រដ្ឋសភា ប្រកាសទទួលស្គាល់សុពលភាពតំណាងរាស្រ្តថ្មី៤៤រូប មកពីគណបក្សនយោបាយចំនួន៣
តំណាងរាស្ត្រថ្មីចំនួន៤៤រូប ដែលបានមកពីការបែងចែកអាសនៈរបស់អតីតគណបក្សសង្គ្រោះជាតិ ត្រូវបានរដ្ឋសភាប្រកាសផ្តល់សុពលភាពជាផ្លូវការហើយនៅព្រឹកថ្ងៃចន្ទ ទី២៧ ខែវិច្ឆិកានេះ។ ក្នុងនោះ៤១នាក់ មកពីគណបក្សហ្វ៊ុនស៊ិនប៉ិចរបស់ព្រះអង្គម្ចាស់ នរោត្តម រណឬទ្ធិ, ២នាក់មកពីគណបក្សសញ្ជាតិកម្ពុជា និងម្នាក់មកពីគណបក្សខ្មែរអភិវឌ្ឍន៍សេដ្ឋកិច្ច។ ចំណែក១១អាសនៈទៀតដែលនៅសល់ នឹងបែងចែកនៅពេលក្រោយ បន្ទាប់ពីគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ បានប្រកែកមិនទទួលយក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ផ្អែកតាមសេចក្តីប្រកាសព័ត៌មានរបស់រដ្ឋសភានៅថ្ងៃទី ២៧ វិច្ឆិកា នេះ រដ្ឋសភាដែលបានបើកកិច្ចប្រជុំពេញអង្គលើកទី៩ នីតិកាលទី៥ បានប្រកាសទទួលស្គាល់សុពលភាពតំណាងរាស្ត្រថ្មីចំនួន៤៤រូប មកពីគណបក្សនយោបាយចំនួន០៣។ ក្នុងនោះរួមមាន ទី១.គណបក្សហ្វ៊ុនស៊ិនប៉ិច មានចំនួន ៤១រូប ទី២.គណបក្សសញ្ជាតិកម្ពុជាចំនួន២រូប និងគណបក្សខ្មែរអភិវឌ្ឍន៍សេដ្ឋកិច្ចមានចំនួន១រូប គឺលោក ហួន រាជចំរើន ជាតំណាងរាស្ត្រមណ្ឌលខេត្តកណ្តាល។
កិច្ចប្រជុំរដ្ឋសភានៅថ្ងៃនេះ ធ្វើឡើងក្រោមអធិបតីភាពរបស់លោក ហេង សំរិន ប្រធានរដ្ឋសភាដោយមានកូរ៉ុមចំនួន៦៧នាក់ ប៉ុន្តែមិនឃើញមានវត្តមានរបស់លោកនាយករដ្ឋមន្ត្រី ហ៊ុន សែន នោះទេ។ ដោយឡែក សម្តេចក្រុមព្រះនរោត្តម រណឬទ្ធិ ដែលបានអវត្តមានពីកៅអីរដ្ឋសភាជាង១០ឆ្នាំ ពោលគឺចាប់តាំងពីព្រះអង្គត្រូវបានធ្វើបក្សប្រហារកាលពីខែតុលា ឆ្នាំ ២០០៦ មកនោះ បានបង្ហាញព្រះភក្ត្រនៅក្នុងកិច្ចប្រជុំនេះជាលើកដំបូងនៅក្នុងសម្លៀកបំពាក់អាវធំក្រវ៉ាត់ករពណ៌ផ្ទៃមេឃ។ អំណឹះតទៅ សម្តេចក្រុមព្រះ នរោត្តម រណឫទ្ធិ គឺជាតំណាងរាស្ត្រមណ្ឌលខេត្តកំពង់ចាម មកពីគណបក្សហ្វ៊ុនស៊ិនប៉ិច។
សូមបញ្ជាក់ថា កៅអីរដ្ឋសភាទាំង៤៤នេះ គឺបានមកពីការបែងចែកអាសនៈរបស់អតីតគណបក្សសង្គ្រោះជាតិចំនួន៥៥អាសនៈ ក្រោយពីគណបក្សសង្គ្រោះជាតិ ត្រូវបានរំលាយតាមអំណាចសាលដីការបស់តុលាការកំពូល កាលពីថ្ងៃទី១៦ ខែវិច្ឆិកា កន្លងទៅ។ ប៉ុន្តែ ដោយសារតែគណបក្សនយោបាយចំនួនពីរ គឺគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ បានប្រកែកមិនយក បានធ្វើឲ្យកៅអីនៅទំនេរមានចំនួន១១ ហើយនឹងត្រូវយកទៅបែងចែកនៅពេលក្រោយ។ យ៉ាងណាក៏ដោយ លោក អេង ឆៃអ៊ាង អតីតតំណាងរាស្ត្រនៃអតីតគណបក្សសង្គ្រោះជាតិ បានសរសេរនៅលើទំព័រហ្វេសបុករបស់ខ្លួន នៅថ្ងៃទី២៧ ខែវិច្ឆិកានេះ បានហៅការប្រកាសសុពលភាពតំណាងរាស្ត្រថ្មីទាំង៤៤រូបនេះថា គឺជាពួកអ្នកទទួលផលចោរប្លន់ "ឆន្ទៈរាស្ត្រ " ថាបានបង្ហាញមុខហើយ។
គួរជំរាបជូនដែរថា បន្ទាប់ពីទទួលបានការប្រកាសសុពលភាពជាតំណាងរាស្ត្រពីរដ្ឋសភានៅថ្ងៃនេះហើយ តំណាងរាស្ត្រថ្មីទាំង៤៤រូប មកពីគណបក្សនយោបាយទាំង៣ នឹងត្រូវចូលទៅស្បថនៅចំពោះព្រះភក្ត្រព្រះមហាក្សត្រកម្ពុជានៅថ្ងៃបន្ទាប់ មុននឹងចាប់ផ្តើមបំពេញការងាររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ