សំណុំរឿងស៊ើបអង្កេតជួញដូរឈើខុសច្បាប់ពាក់ព័ន្ធនឹងមន្ត្រីខេត្តមណ្ឌលគិរី បញ្ជូនមកដល់ភ្នំពេញ
ការស៊ើបអង្កេតលើសំណុំរឿងជួញដូរឈើខុសច្បាប់ ដែលមានជាប់ពាក់ព័ន្ធនឹងមន្ត្រីប្រចាំខេត្តមណ្ឌលគិរីចំនួន១១នាក់ ត្រូវបានផ្ទេរមកតុលាការក្រុងភ្នំពេញហើយ កាលពីសប្តាហ៍មុន។ នេះបើតាមមន្ត្រីតុលាការក្រុងភ្នំពេញ។ ការផ្ទេរសំណុំរឿងនេះ ធ្វើឡើង តាមការស្នើរបស់រដ្ឋមន្ត្រីក្រសួងយុត្តិធម៌។
ចុះផ្សាយនៅថ្ងៃ៖
ស្តាប់ - ០១:៥៨
លោកអ៊ី រិន ប្រធានលេខារដ្ឋានរដ្ឋបាលសាលាដំបូងរាជាធានីភ្នំពេញឲ្យដឹងថា សំណុំរឿងពុករលួយពាក់ព័ន្ធនឹងការជួញដូរឈើក្នុងខេត្តមណ្ឌលគិរី ត្រួវបានបញ្ជូនមកដល់សាលាដំបូងរាជធានីភ្នំពេញ និងស្ថិតនៅក្នុងដៃរបស់អយ្យការចាត់ការលើសំណុំរឿងនេះ។
យោងតាមការចុះផ្សាយរបស់កាសែតខេមបូឌេដេលី សំណុំរឿងខាងលើនេះ មានជាប់ពាក់ព័ន្ធនឹងមន្ត្រីខេត្តចំនួន១១រូប រួមមានមេបញ្ជាការយោធា និងមេបញ្ជាការកងរាជអាវុធហត្ថខេត្ត ឬអាចទាំងព្រះរាជអាជ្ញាអមសាលាដំបូងខេត្តនេះដែរ។
អ្នកនាំពាក្យក្រសួងយុត្តិធម៌ទាំង៣រូប មិនអាចទាក់ទងសុំការបំភ្លឺបានទេ នៅថ្ងៃទី១២ ខែកក្កដានេះ។
លោកយ៉ា ណារិន ប្រធានសាលាដំបូងខេត្តមណ្ឌលគីរីសុំមិនធ្វើអត្ថាធិប្បាយលើករណីខាងលើនេះ។ ចំណែកលោកមាស ប្រុស អ្នកនាំពាក្យសាលាដំបូងខេត្តមណ្ឌលគីរីបានឲ្យដឹងថា សំណុំរឿងខាងលើនេះត្រូវបានបញ្ជូនមកសាលាដំបូងក្រុងភ្នំពេញ កាលពីថ្ងៃសុក្រសប្តាហ៍មុនមក ហើយលោកមិនអាចបញ្ជាក់អត្តសញ្ញាណ ចំពោះអ្នកជាប់ពាក់ព័ន្ធទាំង១១នាក់នោះទេ។
ប៉ុន្តែលោកថាអ្នកពាក់ព័ន្ធ គឺជាមនុស្ស ដែលស្ថិតនៅក្នុងខេត្តមណ្ឌលគីរីនេះផ្ទាល់។ បើតាមលោកមាស ប្រុស ក្រៅពីអ្នកទាំង១១នាក់នេះ ក៏មានមនុស្សផ្សេងទៀតជាប់ពាក់ព័ន្ធនឹងករណីពុករលួយខាងលើនេះដែរ។
លោកប៉ែន ប៊ុណ្ណារ៍ មន្ត្រីអាដហុក ដែលតាមដានករណីនេះ បានបញ្ជាក់ប្រាប់វិទ្យុបារាំងអន្តរជាតិថា ការបញ្ជូនករណីអំពើពុករលួយក្នុងការជួញដូរឈើនេះ ធ្វើឡើងដោយសារតែសមាសភាពពាក់ព័ន្ធដល់មន្ត្រីក្នុងស្ថាប័នតុលាការខេត្តមណ្ឌលគិរី។ លោកប៊ុណ្ណារ៍ យល់ឃើញថា ប្រសិនបើសំណុំរឿងនេះ បន្តទុកស៊ើបអង្កេតនៅក្នុងខេត្តមណ្ឌលគីរី នោះនឹងមិនអាចរកយុត្តធម៌ឃើញទេ។
លោកមាស ប្រុស អ្នកនាំពាក្យសាលាដំបូងខេត្តមណ្ឌលគិរី និងលោក ប៉ែន ប៊ុណ្ណារ៍ មន្ត្រីអាដហុក ថាករណីស៊ើបអង្កេតលើមន្ត្រីរបស់ខេត្តមណ្ឌលគីរីនាពេលនេះធ្វើឡើង ក្រោយពីមានការបង្រ្កាបការជួញដូរឈើខុសច្បាប់ កាលពីខែកុម្ភៈ ហើយឈ្មួញឈើ បានឆ្លើយដាក់លើមន្ត្រីរបស់ខេត្ត ដែលមានទាំង មេបញ្ជាការ និងព្រះរាជអាជ្ញា។ បើតាមលោកប៊ុណ្ណារ៍ ឈ្មួញឈើបានផ្តល់លុយទៅឲ្យមន្ត្រីនៅតាមព្រំដែន ដើម្បីនាំឈើចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ