កម្ពុជាថ្លែងការពារសិទ្ធិអធិបតេយ្យរបស់ខ្លួន ខណៈមានការអំពាវនាវពីអាមេរិក ឲ្យដោះលែង លោក កឹម សុខា
ក្រសួងការបរទេសកម្ពុជានៅយប់ថ្ងៃទី១០ ខែកញ្ញា បានឆ្លើយតបទៅកាន់សហរដ្ឋអាមេរិកដោយបញ្ជាក់ថា រដ្ឋាភិបាលកម្ពុជាមានសិទ្ធិអធិបតេយ្យពេញលេញ ក្នុងការចាត់វិធានការតាមផ្លូវច្បាប់ចាំបាច់ ចំពោះបុគ្គលនិងអង្គភាពទាំងឡាយណា ដែលរំលោភរដ្ឋធម្មនុញ្ញកម្ពុជា និងច្បាប់ជាធរមានផ្សេងទៀត សំដៅការពារសន្តិសុខជាតិ និងនីតិរដ្ឋរបស់ខ្លួន។ ការថ្លែងរបស់ក្រសួងការបរទេសកម្ពុជាដូចនេះ ធ្វើឡើងបន្ទាប់ពីអ្នកស្រី Morgan Ortagus អ្នកនាំពាក្យក្រសួងការបរទេសអាមេរិក បានអំពាវនាវឱ្យរដ្ឋាភិបាលកម្ពុជាទម្លាក់ចោលការចោទទាំងអស់លើលោក កឹម សុខា ប្រធានអតីតគណបក្សសង្រ្គោះជាតិ។
ចុះផ្សាយនៅថ្ងៃ៖
ស្តាប់ - ០២:០៨
តាមរយៈសេចក្តីថ្លែងការណ៍របស់ខ្លួន ក្រសួងការបរទេសកម្ពុជា ឲ្យដឹងថាខ្លួនត្រូវតែបង្ខំចិត្តឆ្លើយតបទៅនឹងសេចក្តីថ្លែងការណ៍របស់អ្នកនាំពាក្យក្រសួងការបទេសអាមេរិក ដោយហេតុផល ដូចជាបណ្តាប្រទេសដទៃទៀតដែលអនុវត្តប្រព័ន្ធច្បាប់ស៊ីវិល (civil law) ដែរ នីតិវិធីតុលាការកម្ពុជាមិនមានចែងអំពីថេរៈវេលាអតិបរិមា សម្រាប់រឿងក្តី ដែលស្ថិតក្រោមការឃ្លាំមើលតាមផ្លូវតុលាការនោះទេ។ ជាក់ស្តែងចាប់តាំងពីថ្ងៃទី០៩ ខែកញ្ញា ឆ្នាំ២០១៨មក ដោយផ្អែកលើហេតុផលមនុស្សធម៌ លោក កឹម សុខា ត្រូវបានដោះលែងឲ្យមករស់នៅក្នុងផ្ទះរបស់គាត់ជាមួយគ្រួសារយ៉ាងសុខស្រួល ក្រោមការត្រួតពិនិត្យរបស់តុលាការ។
អ្នកនាំពាក្យក្រសួងការបរទេសកម្ពុជា ក៏បានរម្លឹកទៀតថា ការបរាជ័យក្នុងការប៉ុនប៉ងជំរុញឱ្យមានការផ្លាស់ប្តូររបប តាមរយៈមធ្យោបាយមិនមែនប្រជាធិបតេយ្យ មិនមែនជាការអនុវត្តសិទ្ធិមនុស្សជាមូលដ្ឋាន និងលទ្ធិប្រជាធិបតេយ្យ នោះទេ។
ក្រសួងការទេសកម្ពុជា បានទាមទារឱ្យអ្នកនយោបាយ និងរដ្ឋការបរទេសទាំងអស់គោរពអធិបតេយ្យភាពកម្ពុជា និងចៀសវាងពីការជ្រៀតជ្រែកចូលកិច្ចការផ្ទៃក្នុងកម្ពុជា ដោយយកលេសបញ្ហាសិទ្ធិមនុស្ស និងលទ្ធិប្រជាធិបតេយ្យ។
គួររម្លឹកថា អ្នកនាំពាក្យក្រសួងការបរទេសអាមេរិក អ្នកស្រី Morgan Ortagus កាលពីថ្ងៃទី១០កញ្ញាដដែល តាមរយៈវីដេអូខ្លីប្រមាណជាង១នាទីនោះ បានអំពាវនាវជាថ្មីម្តងទៀតឱ្យដោះលែង លោក កឹម សុខា ដោយប្រគល់ឡើងវិញនូវសិទ្ធនយោបាយ និង សិទ្ធជាពលរដ្ឋជូនរូបលោក។ បន្ថែមលើនេះក៏ត្រូវបន្តដោះលែងអ្នកពាក់ព័ន្ធទាំងឡាយណា ដែលរដ្ឋាភិបាលកម្ពុជាឃុំខ្លួនពួកគេតាមអំពើចិត្ត។
ក្រសួងការបរទេសអាមេរិកអះអាងថា រដ្ឋាភិបាលកម្ពុជាឃុំខ្លួន លោក កឹម សុខាដោយមិនមានការកាត់ទោស និង មិនទាន់មានភ័ស្តុតាងណាមួយដែលអាចជឿជាក់បាននោះទេ នៅក្នុងការរំលាយគណបក្សសង្គ្រោះជាតិ និងឈានដកហូតដំណែងរបស់ក្រុមប្រឹក្សាឃុំសង្កាត់របស់គណបក្សនេះចំនួនជាង៥០០០នាក់នៅទូទាំងប្រទេស។ ទង្វើរបៀបនេះ គឺកំពុងបំផ្លាញលទ្ធិប្រជាធិបតេយ្យ សេរីពហុបក្សនៅកម្ពុជា ដែលជាគោលការណ៍មានចែងក្នុងរដ្ឋធមនុញ្ញ។
ជាការកត់សម្គាល់ ការអំពាវនាវរបស់សហរដ្ឋអាមេរិកនេះ ធ្វើឡើងមួយសប្ដាហ៍ប៉ុណ្ណោះ ក្រោយពីខួបគម្រប់ពីរឆ្នាំនៃការចាប់ឃុំខ្លួនលោក កឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ