អតីតមេដឹកនាំខ្មែរក្រហម នួន ជា និងខៀវ សំផន ត្រូវបានកាត់ទោសឲ្យជាប់ពន្ធនាគារអស់មួយជីវិតជាលើកទី០២
តុលាការខ្មែរក្រហមនៅថ្ងៃទី ១៦ វិច្ឆិកា នេះ បានកាត់ទោសអតីតមេដឹកនាំជាន់ខ្ពស់នៃរបបខ្មែរក្រហមពីររូបគឺ លោក នួន ជា និង ខៀវ សំផន ឲ្យជាប់ពន្ធនាគារអស់មួយជីវិត នៅក្នុងសំណុំរឿង ០០២ វគ្គ ០២។ គួរជំរាបជូនថា នេះគឺជាការកាត់ទោសឲ្យជាប់ពន្ធនាគារអស់មួយជីវិតជាលើកទី០២ បន្ទាប់ពីសំណុំរឿង០០២វគ្គ០១ តុលាការក៏បានកាត់ទោសឲ្យអតីតមេដឹកនាំខ្មែរក្រហមទាំងពីររូប ជាប់ពន្ធនាគារអស់មួយជីវិតដែរ។ ប៉ុន្តែផ្អែកតាមប្រការ៧៥និង៧៦នៃសេចក្តីសម្រេចនេះ អង្គជំនុំជម្រះបានរួមបញ្ចូលគ្នានូវការផ្តន្ទាទោសទាំងពីរ ទៅជាការផ្តន្ទាទោសដាក់ពន្ធនាគារអស់មួយជីវិត តែមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០១
គឺបន្ទាប់ពីបើកសវនាការអស់រយៈពេល២៨៣ថ្ងៃរួចមក នៅទីបំផុតទៅ អតីតមេដឹកនាំជាន់ខ្ពស់ខ្មែរក្រហមពីររូប គឺលោក នួន ជា និង ខៀវ សំផន ត្រូវបានអង្គជំនុំជម្រះសាលាដំបូងនៃសាលាក្តីខ្មែរក្រហម បានផ្តន្ទាទោសឲ្យជាប់ពន្ធនាគារអស់មួយជីវិតជាលើកទី០២ នៅក្នុងសំណុំរឿង ០០២/០២ ។ នៅក្នុងសំណុំរឿង០០២/០១ កាលពីថ្ងៃទី ០៧ ខែសីហា ឆ្នាំ ២០១៤ ជនជាប់ចោទទាំងពីររូប ក៏ត្រូវបានតុលាការកាត់ទោសឲ្យជាប់ពន្ធនាគារអស់មួយជីវិតដែរ។ ប៉ុន្តែ ផ្អែកតាមប្រការ៧៥និង៧៦នៃសេចក្តីសម្រេចនេះ អង្គជំនុំជម្រះបានរួមបញ្ចូលគ្នានូវការផ្តន្ទាទោសទាំងពីរ ទៅជាការផ្តន្ទាទោសដាក់ពន្ធនាគារអស់មួយជីវិត តែមួយ។
នៅក្នុងសេចក្តីសម្រេចដែលធ្វើឡើងជាសាធារណៈនៅព្រឹកថ្ងៃទី ១៦ វិច្ឆិកា លោកចៅក្រម និល ណុន ប្រធានអង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា បានប្រកាសថា ជនជាប់ចោទ នួន ជា និង ខៀវ សំផន គឺជាអ្នកទទួលខុសត្រូវខ្ពស់បំផុតនៃរបបខ្មែរក្រហម។ ជនជាប់ចោទទាំងពីររូប ត្រូវបានចោទប្រកាន់ពីបទឧក្រិដ្ឋកម្មជាច្រើនប្រឆាំងនឹងមនុស្សជាតិ ការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ និងឧក្រិដ្ឋកម្មប្រល័យពូជសាសន៍ តាមរយៈការចូលរួមនៅក្នុងសហឧក្រិដ្ឋកម្មរួម ចន្លោះពីថ្ងៃទី ១៧ ខែមេសា ឆ្នាំ១៩៧៥ ដល់ថ្ងៃទី ០៦ មករា ឆ្នាំ ១៩៧៩។ នៅអំឡុងពេលនោះ លោក នួន ជា ត្រូវបានគេដឹងថា មានតួនាទីជាច្រើន រួមមាន ជាអនុលេខាបក្សកុម្មុយនីស្តកម្ពុជា ជាសមាជិកពេញសិទ្ធនៃគណៈកម្មាធិការមជ្ឈិម និងគណៈកម្មាធិការអចិន្ត្រៃយ៍បក្ស ជាប្រធានសភាតំណាងប្រជាជន ហើយពេលខ្លះជានាយករដ្ឋមន្ត្រីស្តីទីនៃរដ្ឋាភិបាលកម្ពុជាប្រជាធិបតេយ្យ។ ចំណែក លោក ខៀវ សំផន វិញត្រូវបានចោទប្រកាន់ថា មានតួនាទីជាច្រើននៅក្នុងបក្សកុម្មុយនីស្តកម្ពុជា និងក្នុងរបបកម្ពុជាប្រជាធិបតេយ្យ ដោយធ្លាប់ធ្វើជាប្រធានគណៈប្រធានរដ្ឋផង។ នៅក្នុងសំណុំរឿងនេះ មានជនជាប់ចោទពីររូបទៀត គឺលោក អៀង សារី អតីតរដ្ឋមន្ត្រីកាបរទេសខ្មែរក្រហម និងលោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចនៃរបបខ្មែរក្រហម។ ប៉ុន្តែសំណុំរឿងប្រឆាំងជនជាប់ចោទទាំងពីររូបបានរលត់ទៅវិញ បន្ទាប់ពី លោក អៀង សារី បានទទួលមរណភាពនៅដើមឆ្នាំ២០១៣ ហើយលោកស្រី អៀង ធីរិទ្ធ ដែលជាភរិយា បានទទួលមរណភាពនៅឆ្នាំ២០១៥ ។
គួរជំរាបជូនថា សវនាការពិនិត្យលើភស្តុតាងនៅក្នុងសំណុំរឿង ០០២/០២ នេះ បានចាប់ផ្តើមដោយការធ្វើសេចក្តីសន្និដ្ឋានចោទប្រកាន់ នៅថ្ងៃទី ១៧ ខែតុលា ឆ្នាំ ២០១៤ និងបានបញ្ចប់នៅថ្ងៃទី ១១ ខែមករា ឆ្នាំ ២០១៧ ។ សវនាការនេះ បានចំណាយពេលអស់ ២៨៣ថ្ងៃ ដោយអង្គជំនុំជម្រះសាលាដំបូងបានស្តាប់សក្ខីកម្មបុគ្គលចំនួន ១៨៥នាក់ ក្នុងនោះមានសាក្សីចំនួន ១១៤នាក់ ភាគីដើមបណ្តឹងរដ្ឋប្បវេណីចំនួន ៦៣នាក់ និងអ្នកជំនាញចំនួន ៨នាក់។ យ៉ាងណាក៏ដោយ ផ្អែកតាមវិធានផ្ទៃក្នុងនៃអង្គជំនុំជម្រះវិសាមញ្ញក្នុងតុលាការកម្ពុជា អតីតមេដឹកនាំជាន់ខ្ពស់នៃរបបខ្មែរក្រហមទាំងពីររូប មានសិទ្ធិប្តឹងសាទុក្ខតាមការកំណត់នៃច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ