ពលរដ្ឋខ្មែរម្នាក់របួសធ្ងន់និង៣នាក់ទៀតរបួសស្រាល បន្ទាប់ពីការវាយប្រហារអត្តឃាតមួយនៅប្រទេសម៉ាលី
ពលរដ្ឋខ្មែរ៤នាក់ បានរងរបួស បន្ទាប់ពីមានការបំផ្ទុះគ្រាប់បែកភេរវកម្មអត្តឃាតមួយ នៅប្រទេសម៉ាលី កាលពីម៉ោង៧យប់ ថ្ងៃទី១២វិច្ឆិកា(ម៉ោងនៅម៉ាលី) ត្រូវនឹងវេលាព្រឹកថ្ងៃទី១៣ វិច្ឆិកា (ម៉ោងនៅកម្ពុជា)។ ហេតុការណ៍បំផ្ទុះគ្រាប់បែកអត្តឃាតនេះ គឺភេរវករបានបើករថយន្ត១គ្រឿង សំរុកចូលទៅបំផ្ទុះក្នុងទីតាំងស្នាក់នៅរបស់អង្គការសហប្រជាជាតិ នៅតំបន់ហ្កាវ នៃប្រទេសម៉ាលី។
ចុះផ្សាយនៅថ្ងៃ៖
ស្តាប់ - ០២:១៥
តាមសេចក្តីប្រកាសរបស់អ្នកនាំពាក្យក្រសួងការពារជាតិ នៅថ្ងៃពុធនេះ ក្នុងចំណោមអ្នកពលរដ្ឋខ្មែរ ដែលរងរបួសទាំង៤នាក់នោះ មានម្នាក់របួសធ្ងន់ និង៣នាក់ទៀតរបួសស្រាល ខណៈភេរវករម្នាក់បានស្លាប់នៅនឹងកន្លែង។ ពលរដ្ឋខ្មែរ ដែលរងរបួសទាំង៤នាក់ ត្រូវបានបញ្ចូនទៅសង្គ្រោះ និងព្យាបាលនៅមន្ទីរពេទ្យផ្សេងគ្នាទៅតាមស្ថានភាពរបួស។ ពួកគេ ជាអតីតបុគ្គលិកបម្រើការនៅមជ្ឈមណ្ឌលកំចាត់មីនកម្ពុជា(CMAC) និងអតីតបុគ្គលិកអង្គការ Hello TRUST។ ហេតុការណ៍នេះ ក៏បណ្តាលឲ្យជនជាតិម៉ាលី២នាក់ស្លាប់ និង១០នាក់ទៀតរងរបួសផងដែរ។
ដោយឡែកកម្លាំងរក្សាសន្តិភាពរបស់កម្ពុជា ដែលបំរើការងារនៅក្រោមឆ័ត្រអង្គការសហប្រជាជាតិនៅប្រទេសម៉ាលី គឺមិនមានគ្រោះថ្នាក់ដោយហេតុការណ៍ខាងលើនេះទេ។ នេះបើតាមសេចក្តីប្រកាសរបស់ក្រសួងការពារជាតិ។
កាលពីពេលថ្មីៗនេះ នៅក្នុងពិធីជួបសំណេះសំណាលជាមួយកម្មកររោងចក្រនៅខេត្តកណ្ដាល លោកនាយករដ្ឋមន្ត្រី ហ៊ុន សែន បានថ្លែងថា ពួកឧទ្ទាមបានវាយប្រហារយ៉ាងធ្ងន់ធ្ងរ ទៅលើបន្ទាយក្រុមកងកម្លាំងរក្សាសន្តិភាព ដោយពួកឧទ្ទាមប្រើប្រាស់រថយន្ត (Pick up) ៨គ្រឿង ឡោមព័ទ្ធជំរុំ ហើយរថយន្ត២គ្រឿង បានចូលវាយប្រហារបែបអត្តឃាត ទៅលើបន្ទាយកងទ័ពអង្គការសហប្រជាជាតិ ដែលក្នុងនោះមានកងទ័ពមួកខៀវកម្ពុជារស់នៅ។ ក៏ប៉ុន្តែ ការវាយប្រហារនោះ មិនបានបង្ករឲ្យកងទ័ពមួកខៀវកម្ពុជា រងរបួស ឬបាត់បង់ជីវិតនោះទេ ពោលគឺមានតែកងទ័ពរបស់បួគីណាហ្វាសូ ២នាក់ស្លាប់ និងរបួស៥នាក់។
មកទល់ពេលនេះ គេមិនទាន់ដឹងនៅឡើយទេថា មានពលរដ្ឋកម្ពុជា ដែលជាជនស៊ីវិលសរុបប៉ុន្មាននាក់នៅឡើយ កំពុងបំពេញការងារនៅក្នុងប្រទេសម៉ាលី និងប្រទេសអាហ្វ្រិកឯទៀត ក៏ប៉ុន្តែ ក្នុងរយៈពេលជាង១០ឆ្នាំមកនេះ កម្ពុជាបានបញ្ជូនកងទ័ពមួកខៀវរបស់ខ្លួនទៅក្រៅប្រទេសបានចំនួនប្រមាណ ជាង៥០០០នាក់ ក្នុងនោះកងទ័ពជាស្ត្រីមានចំនួនជាង២០០នាក់។ ប្រទេសកម្ពុជាបានបញ្ជូនកងទ័ពមួកខៀវរបស់ខ្លួនទៅកាន់ប្រទេសចំនួន៨ រួមមានស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល ស៊ីរ៉ី ស៊ីប ម៉ាលី និងប្រទេសឆាត។ កងកម្លាំងទ័ពមួកខៀវកម្ពុជា ជាកម្លាំងជំនាញផ្នែកវិស្វកម្ម កម្លាំងពេទ្យកម្រិត២ កម្លាំងបោសសម្អាតមីន កម្លាំងអាវុធហត្ថ និងកម្លាំងកម្ទេចយុទ្ធភ័ណ្ឌមិនទាន់ផ្ទុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ