កងកម្លាំងជិត៦ពាន់នាក់ចេញមកហ្វឹកហាត់នៅមុខព្រះបរមរាជវាំង ត្រៀមអបអរសាទរទិវាឯករាជ្យជាតិ៩វិច្ឆិកា
កងកម្លាំងចម្រុះជិត៦ពាន់នាក់ មកពីអង្គភាពនានា បានចេញមកហ្វឹកហាត់នៅមុខព្រះបរមរាជវាំង នៅព្រឹកថ្ងៃអាទិត្យ ទី៤ វិច្ឆិកានេះ ដើម្បីត្រៀមចូលរួមអបអរសាទរ ទិវាបុណ្យឯករាជ្យជាតិ ៩ វិច្ឆិកា ខួបលើកទី ៦៥ ។ បុណ្យឯករាជ្យជាតិ ៩ វិច្ឆិកា ឆ្នាំនេះ រដ្ឋាភិបាលកម្ពុជា គ្រោងនឹងរៀបចំធ្វើឡើងឲ្យបានអធិកអធមជាងបណ្តាឆ្នាំមុនៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ស្របពេលដែលទិវាបុណ្យឯករាជ្យជាតិ ៩ វិច្ឆិកា ជិតឈានចូលមកដល់ នៅព្រឹកថ្ងៃអាទិត្យ ទី០៤ ខែវិច្ឆិកានេះ កងកម្លាំងចម្រុះដែលរួមមាន កងកម្លាំងនគរបាលជាតិ កងរាជអាវុធហត្ថលើផ្ទៃប្រទេស និងកងយោធពលខេមរភូមិន្ទ បានចេញមកហ្វឹកហាត់ព្រមៗគ្នា នៅឯខាងមុខព្រះបរមរាជវាំង។ ការហ្វឹកហាត់នេះ មានការចូលរួមពីកងកម្លាំងចម្រុះជិត៦ពាន់នាក់ ដោយចែកចេញជា៥៤ផែន។ នេះបើតាមការបញ្ជាក់ពីលោក ឆាយ គឹមឃឿន អ្នកនាំពាក្យ និងជាអគ្គស្នងការរងនគរបាលជាតិ។
បើតាមអ្នកនាំពាក្យរូបនេះ ការហ្វឹកហាត់នៅថ្ងៃអាទិត្យនេះ រួមមាន ការហ្វឹកហាត់ពីរបៀបនៃការដើរក្បួន ការឈរ និងកាយវិការផ្សេងៗទៀត ដើម្បីធ្វើយ៉ាងណា ឲ្យសាកសមជាកងកម្លាំងរបស់ជាតិ។ បើតាមអ្នកនាំពាក្យដដែល ការហ្វឹកហាត់នេះ បានធ្វើឡើងអស់រយៈពេលជាច្រើនខែមកហើយ ប៉ុន្តែការហ្វឹកហាត់នៅថ្ងៃនេះ គឺជាលើកទី១ហើយ ដែលកងកម្លាំងទាំងអស់ បានមកហ្វឹកហាត់រួមគ្នានៅខាងមុខព្រះបរមរាជវាំង ដើម្បីត្រៀមចូលរួមអបអរសាទរ ទិវាបុណ្យឯករាជ្យជាតិ ៩ វិច្ឆិកា ខួបលើកទី៦៥ឆ្នាំ។ ការហ្វឹកហាត់លើកទី២ នឹងធ្វើឡើង នៅថ្ងៃពុធ ទី ៧ វិច្ឆិកា ដែលនឹងមានការចូលរួមពីផែនផ្សេងៗទៀត តួយ៉ាងដូចជា ផែនមន្ត្រីរាជការ និងយុវជនជាដើម។ សូមបញ្ជាក់ថា កងកម្លាំងដែលចូលរួមហ្វឹកហាត់នៅថ្ងៃនេះ រួមមាន ៥៤ ផែន ដែលមកពីកងកម្លាំងនគរបាលជាតិ កងរាជអាវុធហត្ថលើផ្ទៃប្រទេស និងកងយោធពលខេមរភូមិន្ទជាដើម។ ហើយនៅក្នុងផែននីមួយៗ មានកងកម្លាំងសរុបចំនួន១១០នាក់។
គួរជំរាបជូនថា ការចេញមកហ្វឹកហាត់របស់កងកម្លាំងចម្រុះកម្ពុជានៅថ្ងៃនេះ គឺនៅមុនពេល៥ថ្ងៃទៀតប៉ុណ្ណោះ ដែលប្រទេសកម្ពុជានឹងប្រារព្ធខួប៦៥ឆ្នាំ ទិវាបុណ្យឯករាជ្យជាតិ ៩ វិច្ឆិកា ដែលកម្ពុជារំដោះបានពីនឹមអាណានិគមនិយមបារាំង ក្រោមព្រះរាជបូជនីយកិច្ចដឹកនាំរបស់ព្រះមហាវីរក្សត្រកម្ពុជា ព្រះបរមរតនកោដ្ឋ។ តាមគម្រោង ការប្រារព្ធទិវាបុណ្យឯករាជ្យជាតិឆ្នាំនេះ រដ្ឋាភិបាលកម្ពុជា គ្រោងនឹងធ្វើឡើង ឲ្យបានអធិកអធមបើប្រៀបធៀបនឹងបណ្តាឆ្នាំមុន។ ការប្រារព្ធខួប៦៥ឆ្នាំ ទិវាបុណ្យឯករាជ្យជាតិ ៩ វិច្ឆិកា ក្នុងរយៈពេល៣ថ្ងៃនេះ នឹងប្រារព្ធធ្វើឡើង ក្រោមព្រះរាជធិបតីភាពដ៏ខ្ពង់ខ្ពស់របស់ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ