លោកកឹម សុខាថាការយកលោកឈឹម ផលវរុណធ្វើជាសាក្សីគឺគ្មានផ្តល់យុត្តិធម៌ដល់រឿងក្តីរបស់លោកទេ
នៅព្រឹកនេះ លោកឈឹម ផលវរុណ សហអ្នកនាំពាក្យម្នាក់របស់គណបក្សប្រជាជនកម្ពុជា បានចូលទៅបំភ្លឺក្នុងនាមជាសាក្សីក្នុងរឿងក្តីក្បត់ជាតិរបស់លោកកឹម សុខា តាមការកោះហៅរបស់ចៅក្រមស៊ើបសួរសាលាដំបូងរាជធានីភ្នំពេញ។ ចំពោះសាក្សីរូបនេះ លោកកឹម សុខា តាមរយៈមេធាវីបានអះអាងថា លោកគ្មានសង្ឃឹមនឹងទទួលបានយុត្តិធម៌ទេដោយលោកចាត់ទុកលោកឈឹម ផលវរុណមិនមែនជាមនុស្សកណ្តាលឡើយ ដោយហេតុថាតែងតែវាយប្រហារលើរូបលោកជារឿយៗនាពេលកន្លងមក។
ចុះផ្សាយនៅថ្ងៃ៖
ស្តាប់ - ០២:១៧
លោកផែង ហេង សហមេធាវីម្នាក់របស់លោកកឹម សុខា បានអះអាងប្រាប់វិទ្យុអន្តរជាតិថា លោកកឹម សុខា បានសម្តែងការមិនស្វាគមន៍ទេដែលចៅក្រមស៊ើបសួរសាលាដំបូងរាជធានីភ្នំពេញលោកគី ឫទ្ធីបានកោះហៅលោកឈឹម ផលវរុណក្នុងនាមជាសាក្សីទៅបំភ្លឺនៅក្នុងសំណុំរឿងក្តីរបស់លោកនោះ។ លោកមេធាវីផែង ហេង បានអះអាងដូច្នេះ បន្ទាប់ពីលោកបានចុះទៅជួបលោកកឹម សុខា ដោយផ្ទាល់នៅក្នុងពន្ធនាគារត្រពាំងផ្លុងក្នុងខេត្តត្បូងឃ្មុំ កាលពីថ្ងៃចន្ទ។
បើតាមលោកមេធាវីផែង ហេង លោកកឹម សុខា មិនសង្ឃឹមសោះឡើយថាការបំភ្លឺរបស់លោកឈឹម ផលវរុណនេះ នឹងផ្តល់យុត្តិធម៌ដល់លោកនោះ តែជំនួសមកវិញគឺមានតែការដាក់បន្ទុកបន្ថែមប៉ុណ្ណោះ។ តាមលោកកឹម សុខា នេះគឺដោយសារតែលោកឈឹម ផលវរុណ ធ្លាប់មានទំនាស់ជាមួយលោកកាលនៅធ្វើការនៅមជ្ឈមណ្ឌលសិទ្ធិមនុស្សកម្ពុជា ហើយមួយវិញទៀត គឺនៅក្នុងកម្មវិធីវិទ្យុនានា លោកឈឹម ផលវរុណតែងតែនិយាយវាយប្រហារលើរូបលោកជារឿយៗ។ លើសពីនេះទៅទៀត លោកឈឹម ផលវរុណ គឺជាអ្នកនាំពាក្យម្នាក់របស់គណបក្សប្រជាជនកម្ពុជា។ ទាំងអស់នេះ ធ្វើឲ្យលោកកឹម សុខា សន្មត់ថា លោកឈឹម ផលវរុណមិនជាមនុស្សកណ្តាលដែលត្រូវយកធ្វើជាសាក្សីនៅក្នុងសំណុំរឿងរបស់លោកនោះទេ។ នេះបើតាមការបញ្ជាក់បន្ថែមរបស់លោកមេធាវីផែង ហេង។
ជាការឆ្លើយតបវិញ លោកឈឹម ផលវរុណក្រោយពីបញ្ចប់ការបំភ្លឺនៅសាលាដំបូងរាជធានីភ្នំពេញ បានអះអាងថា លោកមិនបានប្រឌិតព័ត៌មាន ឬវាយប្រហារដើម្បីដាក់បន្ទុកណាមួយទៅលើលោកកឹម សុខានោះឡើយ។ លោកថា ចៅក្រមបានសួរលោកអំពីបញ្ហាពាក់ព័ន្ធនានាកាលលោកនៅធ្វើការឲ្យមជ្ឈមណ្ឌលសិទ្ធិមនុស្សកម្ពុជាក្នុងជំនាន់លោកកឹម សុខា ធ្វើជាប្រធាន ហើយលោកក៏បានឆ្លើយនូវអ្វីដែលលោកបានដឹងតែប៉ុណ្ណោះ។
សូមបញ្ជាក់ថា ការកោះហៅលោកឈឹម ផលវរុណ ឲ្យធ្វើជាសាក្សីនៅក្នុងរឿងក្តីលោកកឹម សុខាពីសំណាក់ចៅក្រមស៊ើបសួរសាលាដំបូងរាជធានីភ្នំពេញនេះ ធ្វើឡើងបន្ទាប់ពីលោកម៉ម សូណង់ដូ ដែលត្រូវបានចៅក្រមកោះហៅក្នុងនាមជាសាក្សីដូចគ្នានេះ បានបដិសេធមិនចូលឆ្លើយនៅតុលាការ។ យ៉ាងណាក៏ដោយ លោកមេធាវីផែង ហេង ហាក់មិនយល់ជម្រៅទេពីគោលបំណងរបស់តុលាការក្នុងកោះហៅលោកឈឹម ផលវរុណ មកឆ្លើយបំភ្លឺនៅពេលនេះ។ លោកមេធាវីបានសម្តែងការងឿនឆ្ងល់ថា ហេតុអ្វីបានជាចៅក្រមកោះហៅតែលោកឈឹម ផលវរុណមកធ្វើជាសាក្សី តែបែរជាមិនកោះហៅលោកប៉ា ងួនទៀង និងលោកអ៊ូ វិរៈដែលធ្លាប់តែកាន់តំណែងខ្ពស់នៅមជ្ឈមណ្ឌលសិទ្ធិមនុស្សកម្ពុជាមកធ្វើជាសាក្សីវិញ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ