបំពុលខ្យល់ធ្ងន់ធ្ងរ ដូចព័ត៌មានដែលបានផ្សព្វផ្សាយនោះទេ។ នេះបើយោងតាមសេចក្តីប្រកាសព័ត៌មានរបស់ក្រសួងបរិស្ថានកម្ពុជា ចុះថ្ងៃទី ៤ ឧសភា។ សេចក្តីប្រកាសព័ត៌មាននេះ ក៏បានអំពាវនាវសូមកុំឲ្យសាធារណជនព្រួយបារម្ភ អំពីសុវត្ថិភាពក្នុងការធ្វើដំណើរ និងប្រកបមុខរបរនៅតាមទីសាធារណៈឲ្យសោះ។
បើតាមសេចក្តីប្រកាសរបស់ក្រសួងបរិស្ថាន ចាប់តាំងពីឆ្នាំ២០០៣ រហូតមកដល់បច្ចុប្បន្ននេះ ក្រសួងបានធ្វើការអង្កេតតាមដានគុណភាពខ្យល់ នៅតាមបណ្តាទីក្រុងធំៗក្នុងប្រទេសកម្ពុជា ជាពិសេសនៅក្នុងរាជធានីភ្នំពេញ ដើម្បីតាមដាននិងវាយតម្លៃអំពីស្ថានភាពគុណភាពខ្យល់ សំដៅធានាដល់សុខភាពសាធារណៈ។ ហើយនៅឆ្នាំ២០១៧កន្លងទៅ ក្រសួងបរិស្ថាន បានបំពាក់បន្ថែមនូវឧបករណ៍សម្រាប់តាមដានគុណភាពខ្យល់លើភាគល្អិតនិចល (ឬភាគល្អិតឆ្មារ) PM10 និង PM2.5 ដែលជាប្រភេទភាគល្អិតបង្កផលប៉ះពាល់ដល់ផ្លូវដង្ហើមធ្ងន់ធ្ងរ។ ប៉ុន្តែលទ្ធផលនៃការអង្កេតតាមដានគុណភាពខ្យល់នោះបានបង្ហាញថា កម្ពុជា នៅមិនទាន់មានការបំពុលខ្យល់ធ្ងន់ធ្ងរនោះទេ។
របាយការណ៍របស់អង្គការសុខភាពពិភពលោក ចេញផ្សាយកាលពីថ្ងៃទី ២ ឧសភា បានព្រមានពីគ្រោះថ្នាក់ដល់អាយុជីវិត ដែលបង្កឡើងដោយខ្យល់ពុល ក្នុងនោះ មានមនុស្ស ដល់ទៅ៩នាក់ក្នុងចំណោម១០នាក់ ដែលរស់នៅលើពិភពផែនដី បាននិងកំពុងដកដង្ហើមស្រូបយកខ្យល់ពុល ដែលមានធាតុល្អិតឆ្មារៗខ្លាំងជាប្រចាំនិងជារៀងរាល់ថ្ងៃ។ ខ្យល់ពុល ជាខ្យល់ដែលបញ្ចេញដោយរោងចក្រឧស្សាហកម្ម មធ្យោបាយដឹកជញ្ជូន ក្នុងបរិយាកាសខាងក្រៅផង និងជាខ្យល់ពុលវល់ក្នុងផ្ទះគ្មានចរន្តប្តូរផ្លាស់ផង។ បើតាមរបាយការណ៍នេះ កំរិតនៃជាតិពុលក្នុងខ្យល់កំពុងមានខ្ពស់ខ្លាំង នៅតាមតំបន់ដើមបូព៌ា អាហ្វ្រិកខាងជើង និងអាស៊ីអាគ្នេយ៍ ប៉ុន្តែមិនបានបញ្ជាក់ថា មាននៅក្នុងប្រទេសកម្ពុជានោះនៅឡើយទេ។ បើតាមរបាយការណ៍ ថា ជារៀងរាល់ឆ្នាំ ខ្យល់ពុលក្នុងបរិយាកាស បានសម្លាប់មនុស្សឱ្យស្លាប់មុនអាយុចំនួន៧លាននាក់នៅលើពិភពលោក។ មានន័យថា ជាចំនួនមរណៈដ៏ច្រើនខ្លាំងជាងចំនួនមរណៈព្រោះជំងឺស៊ីដា (១,១លាននាក់) របេង (១,៤លាននាក់) ទឹកនោមផ្អែម (១,៦លាននាក់) និងគ្រោះថ្នាក់ចរាចរណ៍ (១,៣លាននាក់) បូកបញ្ចូលគ្នាទៅទៀត។
យ៉ាងណាក៏ដោយ ក្រសួងបរិស្ថានបានអះអាងថា ខ្លួននឹងបន្តតាមដានស្ថានភាពគុណភាពខ្យល់នៅតាមទីក្រុងធំៗ ពិសេសនៅក្នុងរាជធានីភ្នំពេញ ដែលជាតំបន់មមាញឹកខ្លាំងក្នុងសកម្មភាពរោងចក្រ ឧស្សាហកម្ម ពាណិជ្ជកម្ម ការធ្វើដំណើរ និងទេសចរណ៍។ ហើយក្រសួងនេះ បានសន្យាថា នឹងជូនដំណឹងដល់សាធារណជន ប្រសិនបើមានភាពមិនប្រក្រតីណាមួយកើតឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ