អ្នកវិភាគសង្គមថាការដាក់ជញ្ជីងចល័តឡើងវិញល្អ តែទាមទារឲ្យមានការសហការ
អ្នកសិក្សាពីការអភិវឌ្ឍសង្គម បានលើកឡើងថា គំរោងដាក់ជញ្ជីងចល័តឡើងវិញ ដើម្បីថ្លឹងរថយន្ត គឺជាវិធានការល្អ តែទាមទារឲ្យក្រសួងហ៊ានផាកពិន័យគ្រប់រថយន្ត បើទោះបីជាក្រុមហ៊ុនរថយន្តនោះ មានខ្នងធំប៉ុណ្ណាក៏ដោយ។ គំរោងដាក់ជញ្ជីងចល័តឡើងវិញនេះ គឺជាវិធានការទប់ស្កាត់រថយន្តដឹកលើសទម្ងន់របស់ក្រសួងសាធារណការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោក កែម ឡី អ្នកសិក្សាពីការអភិវឌ្ឍសង្គមកម្ពុជា បានឲ្យដឹងថាការលើកឡើងរបស់លោករដ្ឋមន្ត្រីស៊ុន ចាន់ថុល អំពីការដាក់ជញ្ជីងចល័ត ដើម្បីទប់ស្កាត់ការដឹកលើសទម្ងន់គឺជារឿងល្អ។ ប៉ុន្តែលោក កែម ឡី បានលើកជាសំនួរថា តើក្រសួងសាធារណការ ឬអ្នកផាកពិន័យនោះ ពិតជាហ៊ានផាកពិន័យដែរឬទេ? បើក្រុមហ៊ុន រថយន្តមួយចំនួននោះ ជាក្រុមហ៊ុនកូនអ្នកធំៗ ពោលគឺធំជាងរដ្ឋមន្ត្រី។
លោកបានបន្ថែមថាចំណាត់ការលើរថយន្តដឹកលើសទម្ងន់កន្លងមក គឺអនុវត្តមិនបានជោគជ័យទេ ដោយសារតែឡាន ដែលដឹកលើសទម្ងន់នោះ គឺជាឡានរបស់ក្រុមហ៊ុនកូនប្រពន្ធបក្សពួកអ្នកកាន់អំណាចធំ។ ពេលខ្លះវិធានការដែលប្រកាសកន្លងមក គឺគ្រាន់តែជាការឃោសនាតែប៉ុណ្ណោះ។
ជុំវិញការទប់ស្កាត់រថយន្តលើសទម្ងន់នេះ លោក អៀរ ចរិយា អ្នកជំនាញខាងសុវត្ថិភាពផ្លូវថ្នល់បានបញ្ជាក់ប្រាប់វិទ្យុបារាំងថា ការដាក់ជញ្ជីងនៅតាមផ្លូវជាតិកាលពីកន្លងមកគឺមិនសូវជាមានប្រសិទ្ធភាពទេ ដោយសារតែមិនមានការផាកពិន័យ ឬការបញ្ឈប់។ លោកអៀរ ចរិយា មិនអាចបញ្ជាក់បានទេថាផែនការថ្មីនេះនឹងប្រសិទ្ធភាពប៉ុណ្ណានោះ ប៉ុន្តែលោកថាផែនការថ្មីនេះ ទាមទារឲ្យមានការចូលរួមពីស្ថាប័នពាក់ព័ន្ធដូចជានគរបាល ឬកម្លាំងរាជអាវុធហត្ថជាដើម។
លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី១២ ខែឧសភា បានបញ្ជាក់ថាក្រសួងនឹងមានវិធានការទប់ស្កាត់ការដឹកលើសទម្ងន់ ដោយទៅដល់ទីតាំង ហើយថ្លឹងទម្ងន់ដោយជញ្ជីងចល័ត។ ប៉ុន្តែដើម្បីធ្វើបែបនេះបាន លោក ស៊ុន ចាន់ថុល បញ្ជាក់ថាក្រសួងសាធារណការនឹងស្នើឲ្យលោកនាយករដ្ឋមន្ត្រីដាក់ជញ្ជីងចល័តឡើងវិញ ហើយគ្រោងដាក់បន្ថែមទៀត។ លោកបន្ថែមថាការក្រសួងនឹងមានផែនការពិន័យលើមន្ត្រីគ្រប់គ្រងជញ្ជីងណា ដែលឲ្យរថយន្ដដឹកលើសទម្ងន់ចរាចរលើផ្លូវថ្នល់។
សូមបញ្ជាក់ថា កាលពីខែកុម្ភៈ កន្លងទៅ មានរថយន្តមួយគ្រឿងបានដឹកលើសទម្ងន់ ដែលបង្កឲ្យខូចខាតលើស្ពានអ្នកលឿង ហើយភ្លាមៗនោះមិនមានអាជ្ញាធរណាតាមរថយន្តបង្កនោះទេ។ ៣ថ្ងៃក្រោយមកលោកនាយករដ្ឋមន្ត្រីបានបញ្ជាឲ្យនគរបាលតាមចាប់រថយន្តបង្កហេតុនោះ។ មិនបានប៉ុន្មានថ្ងៃក្រោយពីការបញ្ជារបស់លោកនាយករដ្ឋមន្ត្រី គេសង្កេតឃើញអាជ្ញាធរខេត្តព្រៃវែងចាត់វិធានការដាក់ជញ្ជីងថ្លឹងរថយន្តនៅគល់ស្ពានអ្នកលឿង តែមិនបានប៉ុន្មានសប្តាហ៍ផង វិធានការនេះបានបាត់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ