មួយឆ្នាំៗ ពលរដ្ឋខ្មែរចំណាយលើបារីជាង២០០លានដុល្លារ
ថ្ងៃទី៧មិថុនានេះ គឺជាទិវាពិភពលោកគ្មានថ្នាំជក់ ដែលត្រូវបានប្រារព្ធឡើងក្រោមប្រធានបទ «ថ្នាំជក់ជាឧបសគ្គនៃការអភិវឌ្ឍ»។ ក្នុងឱកាសនេះ ក្រសួងសុខាភិបាល បានឲ្យដឹងថា ពលរដ្ឋខ្មែរដែលជក់បារី មានប្រមាណ១លាន៦សែននាក់ ភាគច្រើនជាក្រុមមនុស្សដែលមានចំណូលទាប។ ក្នុងនោះ១ម៉ឺននាក់ស្លាប់ជារៀងរាល់ឆ្នាំ។ ចំណែកថ្លៃចំណាយក្នុងមួយឆ្នាំសម្រាប់ការទិញបារីវិញ មានប្រមាណ២០០លានដុល្លារអាមេរិកឯណោះ។
ចុះផ្សាយនៅថ្ងៃ៖
ថ្លៃជាង២០០លានដុល្លារនេះ គិតត្រឹមតែការចំណាយសម្រាប់ទិញបារីប៉ុណ្ណោះ នៅមិនទាន់រាប់បញ្ចូលការចំណាយព្យាបាលជំងឺដែលបង្កដោយថ្នាំជក់ប្រមាណ១៦០លានដុល្លារទៀតនៅឡើយទេ។ យ៉ាងណាក៏ដោយ ក្រសួងសុខាភិបាលបានអះអាងថា ការប្រើប្រាស់ថ្នាំជក់នៅកម្ពុជា បានថយចុះខ្លះហើយ ក្នុងរយៈពេល១០ឆ្នាំចុងក្រោយនេះ។ ចំពោះបុរស អត្រាការជក់បារីថយចុះពី៤៨ភាគរយ មកត្រឹម៣៥ភាគរយ ខណៈស្ដ្រី ថយចុះពី២០ភាគរយ មកជាង១១ភាគរយ។
ការថយចុះនេះ ត្រូវបានក្រសួងសុខាភិបាលពន្យល់ថា បណ្ដាលមកពីកិច្ចខិតខំប្រឹងប្រែងរបស់រដ្ឋាភិបាល ដែលបានហាមឃាត់ទាំងស្រុងការផ្សាយពាណិជ្ជកម្មសម្រាប់ឧស្សាហកម្មថ្នាំជក់ អនុវត្តសារព្រមានសុខភាពនិងរូបភាពលើកញ្ចប់បារី ហាមឃាត់ការជក់បារីនៅកន្លែងសាធារៈ និងការអប់រំពីផលប៉ះពាល់នៃការប្រើប្រាស់ថ្នាំជក់ជាដើម។
លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល មានប្រសាសន៍ថា ផលប៉ះពាល់នៃការប្រើប្រាស់ថ្នាំជក់ គឺជាឧបសគ្គមួយរារាំងដល់ការសម្រេចគោលដៅអភិវឌ្ឍប្រកបដោយចិរភាព។ ក្នុងនោះ ការប្រើប្រាស់ថ្នាំជក់ធ្វើឲ្យប៉ះពាល់ធ្ងន់ធ្ងរដល់សុខភាព សេដ្ឋកិច្ច យេនឌ័រ និងបរិស្ថាន។ ក្នុងទិដ្ឋភាពបរិស្ថាន កសិដ្ឋានថ្នាំជក់ ដែលប្រើប្រាស់ថ្នាំសម្លាប់សត្វល្អិតនិងជីគីមី បានបង្កបញ្ហាដល់បរិស្ថាន។ ចំណែកផ្សែងផលិតថ្នាំជក់ ព្រមទាំងសំណល់ដើមថ្នាំជក់ មានផ្ទុកសារធាតុគីមីពុលជាង៧ពាន់ប្រភេទ ដែលអាចបង្កជាជំងឺមហារីក។
របាយការណ៍ពីអង្គការសុខភាពពិភពលោកបានបង្ហាញថា ថ្នាំជក់បានដាក់បន្ទុកយ៉ាងធ្ងន់ធ្ងរដល់សេដ្ឋកិច្ចជាតិ និងបង្កើនភាពក្រីក្រ ដោយបានសម្លាប់មនុស្សជាង៧លាននាក់ក្នុងមួយឆ្នាំ ព្រមទាំងធ្វើឲ្យខាតបង់ថវិកាប្រមាណ១,៤ទ្រីលានដុល្លារនៅ ទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ