ទូក «ង» វែងជាងគេរបស់កម្ពុជា ជាប់កំណត់ត្រាពិភពលោក World Guinness
ទូក «ង» វែងជាងគេរបស់កម្ពុជាប្រវែងជិត១០០ម៉ែត្រ បានជាប់កំណត់ត្រាពិភពលោក World Guinness Record នៅថ្ងៃទី ១២ វិច្ឆិកានេះ បន្ទាប់ពីបានដាក់ឲ្យបង្ហាញខ្លួននៅលើដងទន្លេរបស់កម្ពុជា នៅទីប្រជុំជនអ្នកលឿងត្រើយខាងកើត។ ពិធីបំបែកកំណត់ត្រាពិភពលោកនេះ បានធ្វើឡើងក្រោមការចូលរួមពីលោកឧបនាយករដ្ឋមន្ដ្រី ស ខេង រដ្ឋមន្ដ្រីក្រសួងមហាផ្ទៃ និងលោក Pravin Patel គណកម្មាធិការវិនិច្ឆ័យមកពីអង្គការ World Guinness Record។
ចុះផ្សាយនៅថ្ងៃ៖
ស្តាប់ - ០២:១៧
«ទូក «ង» វែងជាងគេរបស់កម្ពុជា ឬ Dragon Boat ដែលប្រកាសឲ្យជាប់ឯតទគ្គកម្មពិភពលោក ឬ World Guinness Record នៅថ្ងៃនេះ មានប្រវែងសរុប ៨៧.៣ម៉ែត្រ ទទឹង១.៩៤ម៉ែត្រ និងជម្រៅ០.៨ម៉ែត្រ និងមានចំណុះទូក១៧៩នាក់។ ទូក «ង» វែងជាងគេរបស់កម្ពុជានេះ ត្រូវបានគេប្រសិទ្ធនាមថា «កម្ពោជិកបុត្តាខេមរាតរី» ដែលមានអត្ថន័យថា «ទូក ង របស់កូនខ្មែរ រស់នៅក្នុងដែនដីកម្ពុជា»។
មុនការប្រកាសនេះ លោក Pravin Patel អ្នកវិច្ឆ័យមកពីអង្គការ World Guinness Record បានចុះមកធ្វើការវាស់វែង និងបានពិនិត្យវាយតម្លៃមើលពីលក្ខណៈបច្ចេកទេស ខ្នាតរបស់ទូក និងការអុំបង្ហាញជាក់ស្តែង នៅព្រឹកថ្ងៃទី ១២ វិច្ឆិកានេះ។ ពិធីនេះ ត្រូវបានធ្វើឡើង នៅឯទីប្រជុំជនអ្នកលឿងត្រើយខាងកើត ស្ថិតក្នុងឃុំព្រែកខ្សាយ ខ, ស្រុកពាមរក៍ ខេត្តព្រៃវែង ដោយមានការចូលរួមពីលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី និងអ្នកពាក់ព័ន្ធជាច្រើនទៀត។ ទូក«ង» នេះ ត្រូវបានដឹកនាំផលិត ដោយ លោក ស សុខា កូនប្រុសរបស់លោកឧបនាយករដ្ឋមន្ត្រី ស ខេង និងអ្នកចូលរួមជាច្រើនទៀត ដោយប្រើប្រាស់ឈើគគីរអស់ចំនួន៦ដើម និងប្រើពេលផលិតអស់រយៈពេល១៩២ថ្ងៃ។
បើតាមលោក តុប នេត ប្រធានក្រុមការងាររដ្ឋបាលនិងខ្លឹមសារនៃគណៈកម្មការផលិតទូក «ង» ដើម្បីបំបែកកំណត់ត្រាពិភពលោកនេះ បានគូសបញ្ជាក់ប្រាប់វិទ្យុបារាំងអន្ដរជាតិ កាលពីថ្ងៃអាទិត្យថា ទូក «ង» ឯកខ្មែរនេះ នឹងបង្អួតខ្លួននៅលើទន្លេចតុមុខ មុខព្រះបរមរាជវាំង នៅក្នុងព្រះរាជពិធីបុណ្យអុំទូកខាងមុខ បន្ទាប់ពីដាក់ឲ្យជាប់កំណត់ត្រាពិភពលោកនៅថ្ងៃនេះ។
សូមជំរាបជូនថា ទូក «ង» របស់កម្ពុជាដែលជាប់កំណត់ត្រាពិភពលោក World Guinness Record នេះ ត្រូវបានរចនាឡើង ដោយផ្នែកខាងក្បាលទូកធ្វើជាក្បាលនាគ និងកន្ទុយហង្ស ប្រកបដោយក្បូរក្បាច់រចនាល្អប្រណិត ដែលអាចផ្ទុកចំណុះបាន១៧៩នាក់។ បច្ចុប្បន្ននេះ ទូកដែលវែងជាងគេលើពិភពលោក គឺជាទូករបស់ប្រទេសចិន ដែលមានប្រវែងសរុប ៧៧.៨ម៉ែត្រ ដោយបានបំបែកឯតទគ្គកម្មពិភពលោកកាលពីឆ្នាំ២០១។ យ៉ាងណាក៏ដោយ សម្រាប់ក្រុមអ្នករៀបចំកម្មវិធីនេះ បានចាត់ទុកថា នេះគឺជាមោទនភាពជាតិថ្មីមួយទៀតរបស់កម្ពុជា បន្ទាប់ពីការបំបែកកំណត់ត្រាក្រមាវែងជាងគេនៅលើពិភពលោក កាលពីពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ